ព័ត៌មានអន្ដរជាតិ

រថយន្តដឹកប្រេងក្រឡាប់និងផ្ទុះឆេះ សម្លាប់និងបង្ករបួសជិត១៣០នាក់នៅនីហ្សេរីយ៉ា

បានផុស

២២ វិនាទី មុន

នៅ

ថ្ងៃចន្ទ ២០ មករា ២០២៥

ដោយ

យោងតាមការចេញផ្សាយរបស់សារព័ត៌មាន CNN មនុស្សយ៉ាងហោចណាស់៧០នាក់បានបាត់បង់ជីវិត និងជាច្រើននាក់ទៀតបានរងរបួសនៅភាគខាងជើងប្រទេសនីហ្សេរីយ៉ាកាលពីថ្ងៃសៅរ៍ ដោយសាររថយន្តដឹកប្រេងមួយគ្រឿងបានក្រឡាប់និងផ្ទុះឆេះរាល់ដាលដល់ទីតាំងជំុវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរគ្រប់គ្រងគ្រោះអាសន្នជាតិនៃប្រទេសនីហ្សេរីយ៉ា បាននិយាយនៅក្នុងសេចក្តីថ្លែងការណ៍មួយថា សាកសពជាង ៧០ត្រូវបានរកឃើញនិងមនុស្សចំនួន៥៦នាក់បានរងរបួស ស្របពេលដែលហាងជាង១៥រងការបំផ្លាញ។

បើតាមមេបញ្ជាការផ្នែកសុវត្ថិភាពចរាចរណ៍ផ្លូវគោកសហព័ន្ធសម្រាប់ រដ្ឋ Niger បាននិយាយថា ជនរងគ្រោះភាគច្រើនគឺជាអ្នកស្រុកក្រីក្រ ដែលបានប្រញាប់ប្រញាល់ទៅប្រមូលយកប្រេងដែលកំពប់ចេញពីស៊ីទែន បន្ទាប់ពីរថយន្តនេះក្រឡាប់ ទោះបីជាមានការហាមឃាត់ពួកគេក៏ដោយ។ ទោះយ៉ាងណា អ្នកពន្លត់អគ្គីភ័យបានគ្រប់គ្រងនិងពន្លត់ភ្លើងនេះបាន។

ឧបទ្ទវហេតុបែបនេះបានក្លាយជារឿងធម្មតានៅក្នុងប្រទេសផលិតប្រេងដ៏ធំបំផុតរបស់ទ្វីបអាហ្រ្វិក ដោយបានសម្លាប់មនុស្សរាប់សិបនាក់ក្នុងប្រទេសដែលកំពុងប្រឈមនឹងវិបត្តិជីវភាពក្រីក្រលំបាកដ៏អាក្រក់បំផុត។ ឧបទ្ទវហេតុនៅក្នុងរដ្ឋ Nigerនេះ ក៏កើតឡើងបន្ទាប់ពីមានការផ្ទុះស្រដៀងគ្នានៅក្នុងរដ្ឋ Jigawa កាលពីខែតុលាឆ្នាំមុន បានសម្លាប់មនុស្ស ១៥៣នាក់ ហើយវាបានក្លាយជាសោកនាដកម្មដ៏អាក្រក់បំផុតមួយនៅក្នុងប្រទេសនេះ។

ជាមួយគ្នានេះ តម្លៃប្រេងសាំងនៅក្នុងប្រទេសនីហ្សេរីយ៉ាបានឡើងថ្លៃជាង៤០០% ចាប់តាំងពីប្រធានាធិបតីលោក Bola Tinubu បានលុបចោលប្រាក់ឧបត្ថម្ភដល់ប្រជាជនដែលមានអាយុកាលរាប់ទសវត្សរ៍នៅពេលគាត់ចូលកាន់តំណែងក្នុងខែឧសភា ឆ្នាំ២០២៣៕