ព័ត៌មានអន្ដរជាតិ

រថយន្តដឹកជំនួយមនុស្សធម៌៦០០គ្រឿងក្នុង១ថ្ងៃ នឹងចូលតំបន់ហ្កាហ្សាដែលជួបវិបត្តិខ្លាំង

បានផុស

២ ខែ មុន

នៅ

ថ្ងៃចន្ទ ២០ មករា ២០២៥

ដោយ

ប្រភពពីប៉ាឡេស្ទីនបានបញ្ជាក់ថា ឡានជំនួយមនុស្សធម៌ដំបូងពីប្រទេសអេហ្ស៊ីបបានចូលដល់តំបន់ហ្គាហ្សាកាលពីថ្ងៃអាទិត្យ ខណៈដែលបទឈប់បាញ់អ៊ីស្រាអែល និងក្រុមហាម៉ាសបានចាប់ផ្តើមចូលជាធរមាន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី២០ខែមករានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពបានប្រាប់ Xinhua ថា ជំនួយមនុស្សធម៌ដំបូងបានចូលទៅក្នុងតំបន់មាត់សមុទ្រតាមរយៈច្រកព្រំដែន Kerem Shalom នៅភាគខាងត្បូងហ្គាហ្សា។ នៅព្រឹកថ្ងៃដដែល ទូរទស្សន៍ Nile ដែលគ្រប់គ្រងដោយរដ្ឋអេហ្ស៊ីប បានបង្ហាញវីដេអូនៃរថយន្តជំនួយរាប់សិបគ្រឿង ឆ្លងកាត់ផ្នែកឆ្លងកាត់ច្រកព្រំដែននៅRafahរបស់អេហ្ស៊ីប និងត្រូវបានត្រួតពិនិត្យដោយអាជ្ញាធរអ៊ីស្រាអែល មុនពេលឆ្លងកាត់ភាគីប៉ាឡេស្ទីន ដើម្បីចូលទៅកាន់តំបន់ហ្គាហ្សា។

គណៈប្រតិភូមកពីប្រទេសសម្រុះសម្រួល រួមមាន កាតា និងសហរដ្ឋអាមេរិក រួមទាំងអ្នកផ្សេងទៀតមកពីប៉ាឡេស្ទីន និងអ៊ីស្រាអែល បានមកដល់ទីក្រុងគែរកាលពីថ្ងៃអាទិត្យ ដើម្បីត្រួតពិនិត្យការអនុវត្តកិច្ចព្រមព្រៀងបទឈប់បាញ់អ៊ីស្រាអែល និងក្រុមហាម៉ាស់។

ដោយផ្អែកលើកិច្ចព្រមព្រៀងឈប់បាញ់ រថយន្តដឹកជំនួយមនុស្សធម៌ប្រហែល៦០០គ្រឿងដែលផ្ទុកដោយសម្ភារៈចាំបាច់សម្រាប់តម្រូវការប្រចាំថ្ងៃ រួមទាំងរថយន្តដឹកប្រេងចំនួន៥០គ្រឿង នឹងចូលទៅក្នុងហ្គាហ្សាជារៀងរាល់ថ្ងៃ ដើម្បីបន្ធូរបន្ថយវិបត្តិមនុស្សធម៌នៅហ្គាហ្សា។

ដំណាក់កាលដំបូងរយៈពេល៤២ថ្ងៃនៃកិច្ចព្រមព្រៀងបទឈប់បាញ់ដែលបានចុះហត្ថលេខាកាលពីថ្ងៃពុធតាមរយៈការសម្រុះសម្រួលនៃប្រទេសអេហ្ស៊ីប កាតា និងសហរដ្ឋអាមេរិក បានចាប់ផ្តើមចូលជាធរមានកាលពីថ្ងៃអាទិត្យបន្ទាប់ពីក្រុមហាម៉ាសបានផ្តល់បញ្ជីឈ្មោះស្ត្រីជនជាតិអ៊ីស្រាអែលបីនាក់ដែលនឹងត្រូវបានដោះលែង។

ជាមួយគ្នានេះដែរ ការិយាល័យរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បានបញ្ជាក់ថា កិច្ចព្រមព្រៀងឈប់បាញ់បានចាប់ផ្តើមចូលជាធរមានហើយ៕