ភាគពាយព្យ ថៃ រញ្ជួយដី ១៣លើក, ពលរដ្ឋភ័យតាំងពីយប់ ដល់ព្រឹក

តាមការចុះផ្សាយរបស់ The Nation នៅថ្ងៃចន្ទទី២០ខែមករាឆ្នាំ២០២៥, ខេត្ត Mae Hong Son ភាគពាយព្យប្រទេសថៃ បានកើតមានការរញ្ជួដីចំនួន១៣លើក​ត្រឹមរយៈពេល២ថ្ងៃ ដោយធ្វើឲ្យពលរដ្ឋភិតភ័យតាំងពីយប់ដល់ព្រឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរតាមដានការរញ្ជួយដីនៃនាយកដ្ឋានឧតុនិយមថៃ ផ្តល់ព័ត៌មានថា ដំបូងឡើយ រញ្ជួយដីបានកើតឡើងនៅម៉ោង១១:៤១នាទីយប់ថ្ងៃអាទិត្យ ជាមួយកម្រិត៣.២រ៉ិចទ័រ ដែលមានជម្រៅ១គីឡូម៉ែត្រនិងចំណុចកណ្តាលក្នុងឃុំ Wiang Nuea នៃស្រុក Pai។

ក្រោយមក ក៏មានការរញ្ជួយជាបន្តបន្ទាប់ទៀត សរុប១៣លើក បើគិតត្រឹមម៉ោង៦:៥៣នាទីព្រឹកថ្ងៃចន្ទ ហើយក្នុងនោះការរញ្ជួយដែលខ្លាំងបំផុត ត្រូវបានគេវាស់កម្រិត៣.៤រ៉ិចទ័រ។

អ្នកស្រុក Pai ប្រាប់ថា ពួកគេភិតភ័យព្រោះតែរំញ័រ ហើយបានចេញក្រៅផ្ទះព្រោះតែខ្លាចកើតរឿងអាក្រក់ ខណៈមានខ្លះមិនបានគេងទាល់តែសោះពេញមួយយប់ ដោយសារអារម្មណ៍ភ័យខ្លាច។

ទោះបីជាយ៉ាងណាក៏ដោយ ដោយសារតែរញ្ជួយដីនេះមានកម្រិតស្រាល វាមិនបង្កការខូចខាតដល់សំណង់ហេដ្ឋារចនាសម្ព័ន្ធ ឬផ្ទះសម្បែង និងបណ្តាលឲ្យមានគ្រោះថ្នាក់ដល់មនុស្សនោះទេ។

ជាមួយគ្នានេះដែរ ការិយាល័យបង្ការនិងកាត់បន្ថយគ្រោះមហន្តរាយខេត្ត Mae Hong Son បានធ្វើការត្រួតពិនិត្យបឋម និងកំពុងតាមដានស្ថានភាព ក៏ដូចជាផលប៉ះពាល់ ហើយអំពាវនាវដល់ពលរដ្ឋ សូមកុំចលាចល ត្រូវស្តាប់តាមការណែនាំរបស់មន្ត្រី។

សូមបញ្ជាក់ថា ប្រទេសថៃ ឧស្សាហ៍កើតគ្រោះរញ្ជួយដីញឹកញាប់ដែរ ក្នុងរយៈពេលប៉ុន្មានឆ្នាំមកនេះ ប៉ុន្តែភាគច្រើនមានកម្រិតស្រាល ហើយបង្កការខូចខាតតិចតួចប៉ុណ្ណោះ។ ការរញ្ជួយដីខ្លាំងបំផុត គឺកើតឡើងកាលពីខែឧសភា ឆ្នាំ ២០១៤ ជាមួយកម្រិត ៦.៣ រ៉ិចទ័ ក្នុងស្រុក Mae Lao ខេត្តឈៀងម៉ៃ ដោយបានសម្លាប់មនុស្សម្នាក់ និងរបួសជាង ១០០ នាក់៕

អត្ថបទ៖ សុខ សុវណ្ណ

ចុចអាន៖ ខេត្តឈៀងម៉ៃ ប្រទេសថៃ កើតរញ្ជួយដី កម្រិតស្រាល