មួយថ្ងៃផឹកភេសជ្ជៈប៉ូវកម្លាំង៣ទៅ៤ដប បុរសចិនវ័យ៣០ឆ្នាំ កើតជំងឺរលាកសន្លាក់ហ្គោដធ្ងន់ធ្ងរ

យោងតាមរបាយការណ៍ពី Sina របស់ប្រទេសចិនកាលពីថ្ងៃទី ០៨ ខែមករា បុរសកើតក្នុងឆ្នាំ ១៩៩៥ ម្នាក់បានចែករំលែកវីដេអូអំពីបទពិសោធន៍របស់គាត់ជាមួយនឹងជំងឺដែលបណ្តាលឲ្យដៃរបស់គាត់មានរូបរាងដូចជាខ្ញីដែលចាស់ដោយសារតែទម្លាប់ផឹកផឹកភេសជ្ជៈប៉ូវកម្លាំងនិងគ្រឿងកំប៉ុងផ្អែមៗ ៣ទៅ៤ដប ក្នុងមួយថ្ងៃ។

បុរសចិនរូបនេះមានវ័យត្រឹមតែ៣០ឆ្នាំប៉ុណ្ណោះ ហើយបានកើតជំជំងឺរលាកសន្លាក់អស់រយៈពេលជាង១៥ឆ្នាំ ចាប់​តាំង​ពី​ឆ្នាំ ២០០៩ គាត់​បាន​ចាប់​ផ្តើម​មាន​ការ​ឈឺ​ចាប់​ខុស​ប្រក្រតី​នៅ​កជើង ក្រោយមកត្រូវបានគេធ្វើរោគវិនិច្ឆ័យថាមានជំងឺរលាកសន្លាក់ហ្គោដ។

ទោះ​ជា​យ៉ាង​ណា​ នៅ​ពេល​នោះ លោក​និង​ក្រុម​គ្រួសារ​មិន​បាន​យក​ចិត្ត​ទុក​ដាក់​ចំពោះ​បញ្ហា​នេះ​ទេ ហើយមិនបានផ្តល់សារៈសំខាន់ច្រើនចំពោះការព្យាបាលនោះទេ។ ជំនួសឲ្យការទៅជួបគ្រូពេទ្យ គាត់​បាន​ជ្រើសរើស​យក​ថ្នាំ​បំបាត់​ការឈឺចាប់ ហើយ​ទៅ​ចាក់​ថ្នាំ​នៅ​គ្លីនិក​ជំនួស​វិញ។​ ជាលទ្ធផល រោគសញ្ញាកាន់តែអាក្រក់ទៅៗ។

ជាងនេះទៅទៀត ទោះជាខ្លួនមានជំងឺរលាកសន្លាក់ហ្គោដក្ដី ប៉ុន្តែគាត់នៅតែ​ទម្លាប់​ញ៉ាំ​ទឹកផ្អែមៗដដែល។ ជាធម្មតាគាត់ផឹកគ្រឿងកំប៉ុង ៣-ទៅ៤ ដប និងភេសជ្ជៈប៉ូវកម្លាំងច្រើនៗក្នុងមួយថ្ងៃ ហើយគាត់ក៏មានទំនោរចូលគេងយឺត និងតែងតែទិញអាហារកែច្នៃ។

បន្ទាប់មកនៅឆ្នាំ ២០១៨ កដៃរបស់គាត់បានចាប់ផ្តើមខូចទ្រង់ទ្រាយមានរូបរាងដូចជាខ្ញីចាស់ ហើយនៅពេលទៅជួបគ្រូពេទ្យ គាត់បានរកឃើញថាស្ថានភាពរបស់គាត់កាន់តែអាក្រក់ទៅៗដោយសារទម្លាប់នៃការញ៉ាំមិនល្អ។ នេះបណ្តាលឲ្យមានកម្រិតខ្ពស់នៃអាស៊ីតអ៊ុយរិកនៅក្នុងឈាមនិងកក់កុញនៅក្នុងសន្លាក់បណ្តាលឲ្យឈឺចាប់ និងរលាក។ ជារឿយៗវាកើតឡើងនៅកជើង ម្រាមដៃ និងជង្គង់ រួមជាមួយនឹងការហើម និងក្រហមនៃសន្លាក់ ដែលធ្វើឲ្យអ្នកជំងឺមិនអាចដើរបាន។

វេជ្ជបណ្ឌិតដែលព្យាបាលគាត់បាន​ពន្យល់​ថា គ្រឿងកំប៉ុង និងភេសជ្ជៈប៉ូវកម្លាំង ច្រើនតែមានផ្ទុកសារធាតុ fructose ដែលតាមការស្រាវជ្រាវជុំវិញពិភពលោកបានរកឃើញ។ ការទទួលទានជាប្រចាំនូវភេសជ្ជៈដែលមានបរិមាណ fructose ខ្ពស់ អាចបង្កើនកម្រិតអាស៊ីតអ៊ុយរិកក្នុងឈាម និងធ្វើឲ្យជំងឺរលាកសន្លាក់កាន់តែធ្ងន់ធ្ងរ រួមជាមួយនឹងការកាត់បន្ថយប្រសិទ្ធភាពនៃការព្យាបាលជំងឺ។

នៅក្នុងឃ្លិបវីដេអូចុងក្រោយ បុរសវ័យ៣០ឆ្នាំរូបនេះ​បាន​សម្ដែង​ការ​សោកស្ដាយ​ចំពោះ​ការ​ផឹក​ភេសជ្ជៈ​មាន​ជាតិ​ស្ករ​ ដូច​ជា​សូដា និង​ភេសជ្ជៈ​ប៉ូវ​កម្លាំង​ជា​យូរ​មក​ហើយ។ គាត់ក៏សង្ឃឹមថា បទពិសោធន៍របស់ខ្លួននឹងអាចរំលឹកដល់មនុស្សគ្រប់គ្នា។ ជាពិសេសអ្នកដែលមានជំងឺរ៉ាំរ៉ៃដូចជាជំងឺរលាកសន្លាក់ហ្គោដដូចគាត់។ ភេសជ្ជៈ​ទាំងពីរ​ប្រភេទ​នេះ​គួរតែ​ចៀសវាង​ដើម្បី​កាត់បន្ថយ​ហានិភ័យ​នៃ​ជំងឺ​កាន់តែ​ធ្ងន់ធ្ងរ​លើសមុន៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ផេនដា Fu Bao ធ្លាប់ឆក់យកបេះដូងប្រជាជនកូរ៉េ ពេលនេះសុខភាពទ្រុឌទ្រោម ក្រោយទៅដល់ចិន