ព័ត៌មានអន្ដរជាតិ

Pelosi ថា ត្រាំ មើលស្រាលប្រព័ន្ធយុត្តិធម៌ ដោយការលើកលែងអ្នកទោសបង្កហិង្សា

បានផុស

៣ ខែ មុន

នៅ

ថ្ងៃអង្គារ ២១ មករា ២០២៥

ដោយ

គ្រាន់តែប្រធានាធិបតី លោក ដូណាល់ ត្រាំ ចុះហត្ថលេខាលើបទបញ្ជាប្រតិបត្តិ (Executive Order) លើកលែងអ្នកទោសប្រព្រឹត្តអំពើហិង្សាក្នុងព្រឹត្តិការណ៍ហិង្សានៅវិមានរដ្ឋសភាកាលជាង៤ឆ្នាំ អតីតប្រធានសភាអាមេរិកក្នុងកាលនោះ ចេញមុខបរិហារត្រាំភ្លាមៗថា «មើលស្រាលប្រព័ន្ធច្បាប់»។

លោកស្រី ណាន់ស៊ី ប៉េឡូស៊ី (Nancy Pelosi) អតីតប្រធានសភាជាន់ទាបសហរដ្ឋអាមេរិក (កណ្តាល)។ Reuter

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC លោកស្រី ណាន់ស៊ី ប៉េឡូស៊ី (Nancy Pelosi) អតីតប្រធានសភាជាន់ទាបសហរដ្ឋអាមេរិក ដែលនៅពេលមានកុប្បកម្មថ្ងៃទី៦មករា២០២១ ជាប្រធានសភាមកពីគណបក្សប្រជាធិបតេយ្យ បានប្រតិកម្មនឹងការលើកលែងទោសរបស់ប្រធានាធិបតី ដូណាល់ ត្រាំ (Donald Trump) សម្រាប់អ្នកពាក់ព័ន្ធ។

ដោយបង្ហោះនៅលើប្រព័ន្ធផ្សព្វផ្សាយសង្គម លោកស្រី ប៉េឡូស៊ី និយាយថា ទង្វើនេះគឺជា៖«ការប្រមាថដ៏គួរឱ្យស្អប់ខ្ពើមចំពោះប្រព័ន្ធយុត្តិធម៌របស់យើង និងវីរបុរសដែលបានទទួលរងនូវស្លាកស្នាមរាងកាយ និងរបួសផ្លូវចិត្ត ខណៈដែលពួកគេបានការពាររដ្ឋសភា និងរដ្ឋធម្មនុញ្ញ»។

អតីតប្រធានសភាអាមេរិករូបនវ បានលើកឡើងថា វាជារឿងគួរឱ្យអាម៉ាស់ដែល ប្រធានាធិបតី ត្រាំ បានធ្វើ«ការបោះបង់ចោល និងការក្បត់របស់មន្រ្តីប៉ូលីស ដែលដាក់ជីវិតរបស់ពួកគេនៅលើបន្ទាត់គ្រោះថ្នាក់» មួយនៃអាទិភាពកំពូលរបស់ពួកគេ។

សេចក្តីរាយការណ៍របស់ទីភ្នាក់ងារបណ្តាញសារព័ត៌មាន BBC ដែលតាមដានយ៉ាងដិតដល់ពិធីស្បថចូលកាន់អំណាចរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានរាយការណ៍ថា លោកដូណាល់ត្រាំ បានចុះហត្ថលេខាលើបទបញ្ជាប្រតិបត្តិ ឬហៅថា អធិបញ្ជា (Executive Order) ១ក្នុងចំណោមអធិបញ្ជារាប់រយដែលបានចុះហត្ថលេខាក្នុងថ្ងៃដំបូង ដោយលោកលែងទោសដល់អ្នកទោសជិត១៦០០នាក់។

ការប្រើប្រាស់អំពើហិង្សានៅវិមានរដ្ឋសភាកាលថ្ងៃទី៦ខែមករាឆ្នាំ២០២១ បានកើតឡើងនៅពេលដែលលោកចាញ់ឆ្នោតនាពេលនោះ ប៉ុន្តែបានបដិសេធការទទួលយកលទ្ធផលចាញ់ឆ្នោត ព្រមទាំងបានចោទថា សន្លឹកឆ្នោតត្រូវបានគេលួច និងបន្លំ៕

ដោយ រ៉ាន់ រើយ