អ៊ីស្រាអែល-ហាម៉ាស ដោះដូរអ្នកទោសនិងចំណាប់ខ្មាំងគ្នា សរុបជិត១០០នាក់

ជាផ្នែកនៃបទឈប់បាញ់ដំណាក់កាលទីមួយរវាងអ៊ីស្រាអែលនិងក្រុមហាម៉ាស, កាលពីថ្ងៃអាទិត្យទី១៩ខែមករាឆ្នាំ២០២៥ អ៊ីស្រាអែលបានដោះលែងអ្នកទោសប៉ាឡេស្ទីនចំនួន៩០នាក់ ចំណែកក្រុមហាម៉ាសឯណោះ ក៏បានដោះលែងចំណាប់ខ្មាំងអ៊ីស្រាអែលវិញ ៣នាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដោះដូរនេះធ្វើឡើងនៅភាគខាងលិចទីក្រុងហ្គាហ្សា ហើយគេឃើញមានក្រុមគ្រួសារចំណាប់ខ្មាំងនាំគ្នារង់ចាំដោយក្តីអន្ទះសា ចង់ជួបមុខសាច់ញាតិជុំគ្នាជាថ្មី។

ក្នុងកិច្ចព្រមព្រៀននេះ ក្រុមហាម៉ាសនិយាយថា រាល់ចំណាប់ខ្មាំងម្នាក់នឹងត្រូវដូរជាមួយអ្នកទោសប៉ាឡេស្ទីន៣០នាក់ ហើយការដោះដូរលើកក្រោយ នឹងធ្វើឡើងនៅថ្ងៃសៅរ៍។

តាមការបញ្ជាក់ពីកងកម្លាំងការពារអ៊ីស្រាអែល (IDF), ចំណាប់ខ្មាំងអ៊ីស្រាអែលទាំង៣ដែលត្រូវដោះលែងគឺមានដូចជា Doron Steinbrecher អាយុ៣១ឆ្នាំ, Emily Damari អាយុ២៨ឆ្នាំ, Romi Gonen អាយុ២៤ឆ្នាំ។  ពួកគេត្រូវបានក្រុមហាម៉ាស ឃុំឃាំងអស់រយៈពេល១៥ខែមកហើយ ហើយក្រោយការដោះលែង អ្នកទាំង៣ក៏ត្រូវបានបញ្ជូនទៅកាន់មន្ទីរពេទ្យ Sheba Medical Center ក្នុងទីក្រុង Tel Aviv ដើម្បីពិនិត្យខុសភាព។

ជុំវិញរឿងនេះដែរ អ្នកនាំពាក្យ IDF លោក Daniel Hagari ថ្លែងប្រាប់សន្និសីទកាសែតថា ក្នុងបទឈប់បាញ់ដំណាក់កាលដំបូងនេះ ចំណាប់ខ្មាំងពី៣ទៅ៤នាក់ នឹងត្រូវបានដោះលែងរៀងរាល់សប្តាហ៍។ យ៉ាងណាក្រុមហាម៉ាស សង្កត់ធ្ងន់ថា ខ្លួននឹងគោរពតាមបទឈប់បាញ់នេះឲ្យបានខ្ជាប់ខ្ជួនបំផុត ខ្លាចតែអ៊ីស្រាអែលទេ។

សូមបញ្ជាក់ជាថ្មី ដំណាក់កាលដំបូងនៃបទ​ឈប់​បាញ់នេះ​នឹងមានរយៈពេល៦សប្តាហ៍ ហើយ​ក្នុងអំឡុងពេលនោះ ​​ចំណាប់​ខ្មាំង​ចំនួន​៣៣នាក់ក្នុងចំណោមចំណាប់ខ្មាំង៩៨​នាក់ដែលនៅសល់​ពី​ការដោះលែង​កាល​ពី​បទ​ឈប់​បាញ់​ចុង​ខែ​វិច្ឆិកា​និង​ដើម​ឆ្នាំ​២០២៣ នឹងត្រូវ​ដោះដូរ​ជាមួយ​​អ្នកទោសនិងអ្នកជាប់ឃុំប៉ាឡេស្ទីនជិត២០០០នាក់។ ចំណាប់ខ្មាំង​ទាំង​៣៣​នាក់​ជា​ ស្ត្រី កុមារ និង​បុរសអាយុលើសពី​៥០ឆ្នាំ។

​អ្នក​ទោស​របស់​ប៉ាឡេស្ទីន​ដែល​នឹងត្រូវ​ដោះលែង​​រាប់បញ្ចូលទាំងអ្នកទោសប្រុស ស្រី និងក្មេងជំទង់៧៣៧​ នាក់ ដែលខ្លះជាសមាជិកនៃក្រុមសកម្មប្រយុទ្ធដែលត្រូវបានកាត់ទោសពីការវាយប្រហារសម្លាប់ជនជាតិអ៊ីស្រាអែលរាប់សិបនាក់ ក៏ដូចជាជនជាតិប៉ាឡេស្ទីនរាប់រយនាក់មកពីហ្គាហ្សានៅក្នុងការឃុំឃាំងចាប់តាំងពីការចាប់ផ្តើមនៃសង្រ្គាម៕

អត្ថបទ៖ សុខ សុវណ្ណ

ចុចអាន៖ ​ចំណាប់​ខ្មាំងដំំបូង​ត្រូវដោះលែង​ ក្រោម​បទឈប់​បាញ់អ៊ីស្រាអែល-​ហាម៉ាស​​