ព័ត៌មានអន្ដរជាតិ

ចិន ជំរុញឲ្យសមាជិកអាស៊ាន ជួយបង្ក្រាបឧក្រិដ្ឋកម្មឆ្លងដែនរួមគ្នា

បានផុស

២ ខែ មុន

នៅ

ថ្ងៃសុក្រ ១៧ មករា ២០២៥

ដោយ

Chheang

រដ្ឋមន្ត្រីការបរទេសចិនលោក Wang Yi បានជំរុញឲ្យសមាជិកទាំងអស់ដែលពាក់ព័ន្ធនៅអាស៊ានប្រកៀកស្មាគ្នា ជួយចាត់វិធានការខ្លាំងក្លា ដើម្បីបង្ក្រាបល្បែងអនឡាញ និងការបោកប្រាស់តាមទូរសព្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wang បាននិយាយកាលពីថ្ងៃព្រហស្បតិ៍ទី១៦ខែមករាឆ្នាំ២០២៥ថា ករណីល្បែងស៊ីសងតាមអ៊ីនធឺណិតជាបន្តបន្ទាប់ និងការបោកប្រាស់តាមទូរសព្ទនៅតាមបណ្តោយព្រំដែនថៃ-មីយ៉ាន់ម៉ាបានគំរាមកំហែង និងបង្កគ្រោះថ្នាក់ដល់ពលរដ្ឋចិន និងប្រទេសដទៃទៀត។

លោកបានបន្ថែមថា ចិនមានឆន្ទៈក្នុងការពង្រឹងកិច្ចសហប្រតិបត្តិការជាមួយបណ្តាប្រទេសអាស៊ានក្នុងការអនុវត្តច្បាប់ និងសន្តិសុខ ដើម្បីផ្តល់នូវបរិយាកាសសុវត្ថិភាពដែលប្រជាជនគ្រប់ជាតិសាសន៍អាចធ្វើដំណើរបាន។

សំណើរបស់ចិនក្នុងការបង្កើនកិច្ចសហប្រតិបត្តិការផ្នែកសន្តិសុខ បានគូសបញ្ជាក់ពីការព្រួយបារម្ភកាន់តែខ្លាំងឡើងរបស់ទីក្រុងប៉េកាំង ចំពោះការគំរាមកំហែងដែលបង្កឡើងដោយការក្លែងបន្លំតាមទូរគមនាគមន៍ និងការជួញដូរមនុស្សនៅក្នុងតំបន់អាស៊ីអាគ្នេយ៍។ សំណើនេះក៏បង្ហាញផងដែរនូវភាពបន្ទាន់ថ្មីមួយពីទីក្រុងប៉េកាំង ដើម្បីជំរុញការសម្របសម្រួលជាមួយក្រុមប្រទេសអាស៊ានទាំង១០ ដែលរួមមានមីយ៉ាន់ម៉ា និងថៃ ដើម្បីដោះស្រាយឧក្រិដ្ឋកម្មឆ្លងព្រំដែន។

ភ្ញៀវទេសចរចិន ដែលបានចំណាយប្រាក់រាប់ពាន់លានដុល្លារក្នុងមួយឆ្នាំៗនៅទូទាំងតំបន់មុនពេលការរាតត្បាតនៃជំងឺកូវីដ-១៩ គឺជាប្រភពចំណូលដ៏សំខាន់សម្រាប់អាស៊ីអាគ្នេយ៍។ ទោះបីជាយ៉ាងណាក៏ដោយ ក្តីបារម្ភអំពីការជួញដូរ និងរឿងរ៉ាវដែលផ្សព្វផ្សាយនៅលើប្រព័ន្ធផ្សព្វផ្សាយសង្គមរបស់ចិន នៃអ្នកធ្វើដំណើរដែលត្រូវបានចាប់ខ្លួនដោយក្រុមជនពាល អាចរារាំងពួកគេមិនឲ្យទៅលេងនៅទីនោះ។

ក្នុងករណីដ៏ល្បីមួយថ្មីៗនេះ តារាសម្ដែងចិនម្នាក់ឈ្មោះ Wang Xing ដែលបានបាត់ខ្លួនកាលពីដើមខែមករានៅជិតព្រំដែនថៃ-មីយ៉ាន់ម៉ា ត្រូវបានរកឃើញក្នុងប្រទេសមីយ៉ាន់ម៉ា។ ប៉ូលិសថៃបាននិយាយកាលពីសប្តាហ៍មុនថា ពួកគេជឿថា Wang Xing គឺជាជនរងគ្រោះនៃការជួញដូរមនុស្ស៕

ដោយ៖ ឈាង