អាមេរិក ព្រមានពីការវាយប្រហារហិង្សា នៅថ្ងៃលោក ត្រាំ ស្បថចូលកាន់តំណែង 

ស្របពេលពិធីស្បថចូលកាន់តំណែងរបស់លោក ដូណាល់ ត្រាំ កាន់តែខិតជិតមកដល់ បណ្តាភ្នាក់ងារសន្តិសុខជាតិអាមេរិក ត្រូវគេព្រមានឲ្យប្រុងជើងការខ្ពស់និងរក្សាការប្រុងប្រយ័ត្នជានិច្ច ព្រោះថា ព្រឹត្តិការណ៍នោះនឹងក្លាយជាគោលដៅនៃអំពើហិង្សារបស់ជនជ្រុលនិយម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Politico នៅថ្ងៃពុធទី១៥ខែមករាឆ្នាំ២០២៥, ក្រុមចារកម្មនិងមន្ត្រីច្បាប់បានចេញសារព្រមានថា ជនដែលមិនពេញចិត្តនឹងការបោះឆ្នោត អាចយកព្រឹត្តិការណ៍នេះ ទុកជាឱកាសចុងក្រោយដើម្បីប្រើអំពើហិង្សា បង្ហាញពីការអាក់អន់ស្រពន់ចិត្តចំពោះលទ្ធផលឆ្នោត។

លើសពីនេះ សារនោះបានចង្អុលចំៗទៅការប៉ងធ្វើឃាតលោក ត្រាំ ២លើកអំឡុងយុទ្ធនាការឃោសនាបោះឆ្នោតឆ្នាំ២០២៤ និងការវាយប្រហារភេរវកម្មនៅថ្ងៃឆ្លងឆ្នាំសកលឆ្នាំ២០២៥ក្នុងទីក្រុង New Orleans និង Las Vegas។

មិនត្រឹមប៉ុណ្ណឹង ក្រុមមន្ត្រីក៏បារម្ភដែរថា បាតុកម្មនៅជុំវិញទីតាំងរៀបចំពិធី នឹងរីករាលដាលពិបាកគ្រប់គ្រង។ មានក្រុមមួយចំនួនបានដាក់សំណើសុំច្បាប់ធ្វើបាតុកម្មរួចទៅហើយ ប៉ុន្តែរឿងដដែលៗធ្លាប់កើតឡើងនោះគឺថា បាតុកម្មតែងតែរីកធំ ហើយតែងមានមនុស្សត្រូវចាប់ខ្លួននៅចុងបញ្ចប់។

រឿងមួយទៀតដែលចោទជាកង្វល់ដ៏ធំផងដែរនោះគឺថា អ្នកដែលមានភក្តីភាពជាមួយក្រុមរដ្ឋឥស្លាមឬក្រុមគាំទ្រអ៊ីរ៉ង់ អាចនឹងផ្តោតសំខាន់អំឡុងព្រឹត្តិការណ៍នេះ។ ជាយូរមកហើយ អ៊ីរ៉ង់ បានព្យាយាមសម្លាប់លោក ត្រាំ ឬទីប្រឹក្សារបស់គាត់ ដើម្បីសងសឹកចំពោះការធ្វើឃាតមេទ័ព Qassem Soleimani នៅពេលលោក ត្រាំ ចូលកាន់អាណត្តិដំបូង។

លោក John Cohen អតីតមន្ត្រីប្រឆាំងភេរវកម្មដែលជួយរៀបចំផែនការសន្តិសុខ សម្រាប់ពិធីសម្ពោធចូលកាន់តំណែងរបស់លោក ចូ បៃដិន បាននិយាយថា ព្រឹត្តិការណ៍ឆ្នាំនេះប្រឈមនឹងការគំរាមកំហែងច្រើនជាងកាលពីបួនឆ្នាំមុនទៅទៀត។

សូមបញ្ជាក់ថា ប៉ូលិស២៥ ០០០នាក់មកពីជុំវិញប្រទេស នឹងត្រូវបានដាក់ពង្រាយទៅក្នុងរដ្ឋធានី វ៉ាស៊ីនតោន ឌីស៊ី ដើម្បីការពារសន្តិសុខក្នុងពិធីស្បថចូលកាន់តំណែងរបស់លោក ត្រាំ ក្នុងនាមជាប្រធានាធិបតីអាមេរិកទី៤៧ នៅថ្ងៃទី២០ខែមករាឆ្នាំ២០២៥៕

អត្ថបទ៖ សុខ សុវណ្ណ

ចុចអាន៖ អាមេរិក ព្រមានអំពីការវាយប្រហារថ្មីៗ ដែលយកលំនាំតាមអំពើភេរវកម្មនៅថ្ងៃឆ្លងឆ្នាំ