មនុស្ស ៧០ លាននាក់ ទូទាំងសហរដ្ឋអាមេរិក រងផលប៉ះពាល់ដោយសារព្យុះព្រឹលធ្ងន់ធ្ងរ

មនុស្សប្រមាណ៧០លាននាក់នៅតាមបណ្តោយឆ្នេរសមុទ្រភាគខាងកើតសហរដ្ឋអាមេរិក កំពុងប្រឈមទប់ទល់នឹងព្យុះព្រឹលយ៉ាងធ្ងន់ធ្ងរ ដែលនឹងនាំមកនូវសីតុណ្ហភាពត្រជាក់ដ៏គ្រោះថ្នាក់ គ្របដណ្តប់ចាប់ពីតំបន់ទំនាបភាគខាងជើងរហូតដល់ចុងរដ្ឋ Maine។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃចន្ទទី២០ខែមករាឆ្នាំ២០២៥។

ជាមួយនឹងការព្រមានអំពីព្យុះរដូវរងាដ៏ធ្ងន់ធ្ងរនេះ ទីភ្នាក់ងារអាកាសធាតុជាតិបានព្យាករថា នឹងមានព្រឹលធ្លាក់កម្រិតពី១៥-២៥សង់ទីម៉ែត្រឯណោះនៅតំបន់មួយចំនួន ជាពិសេសផ្នែកខ្លះនៃរដ្ឋ Massachusetts, New Hampshire, Maine និង Connecticut។

លោក Marc Chenard អ្នកឧតុនិយមនៃទីភ្នាក់ងារអាកាសធាតុជាតិនៅមហាវិទ្យាល័យ Park Maryland បានប៉ាន់ស្មានថា ប៉ុន្មានថ្ងៃខាងមុខ ព្យុះព្រឹលនឹងធ្វើឲ្យប៉ះពាល់ដល់ប្រជាជន៧០លាននាក់ ក្នុងនោះរួមទាំងនៅ New England និង Mid-Atlantic ផងដែរ។ ទីក្រុងធំៗដូចជា Philadelphia, New York និង Boston អាចមានធ្លាក់ព្រឹលខ្លាំងនៅដើមសប្តាហ៍។

លើសពីនេះ ការធ្លាក់ព្រឹលក៏រំខានដល់ជើងហោះហើររបស់ក្រុមហ៊ុនអាកាសចរណ៍តាមបណ្តោយតំបន់ Eastern Seaboard ផងដែរ ដោយបើយោងតាមទីភ្នាក់ងារតាមដានជើងហោះហើរ FlightAware បានឲ្យដឹងថា ជើងហោះហើរជិត ១៣០ នៅអាកាសយានដ្ឋានក្នុងទីក្រុង New York ត្រូវបានលុបចោល ហើយជិត ៩០ ផ្សេងទៀតត្រូវពន្យារពេល។ ជើងហោះហើររាប់សិបជើងក៏ត្រូវបានលុបចោល ឬពន្យារពេលនៅព្រលានយន្តហោះជុំវិញទីក្រុងWashington, D.C និង Boston ផងដែរ។

មិនត្រឹមប៉ុណ្ណឹង អភិបាលរដ្ឋមួយចំនួនបានប្រកាសរួចទៅហើយ មុនពេលអាកាសធាតុធ្ងន់ធ្ងរ ដោយជំរុញឲ្យពលរដ្ឋត្រៀមខ្លួន និងតាមដានការព្យាករណ៍ជាបន្តបន្ទាប់៕

អត្ថបទ៖ ប៊ុន សុភាព