អត្រា​កំណើត​នៅ​ចិន​​​​​ធ្លាក់​ចុះ​ទាប​ជាង​មរណភាព​ ខណៈ​ប្រជាសាស្ត្រ​ចិន​​ធ្លាក់​ចុះ​​បីឆ្នាំ​​ជាប់ៗ​គ្នា​

សារព័ត៌មាន​ Al Jazeera ​​បាន​ផ្សាយ​ថា​ ចំនួនប្រជាជនរបស់ប្រទេសចិនបានធ្លាក់ចុះជាលើកទី៣ជាប់ៗគ្នារួមទាំងឆ្នាំ ២០២៤ ដែលធ្វើឲ្យវិបត្តិប្រជាសាស្រ្តនៅតែបន្តកើតមានលើប្រទេសមហាអំណាចអាស៊ីបូព៌ានេះ។

ការិយាល័យស្ថិតិជាតិ (NBS) បានរាយការណ៍​​នៅ​ថ្ងៃសុក្រថា ប្រជាជនចិនបានធ្លាក់ចុះចំនួន ១.៣៩​លាននាក់ក្នុងរយៈពេល១២ខែមកនេះ មកនៅត្រឹម ១.៤០៨ ពាន់លាននាក់ ដោយសារការស្លាប់បន្តកើនឡើងលើស​​អត្រា​កំណើត​​។

ប្រជាជនរបស់ប្រទេសចិនបានធ្លាក់ចុះជាលំដាប់ចាប់តាំងពីទសវត្សរ៍ឆ្នាំ​១៩៨០ ប៉ុន្តែឆ្នាំ​២០២២គឺជាឆ្នាំដំបូងនៃការស្លាប់ដែលមានចំនួនច្រើនជាងការកើតចាប់តាំងពីឆ្នាំ១៩៦១ ដោយសារពេលនោះប្រទេសចិនកំពុងស្ថិតក្នុងភាពមហន្តរាយទុរ្ភិក្សដែលមនុស្សប្រមាណ២០លាននាក់បានស្លាប់សដោយសារភាពអត់ឃ្លាន។

​ទីក្រុង​ប៉េកាំង​​ បានបង្កើន​កិច្ចខិតខំប្រឹងប្រែងនាពេលថ្មីៗដើម្បីពន្យឺតអត្រាកំណើតធ្លាក់ចុះ ប៉ុន្តែ​កិច្ច​ខិតខំ​នោះ​​បានបរាជ័យ ហើយ NBS បានទទួលស្គាល់ថា ប្រទេសនេះកំពុងប្រឈមមុខនឹងបញ្ហាជាច្រើន។ ការិយាល័យនេះបាននិយាយនៅក្នុងរបាយការណ៍របស់ខ្លួនថា៖«យើងត្រូវតែដឹងថា ផលប៉ះពាល់អវិជ្ជមានដែលនាំមកដោយបរិយាកាសខាងក្រៅកំពុង​កើន​ឡើង តម្រូវការក្នុងស្រុកមិនគ្រប់គ្រាន់ សហគ្រាសមួយចំនួនមានការលំបាកក្នុងផលិតកម្ម និងប្រតិបត្តិការ ហើយសេដ្ឋកិច្ចនៅតែប្រឈមមុខនឹងការលំបាក និងបញ្ហាប្រឈម»​។

ទីក្រុងប៉េកាំងបានប្រើប្រាស់វិធីសាស្រ្តជាច្រើនដើម្បីបង្កើនអត្រាកំណើត រួម​ទាំង​ការ​ហៅស្ត្រីនៅលីវ ជា«ស្រីសល់» ប្រសិនបើពួកគេនៅតែមិន​ព្រម​រៀបការ រួម​ទាំង​ធ្វើឱ្យមានការលំបាកបន្ថែមទៀតក្នុងការទទួលបានការលែងលះ ឬការរំលូតកូន ក៏ដូចជាការផ្តល់ប្រាក់ឧបត្ថម្ភដល់គូស្នេហ៍ដើម្បីគាំទ្រដល់ការថែទាំកុមារ។

ក្នុងឆ្នាំ២០២៣ អាពាហ៍ពិពាហ៍បានកើនឡើង ១២.៤ ភាគរយ​ធៀប​នឹង​មួយ​ឆ្នាំ​មុន​ បន្ទាប់ពីបញ្ចប់ការរាតត្បាត កូវីដ១៩ ដែលនាំឱ្យមានការស្ទុះងើបឡើងវិញក្នុងរយៈពេលខ្លីនៃកំណើតនៅឆមាសទីមួយនៃឆ្នាំ​២០២៤ នៅតាមផ្នែកខ្លះនៃប្រទេស។

គួរបញ្ជាក់ថា ប្រទេសចិនបានបញ្ចប់ជាផ្លូវការនូវ «គោលនយោបាយកូនតែមួយ» របស់ខ្លួនក្នុងឆ្នាំ​២០១៦ ដែលអស់រយៈពេលជាច្រើនទសវត្សរ៍បានព្យាយាមគ្រប់គ្រងកំណើនរបស់ប្រទេសនេះ ប៉ុន្តែវាបានបញ្ចប់ដោយចំនួនប្រជាជនដែលធ្លាក់ចុះ​ដោយសារតែចំណង់ចំណូលចិត្តខាងវប្បធម៌ចង់បានតែកូនប្រុស។

ឥឡូវនេះគ្រួសារត្រូវបានអនុញ្ញាតឱ្យមានកូនបីនាក់នៅឆ្នាំ២០២១ ប៉ុន្តែការកើនឡើង​លើ​ការ​ចំណាយ​​លើ​ការ​រស់នៅក្នុងទីក្រុង សេដ្ឋកិច្ចដើរយឺត និងអត្រាអ្នកអត់ការងារធ្វើរបស់យុវជនខ្ពស់ បានធ្វើឱ្យការចិញ្ចឹមកូនក្លាយជា​​រឿង​​ទាញ​​យុវជន​ចិន​​​ឲ្យ​​អល់ឯក​​ក្នុង​ការ​​យក​គ្រួសារ​និង​យក​កូន​តាមចិត្តចង់។

សេដ្ឋកិច្ចរបស់ប្រទេសចិនបានកើនឡើងចំនួន៥ភាគរយនៅឆ្នាំ​២០២៤ ដែលឆ្លើយតបទៅនឹងការព្យាករណ៍របស់រដ្ឋាភិបាល ប៉ុន្តែកំណើនផលិតផលក្នុងស្រុកសរុប (GDP) ត្រូវគេរំពឹងថានឹងបន្តធ្លាក់ចុះនៅក្នុងប៉ុន្មានឆ្នាំខាងមុខនេះ។

ប្រឈមមុខនឹងវិបត្តិប្រជាសាស្រ្ត ទីក្រុងប៉េកាំងបានអនុវត្តវិធានការថ្មីដើម្បីបង្កើនអាយុចូលនិវត្តន៍ជាបណ្តើរៗពី៦០​ទៅ ៦៣​សម្រាប់បុរស ពី ៥៥ទៅ​៥៨ សម្រាប់ស្ត្រីក្នុងមុខតំណែងអ្នកគ្រប់គ្រង និងបច្ចេកទេស និង​៥៥ សម្រាប់កម្មករស្ត្រីផ្សេងទៀត។

ប្រទេសចិនមិនមែនជាប្រទេសតែមួយគត់នៅអាស៊ីបូព៌ាដែលប្រឈមនឹងវិបត្តិប្រជាសាស្រ្តនោះទេ។ ប្រទេសជប៉ុន កូរ៉េខាងត្បូង និងតៃវ៉ាន់ ក៏កំពុងជួបប្រទះការធ្លាក់ចុះ​ ក្នុងហេតុផលស្រដៀងគ្នានេះ រួមទាំងការរឹតបន្តឹងលើជនអន្តោប្រវេសន៍។ ប្រទេសចិន ក៏ដូចជាអាស៊ីបូព៌ាជាច្រើនដែរ ក៏មិនអនុញ្ញាតឱ្យស្ត្រីមិនទាន់រៀបការទទួលបានចាក់មេជីវិតឲ្យមានកូន ដូចជា IVF ដែរ៕

អត្ថបទ៖ ប៊ុន សុភាព