ថាក់ស៊ីន៖​ ក្រុមឆបោក​អនឡាញ​ប្រើ AI ត្រាប់សំឡេង​ លោក ដូណាល់ ត្រាំ​​ ឲ្យ​កូនស្រីលោក​វេរលុយទៅហុងកុង​​

 នៅ​​​​១ថ្ងៃ​មុន​ការ​​ឡើង​កាន់​អំណាច​​​​របស់​ លោក​ ដូណាល់ ត្រាំ ដែល​នឹង​ក្លាយ​ជា​ប្រធានាធិបតី​​​ទី​៤៧​​របស់មហាអំណាច​សហរដ្ឋអា​​មេរិក អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា អះអាងថា មាន​ក្រុម​ឆបោក​​​​​ដែល​មាន​មូលដ្ឋាន​ចេញ​ពី​ប្រទេស​មីយ៉ាន់​ម៉ា​និង​កម្ពុជា ប្រើប្រាស់​បច្ចេកវិទ្យា​​បច្ចេកវិទ្យា​សិប្បនិមិ្មត​ AI ( artificial intelligence) បង្កើត​សំឡេង​​​របស់​លោក ដូណាល់ ត្រាំ​ ហៅទៅ​​កូនស្រី​ពៅ​​​របស់​លោក ​គឺ​​​នាយករដ្ឋមន្ត្រី ផែថងថាន ស៊ីណាវ៉ាត្រា (Paetongtarn Shinawatra)។

លោក ថាក់ស៊ីន ថ្លែងថា៖«សព្វថ្ងៃនេះ នាយករដ្ឋមន្ត្រី “អ៊ុងអ៊ីង [ផែថងថាន] នឹងខ្ញុំ ក្នុងនាមជាឪពុកនិងកូនពិភាក្សាគ្នារាល់ថ្ងៃ ពិភាក្សាគ្នារហូត។ ខ្ញុំជាឪពុកមានបទពិសោធន៍ត្រូវផ្តល់ការប្រឹក្សាណែនាំនាយករដ្ឋមន្ត្រី “អ៊ុងអ៊ីង” ឱ្យនាំយកបច្ចេកវិទ្យាថ្មីៗដើម្បីមកអភិវឌ្ឍប្រទេសជាតិរបស់យើង។ ចំពោះរឿង AI នាយករដ្ឋមន្ត្រី “អ៊ុងអ៊ីង” បានប្តេជ្ញាយ៉ាងពេញទំហឹង ចង់ឱ្យយុវជនជំនាន់ថ្មីបានរៀនសូត្រពីរបៀបប្រើប្រាស់ AI ដើម្បីបញ្ជាឱ្យ AI ធ្វើការងារ»។​

​តាមការ​ចុះ​ផ្សាយ​របស់​សារព័ត៌មាន​ថៃ Thai PBS World ​​​លោក​ថាក់​ស៊ីន បាន​​និយាយថា ការ​​​ប្រើប្រាស់សំឡេង​លោក​ដូណាល់ ត្រាំ ហៅ​ទូរស័ព្ទ​នោះ ក្នុងគោលបំណងបញ្ចុះបញ្ចូល​នាយករដ្ឋមន្ត្រី​ថៃ​ឱ្យផ្ទេរប្រាក់ទៅកាន់អង្គការមួយក្នុងទីក្រុងហុងកុង ប៉ុន្តែ​នាយករដ្ឋមន្ត្រី ផែថងថាន​ ដែល​ជា​កូន​ស្រី​ពៅ​របស់​​លោក ​មិន​បាន​ធ្លាក់​ក្នុង​ល្បិចកល​​នោះ​ទេ។

​តាមការ​ចេញផ្សាយ​នោះ លោកថាក់ស៊ីន​ ស៊ីណាវ៉ា​ត្រា ដែលកំពុងធ្វើយុទ្ធនាការនៅខេត្តភាគឦសានប្រទេស​សម្រាប់បេក្ខជនគណបក្សភឿថៃ នៅមុនការបោះឆ្នោតរបស់អង្គការរដ្ឋបាលខេត្ត​ នៅ​ថ្ងៃទី១ខែកុម្ភៈ (PAO) ដោយ​​បាននិយាយថា ទាំងមីយ៉ាន់ម៉ា​និងកម្ពុជាបានសន្យាគាំទ្រយ៉ាងពេញទំហឹងក្នុងការបង្ក្រាបមជ្ឈមណ្ឌលហៅទូរស័ព្ទនៅក្នុងប្រទេសរបស់ពួកគេ។

លោក​​បាន​បន្ថែម​ថា លោក​សង្ឃឹម​ថា​ក្រុម​ជន​ពាល​ផ្នែក​ហៅ​ទូរសព្ទ​នឹង​ត្រូវ​បាន​បង្ក្រាប​​​​​នៅ​ឆ្នាំ​នេះ។

សារព័ត៌មាន​ថៃ​ដដែល បាន​ដកស្រង់​សម្តី​របស់​​ លោកឧត្តមសេនីយ៍ទោ Niwet Apawasin ស្នងការរងនៃការិយាល័យបង្ក្រាបឧក្រិដ្ឋកម្មបច្ចេកវិទ្យា ដោយ​បាននិយាយថា ឥឡូវនេះក្រុមជនខិលខូចបានប្រើបច្ចេកវិទ្យាAI ដើម្បី​ធ្វើ​ត្រាប់​តាម​​សំឡេងរបស់តារាល្បីៗក្នុងការប៉ុនប៉ងលួចបន្លំតាម​គោលដៅដែល​បាន​កំណត់​របស់ពួកគេ។

​លោក បាន​និយាយថា​ ក្រៅ​ពី​កា​រប្រើប្រាស់​​បច្ចេកវិទ្យា​ AI ដើម្បី​ទាញយកសំឡេង​​​​ដើម្បី​ប្រើប្រាស់​​សម្រាប់​គោល​ដៅ​បោក​ប្រាស់​របស់​ពួកគេ

ក្រុម​អ្នកបោកប្រាស់ក៏អាចប្រើកម្មវិធីដែលបានដំឡើងមុននៅក្នុងស្មាតហ្វូន ដើម្បីលួចទិន្នន័យផ្ទាល់ខ្លួន ឬលុយពីគណនីធនាគាររបស់អ្នកប្រើប្រាស់ទូរស័ព្ទ។

​​Thai PBS World ​ក៏បាន​ស្រង់​សម្តី​ លោក Suraphong Plengkham ប្រធានគណៈកម្មាធិការការពារទិន្នន័យផ្ទាល់ខ្លួន បាននិយាយថា ​អ្នក​ដែល​ធ្វើការឱ្យក្រុមហ៊ុនផ្តល់សេវាទូរស័ព្ទចល័ត ប្រហែលជាកំពុងលក់ទិន្នន័យផ្ទាល់ខ្លួនរបស់អ្នកប្រើប្រាស់ទូរស័ព្ទទៅឱ្យក្រុមឆបោក៕​