ព័ត៌មានអន្ដរជាតិ

ជម្លៀសខ្លួនពលរដ្ឋ ៣ ០០០នាក់ ក្រោយផ្ទុះភ្នំភ្លើង Ibu នៅឥណ្ឌូណេស៊ី

បានផុស

១ ខែ មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

Chheang

អ្នកស្រុកចំនួន ៣ ០០០នាក់នៅលើកោះ Halmahera ភាគខាងកើតប្រទេសឥណ្ឌូណេស៊ី ត្រូវបានអាជ្ញាធរក្នុងតំបន់ជម្លៀសខ្លួនជាបណ្ដោះអាសន្ន បន្ទាប់ពីភ្នំភ្លើង Ibu បានផ្ទុះ ដែលបង្កឲ្យមានពពកពណ៌ប្រផេះក្រាស់ក្រែល កម្ពស់រហូតដល់ ៤គីឡូម៉ែត្រពីដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារភ្នំភ្លើងឥណ្ឌូណេស៊ី បាននិយាយថា ភ្នំភ្លើង Ibu បានផ្ទុះនៅព្រឹកថ្ងៃពុធទី១៥ខែមករាឆ្នាំ២០២៥ ក្នុងរយៈពេលប្រហែល២នាទី ហើយអាជ្ញាធរបានបង្កើនកម្រិតប្រកាសអាសន្នធ្ងន់ធ្ងរបំផុតនៅតំបន់ជុំវិញបំផ្ទុះភ្នំភ្លើងនោះ។

លោក Abdul Muhari អ្នកនាំពាក្យរបស់ទីភ្នាក់ងារកាត់បន្ថយគ្រោះមហន្តរាយ បានប្រាប់ថា ការជម្លៀសខ្លួនបានចាប់ផ្តើមកាលពីល្ងាចថ្ងៃពុធសម្រាប់អ្នកស្រុកប្រហែល ៣ ០០០នាក់នៅជុំវិញតំបន់ដែលកំពុងត្រូវបានផ្តល់អាទិភាពដោយសារតែពួកគេនៅជិតភ្នំភ្លើងខ្លាំង។

លោក Muhari បាននិយាយថាមានមនុស្ស ១៣ ០០០នាក់កំពុងរស់នៅក្បែរភ្នំភ្លើង Ibu។

សូមបញ្ជាក់ថា ឥណ្ឌូណេស៊ី គឺជាប្រទេសមួយស្ថិតនៅក្នុងតំបន់ “រង្វង់ភ្លើង” ឬហៅថា “Ring of Fire” ដែលគ្រោះរញ្ជួយដី និងបន្ទុះភ្នំភ្លើងគឺជារឿងដែលការកើតឡើងជាញឹកញាប់។ ភ្នំភ្លើងសកម្មនៅឥណ្ឌូណេស៊ី មានចំនួនសរុប ១២៧កន្លែង។

កាលពីខែឧសភាឆ្នាំ២០២៤ ឥណ្ឌូណេស៊ីបានជួបប្រទះនឹងហេតុការណ៍ផ្ទុះភ្នំភ្លើងធំៗចំនួន២ គឺបន្ទុះនៅភ្នំភ្លើង Ruang ស្ថិតនៅខេត្ត North Sulawesi ដែលជម្លៀសប្រជាជនជាង ១២ ០០០នាក់ និងបន្ទុះនៅភ្នំភ្លើង Mount Marapi ស្ថិតនៅខេត្ត West Sumatra ដែលបានឆក់យកជីវិតមនុស្សយ៉ាងហោចណាស់ ៦០នាក់៕

ដោយ៖ ឈាង