បុរសម្នាក់បើកឡាន Hummer បំណងទៅបាញ់ប្រហារនៅការិយាល័យរាប់សន្លឹកឆ្នោតក្នុងរដ្ឋ Pennsylvania – Kampuchea Thmey Daily
Connect with us

ព័ត៌មានអន្ដរជាតិ

បុរសម្នាក់បើកឡាន Hummer បំណងទៅបាញ់ប្រហារនៅការិយាល័យរាប់សន្លឹកឆ្នោតក្នុងរដ្ឋ Pennsylvania

Published

on

មនុស្សម្នាក់ត្រូវបានចាប់ខ្លួនបន្ទាប់ពីប៉ូលិសរកឃើញថា គាត់មានផែនការទៅវាយប្រហារការិយាល័យរាប់សន្លឹកឆ្នោតនៅក្នុងទីក្រុង Philadelphia។

ប្រព័ន្ធផ្សព្វផ្សាយអាមេរិករាយការណ៍ថា ប៉ូលិសកំពុងតែស៊ើបអង្កេតផែនការបាញ់ប្រហារនៅមជ្ឈមណ្ឌលសន្និបាត Pennsylvania នៅក្នុងទីក្រុងធំបំផុតរបស់រដ្ឋនេះ។

ប៉ូលិសទទួលបានព័ត៌មានថា ក្រុមមួយឬអាចជាគ្រួសារបានបើកឡាន Hummer ពីរដ្ឋ Virginia ទៅវាយប្រហារមណ្ឌលបោះឆ្នោតដែលនៅទីនោះ សន្លឹកឆ្នោតកំពុងត្រូវបានគេរាប់ហើយអាចជំរុញសំឡេងឆ្នោតដល់លោក Joe Biden។

ប៉ូលិសនិយាយថា ពួកគេក៏បានរកឃើញអាវុធមួយដើមនៅក្នុងឡាន Hummer នោះផងដែរ។

ទោះបីជាយ៉ាងណាក៏ដោយ មិនមានរបាយការណ៍អំពីអ្នករងរបួសទេ។

មិនមានការចង្អុលបង្ហាញណាមួយអំពីរឿងនេះទេប៉ុន្តែគេដឹងថា លោក Donald Trump និងយុទ្ធនាការរបស់គាត់កំពុងព្យាយាមរារាំងដល់ដំណើរការរាប់សន្លឹកឆ្នោតនៅក្នុងរដ្ឋ Pennsylvania ស្របពេលដែលសំឡេងឆ្នោតកំពុងផ្អៀងទៅលោក Joe Biden។

សន្តិសុខត្រូវបានរឹតបន្តឹងនៅជុំវិញមជ្ឈមណ្ឌលសន្និបាតបន្ទាប់ពីការចាប់ខ្លួននេះដែលកើតឡើងកាលពីល្ងាចថ្ងៃព្រហស្បតិ៍ (ព្រឹកថ្ងៃសុក្រនៅកម្ពុជា)។

មកទល់ពេលនេះសន្លឹកឆ្នោតចំនួន៨៤ភាគរយនៅក្នុងទីក្រុង Philadelphia ត្រូវបានរាប់រួចទៅហើយ។

គួរបញ្ជាក់ថា រដ្ឋ Pennsylvania មានតំណាងអ្នកបោះឆ្នោតចំនួន២០ហើយប្រសិនបើវាបានទៅលើលោក Joe Biden នោះគាត់នឹងទទួលបានតំណាងអ្នកបោះឆ្នោត២៧០តាមតម្រូវការដើម្បីក្លាយជាប្រធានាធិបតីបន្ទាប់របស់សហរដ្ឋអាមេរិក៕

ប្រែសម្រួលដោយ៖ Vann Vann

ប្រភព៖ Mirror

ចុច Like Facebook កម្ពុជាថ្មី

ព័ត៌មានពេញនិយម