អង់គ្លេស សន្យាជួយអ៊ុយក្រែន ១០០ឆ្នាំ

ក្នុងដំណើរទស្សនកិច្ចតាមរថភ្លើងទៅកាន់ប្រទេសអ៊ុយក្រែនជាលើកដំបូងចាប់តាំងពីចូលកាន់តំណែងនាយករដ្ឋមន្ត្រីអង់គ្លេសក្នុងខែកក្កដា លោក Keir Starmer បានចុះហត្ថលេខាលើកិច្ចព្រមព្រៀងជាប្រវត្តិសាស្រ្តមួយ ជាមួយប្រមុខដឹកនាំនៃរដ្ឋាភិបាលទីក្រុងកៀវ វ្ល៉ាឌីមៀរ ហ្សេលេនស្គី ដោយក្នុងនោះ ទីក្រុងឡុងដ៍ សន្យាជួយនិងពង្រឹងកិច្ចសហប្រតិបត្តិការសន្តិសុខជាមួយអ៊ុយក្រែន ក្នុងរយៈពេល១០០ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail កាលពីថ្ងៃព្រហស្បតិ៍ទី១៦ខែមករាឆ្នាំ២០២៥ កិច្ចព្រមព្រៀងនោះ ត្រូវបានគេដឹងថា គឺជាកិច្ចសហប្រតិបត្តិការលើវិស័យជាច្រើនរួមមានយោធា ថាមពល វិទ្យាសាស្ត្រ វប្បធម៌ និងសេដ្ឋកិច្ចជាដើម ហើយវាគឺជាការបន្ថែមពីលើកិច្ចព្រមព្រៀងពាណិជ្ជកម្មនិងភាពជាដៃគូចាស់ឆ្នាំ២០២០ ក៏ដូចជាកិច្ចព្រមព្រៀងសហប្រតិបត្តិការទ្វេភាគីដែលបានចុះហត្ថលេខាដោយប្រទេសទាំងពីរកាលពីខែមករាឆ្នាំ២០២៤ផងដែរ។

ភ្លាមៗក្រោយចុះហត្ថលេខាលើកិច្ចព្រមព្រៀងថ្មីនេះ លោក Starmer ប្រាប់សន្និសីទកាសែតថា «យើងបានឈានដល់កិច្ចព្រមព្រៀងជាប្រវត្តិសាស្រ្ត។ វាគឺជាទំនាក់ទំនងថ្មីរវាងអង់គ្លេសនិងអ៊ុយក្រែន ដែលឆ្លុះបញ្ចាំងពីសុច្ឆន្ទៈរវាងគ្នានិងគ្នា»។

លោកបន្តថា «ការប្តេជ្ញាចិត្តជួយ១០០ឆ្នាំនេះ គឺដើម្បីធានាថា អ៊ុយក្រែន មិនអាចត្រូវរងគ្រោះដោយការវាយលុកយ៉ាងព្រៃផ្សៃរបស់រុស្ស៊ីទៀតទេ។ ឆ្នាំនេះ យើងនឹងជួយទីក្រុងកៀវឲ្យបានខ្លាំងបំផុត ហើយទីក្រុងឡុងដ៍ ក៏មានគម្រោងផ្តល់ខែលការពារមីស៊ីលដល់អ៊ុយក្រែន និងបង្វឹកទាហានអ៊ុយក្រែន ជាបន្តផងដែរ»។

សូមបញ្ជាក់ថា ដំណើរ​ទស្សនកិច្ច​នេះ​ធ្វើ​ឡើង​ស្របពេល​សង្គ្រាមរុស្ស៊ី-អ៊ុយក្រែន ឈានចូលដល់ដំណាក់កាលសំខាន់ ខណៈទីក្រុងមូស្គូ គំរាម​សម្ព័ន្ធមិត្ត​លោកខាងលិច​របស់​អ៊ុយក្រែនរឹតតែខ្លាំង មុនការចូលកាន់តំណែងជាប្រធានាធិបតីអាមេរិកទី៤៧របស់លោក ដូណាល់ ត្រាំ។

ឈានឆ្ពោះទៅរកកិច្ចព្រមព្រៀងបញ្ចប់សង្គ្រាម ពោលគឺផ្ទុយពីការធានាក្នុងអំឡុងយុទ្ធនាការឃោសនាបោះឆ្នោត ដែលអួងអាងថា នឹងបញ្ចប់ជម្លោះនេះបានត្រឹមរយៈពេល២៤ម៉ោង។

ទោះបីជាយ៉ាងណាក៏ដោយ លោកក៏មានសុទិដ្ឋិនិយមដែរថា លោកនឹងអាចដោះស្រាយបញ្ហាជម្លោះរុស្ស៊ី-អ៊ុយក្រែនបាន លឿនជាងនេះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី-អ៊ុយក្រែន ដោះដូរឈ្លើយសឹកគ្នាលើកដំបូង ក្នុងឆ្នាំ២០២៥