វៀតណាម អញ្ជើញរដ្ឋមន្ត្រីការបរទេសអាមេរិក មកបំពេញទស្សនកិច្ច ដើម្បីពង្រឹងទំនាក់ទំនង

ប្រទេសវៀតណាម បានផ្ញើសារអបអរសាទរទៅកាន់លោក Marco Rubio ដែលត្រូវបានតែងតាំងឲ្យកាន់តំណែងជារដ្ឋមន្ត្រីការបរទេសថ្មី របស់សហរដ្ឋអាមេរិក ហើយបានអញ្ជើញឲ្យមកបំពេញទស្សនកិច្ចនៅប្រទេសខ្លួន ដើម្បីរឹតចំណងទាក់ទងឲ្យកាន់តែស្អិតរមួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លិខិតអញ្ជើញនេះគឺផ្ញើដោយឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាម លោក Bui Thanh Son ដើម្បីឲ្យលោក Rubio មកបំពេញទស្សនកិច្ចក្នុងឆ្នាំនេះ ពោលគឺចំខួប៣០ឆ្នាំនៃទំនាក់ទំនងការទូតអាមេរិក-វៀតណាម។

លោក Son បានសង្កត់ធ្ងន់លើការទទួលស្គាល់របស់វៀតណាមចំពោះសហរដ្ឋអាមេរិក ថាជាដៃគូដ៏សំខាន់បំផុតមួយ ហើយលោកបានបង្ហាញទំនុកចិត្តថា ភាពជាដៃគូយូរអង្វែងដែលបានកសាងឡើងក្នុងរយៈពេលបីទសវត្សរ៍កន្លងមកនេះ នឹងបន្តរីកចម្រើន ជំរុញទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-អាមេរិក។

ក្នុងនោះដែរ លោកបានលើកឡើងពីសារៈសំខាន់នៃកិច្ចសហប្រតិបត្តិការបន្ថែមទៀត ដើម្បីបម្រើដល់ផលប្រយោជន៍គ្នាទៅវិញទៅមកនិងរួមចំណែកដល់សន្តិភាព ស្ថិរភាព និងការអភិវឌ្ឍទាំងក្នុងតំបន់និងក្រៅតំបន់។

សូមបញ្ជាក់ថា លោក Rubio ដែលមានដើមកំណើតចេញពីគ្រួសារជាជនភៀសខ្លួនគុយបា ត្រូវបានព្រឹទ្ធសភាអាមេរិក អនុម័តតែងតាំងជារដ្ឋមន្ត្រីការបរទេសក្នុងអាណត្តិលោក ត្រាំ ដោយសំឡេង ៩៩-០។ លោកកើតនៅក្នុងទីក្រុង Miami នៃរដ្ឋ Florida ហើយបានបញ្ចប់ការសិក្សាដោយ ទទួលបានសញ្ញាបត្រវិទ្យាសាស្ត្រនយោបាយមកពីសាកលវិទ្យាល័យ Florida ក្នុងឆ្នាំ១៩៩៣។

លោកតំណាងឲ្យរដ្ឋផ្លរីដានៅក្នុងព្រឹទ្ធសភាចាប់តាំងពីឆ្នាំ ២០១១មក ហើយត្រូវគេស្គាល់ថា ជា​​អ្នក​ជំនាញ​លើបញ្ហាចិននិងអ៊ីរ៉ង់ ដែលជាតំបន់អាទិភាពសម្រាប់រដ្ឋបាលអាណត្តិទីពីររបស់លោក ត្រាំ​។

មានពេលមួយ លោក Rubio ក៏ត្រូវបានគេមើលឃើញថា ជាបេក្ខភាពស័ក្តិសមបំផុតក្នុងការធ្វើជាមិត្តរួមដំណែងរបស់លោក​ដូណាល់ ត្រាំ ផងដែរ មុនពេល​បេក្ខភាព​អនុប្រធានាធិបតី JD Vance ត្រូវបានជ្រើសរើសសម្រាប់តួនាទីនេះ៕

អត្ថបទ៖ សុខ សុវណ្ណ

ចុចអាន៖ ​លោក ត្រាំ ទំនង​​តែង​តាំង​ Marco Rubio ដែល​ធ្លាប់​​ប្រជែង​​ជាមួយ​ខ្លួន​ជារដ្ឋមន្ត្រី​បរទេស​​​​