ត្រាំ ថា​នឹង​ជួប​ ពូទីន តែ​មិន​ទាន់​កំណត់​ពេល​វេលា​ជាក់លាក់​ទេ

កាលពីថ្ងៃចន្ទ​ទី​២០​ខែ​មករា​ឆ្នាំ​២០២៥ ប្រធានាធិបតីអាមេរិក លោក ដូណាល់ ត្រាំ បានប្រកាសថា លោកនឹងជួបជាមួយប្រធានាធិបតីរុស្ស៊ី លោក វ៉្លាឌឺមៀរ ពូទីន។

លោក ត្រាំ ដែលទើបតែចាប់ផ្តើមអាណត្តិទីពីររបស់គាត់ បានកត់សម្គាល់ថា ការផ្លាស់ប្តូរការដឹកនាំរបស់សហរដ្ឋអាមេរិកទំនងជាមានផល​ប៉ះពាល់​យ៉ាងសំខាន់ទាំងក្នុងស្រុកនិងអន្តរជាតិ។

នៅពេលសួរអំពីពេលវេលានៃកិច្ចប្រជុំ លោក ត្រាំ បានឆ្លើយតបថា៖ «ខ្ញុំមិនដឹងទេ» ប៉ុន្តែបាន​បញ្ជាក់​ថា វាអាចកើតឡើង «ឆាប់ៗនេះ»។ ប្រធានាធិបតី​ទី​៤៧​របស់​អាមេរិក​រូប​នេះ ក៏​បានរំលឹកឡើងវិញនូវបំណងចង់បញ្ចប់សង្រ្គាមនៅអ៊ុយក្រែនឲ្យ​បាន​រហ័ស​តាម​ដែល​អាច​ធ្វើ​ទៅ​បាន​ផង​ដែរ។

បើ​និយាយ​ទាក់ទងនឹងប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី, លោក ត្រាំ បាន​លើក​ឡើង​ថា លោក ហ្សេលេនស្គី បានបង្ហាញចំណាប់អារម្មណ៍ក្នុងការចរចារកិច្ចព្រមព្រៀងមួយ ទោះបីជាលោកមិនប្រាកដថាតើលោក ពូទីន នឹងយល់ព្រមឬយ៉ាងណា។ លោក ត្រាំ បានសង្កត់ធ្ងន់ថា កិច្ចព្រមព្រៀង​គួរតែត្រូវបានសម្រេច ដោយបន្ថែមថា ការស្ទាក់ស្ទើររបស់លោក ពូទីន អាចធ្វើឲ្យ​ប៉ះពាល់ដល់ប្រទេសរុស្ស៊ី ដោយលើកឡើងពីបញ្ហាប្រឈមសេដ្ឋកិច្ច និងអតិផរណា។

លោក ត្រាំ បាននិយាយថា៖ «ខ្ញុំគិតថាគាត់កំពុងបំផ្លាញរុស្ស៊ីដោយមិនធ្វើកិច្ចព្រមព្រៀង» ខណៈ​រុស្ស៊ីកំពុងមានបញ្ហាធ្ងន់ធ្ងរ៕

ដោយ៖ ឈាង

ចុចអាន៖ ចូលកាន់តំណែងភ្លាម លោក ត្រាំ ប្រកាសអាសន្ននៅព្រំដែនជាប់ ម៉ិកស៊ិក ភ្លែត