ប៉ាណាម៉ា ប្តឹងទៅ UN រឿងលោក ត្រាំ គំរាមគ្រប់គ្រងព្រែកជីក

ប្រទេសបាណាម៉ា បានប្តឹងទៅអង្គការសហប្រជាជាតិហើយ ជុំវិញការគំរាមរបស់ប្រធានាធិបតីអាមេរិក លោក ដូណាល់ ត្រាំ ចង់គ្រប់គ្រងព្រែកជីក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងលិខិតផ្ញើទៅកាន់ប្រមុខ UN, Antonio Guterres, កាលពីថ្ងៃអង្គារទី២១ខែមករាឆ្នាំ២០២៥, ប្រេសិតប៉ាណាម៉ា Eloy Alfaro de Alba បានកត់សម្គាល់ថា ធម្មនុញ្ញ UN បានហាមឃាត់រដ្ឋជាសមាជិកមិនឲ្យគំរាមកំហែង ឬប្រើប្រាស់កម្លាំងប្រឆាំងបូរណភាពទឹកដី ឬឯករាជ្យភាពនយោបាយនៃរដ្ឋមួយផ្សេងទៀតដាច់ខាត។

ទន្ទឹមនោះដែរ លោក​បាន​ស្នើ​ឲ្យ​អគ្គលេខាធិការ Guterres ជួយផ្សព្វផ្សាយ​លិខិត​នេះ ​ទៅ​សមាជិក​ទាំង ១៥ នៃ​ក្រុមប្រឹក្សា​សន្តិសុខ UN ផង ប៉ុន្តែ​មិនស្នើឲ្យរៀបចំកិច្ចប្រជុំ​ណាមួយទេ។

រម្លឹកទៅសុន្ទរកថាចូលកាន់តំណែងជាប្រធានាធីបតីអាមេរិកទី៤៧ កាលពីថ្ងៃចន្ទ, លោក ត្រាំ បានបង្ហាញក្តីបារម្ភជាថ្មីថា ប្រទេសចិនកំពុងប្រតិបត្តិការព្រែកជីកយ៉ាងរំភើយ តាមរយៈការបង្កើនវត្តមានក្រុមហ៊ុន នៅជុំវិញផ្លូវទឹកដែលសហរដ្ឋអាមេរិកបានប្រគល់ឲ្យនៅចុងឆ្នាំ១៩៩៩។ លោកព្រមានថា «យើងមិនមែនឲ្យវាទៅចិនទេ យើងឲ្យទៅប៉ាណាម៉ា ហើយយើងនឹងយកមកវិញ»។

សូមបញ្ជាក់ថា ព្រែកជីកប៉ាណាម៉ាត្រូវបានសហរដ្ឋ​អាមេរិក​​សាងសង់​ភាគច្រើននិងគ្រប់គ្រង​ទឹកដី​ជុំវិញ​នោះ ​អស់រយៈពេល​ជាច្រើន​ទសវត្សរ៍។ វាមានប្រវែង៨២គីឡូម៉ែត្រ គឺជាផ្លូវទឹកដ៏សំខាន់ដែលតភ្ជាប់មហាសមុទ្រប៉ាស៊ីហ្វិកជាមួយមហាសមុទ្រអាត្លង់ទិក។

វាមានលក្ខណៈសម្បត្តិ កាត់បន្ថយពេលវេលាធ្វើដំណើររវាងតំបន់ទាំងពីរ និងជួយសម្រួលឲ្យកប៉ាល់ មិនបាច់ធ្វើដំណើរវាងទៅចុងភាគខាងត្បូងនៃតំបន់អាមេរិកខាងត្បូងឡើយ។ ប្រហែល ៥% នៃចរាចរណ៍ផ្លូវសមុទ្រពិភពលោក គឺឆ្លងកាត់ព្រែកជីកនេះជារៀងរាល់ឆ្នាំ៕

អត្ថបទ៖ សុខ សុវណ្ណ

ចុចអាន៖ ត្រាំ បញ្ជាឲ្យសមត្ថកិច្ចអាមេរិក ចាប់ខ្លួនជនអន្តោប្រវេសន៍ខុសច្បាប់ នៅតាមសាលារៀន និងព្រះវិហារ