ចំនួនអ្នកស្លាប់ដោយសារទឹកជំនន់និងបំណាក់ដីនៅឥណ្ឌូណេស៊ីកើនដល់២១នាក់

ក្រុមអ្នកជួយសង្គ្រោះឥណ្ឌូណេស៊ីបានរកឃើញសាកសពបួននាក់បន្ថែមទៀត ដែលបានបាត់ខ្លួន​ក្នុង​ហេតុការណ៍​​​ទឹកជំនន់រហ័ស​​និងបំណាក់ដីនៅលើកោះជ្វា​​ដ៏សំខាន់របស់ឥណ្ឌូណេស៊ី នាំឱ្យចំនួនអ្នកស្លាប់កើនឡើងដល់​២១នាក់ ។ យោង​ការ​ផ្សាយរបស់ទីភ្នាក់ងារព័ត៌មាន​ AP នៅថ្ងៃទី២៣ខែមករានេះ។

បន្ទាប់ពីទឹកទន្លេជន់លិចបានហូរកាត់ភូមិចំនួន៩​ ក្នុងខេត្ត Pekalongan នៃតំបន់កណ្ដាលខេត្តជ្វា និង បំណាក់ដីបានធ្លាក់​ទៅលើភូមិតាមភ្នំ បន្ទាប់ពីភ្លៀងធ្លាក់ខ្លាំងកាលពីថ្ងៃចន្ទ។ ទឹកជំនន់នេះបានបង្កឱ្យមានបំណាក់ដី​​​សង្កត់​លើ​​ផ្ទះពីរខ្នង និង​ហាងកាហ្វេមួយកន្លែងនៅក្នុងតំបន់រមណីយដ្ឋាន Petungkriyono។

សរុបគ្រោះ​មហន្តរាយ​ទាំង​អស់​​បាន​បំផ្លាញ​ផ្ទះ​ចំនួន​២៥​ខ្នង ទំនប់​ទឹកមួយ និង​ស្ពាន​សំខាន់ៗ​ចំនួន​បី​ដែល​តភ្ជាប់​ភូមិ​ក្នុង​ខេត្ត Pekalongan។ យ៉ាងហោចណាស់មនុស្ស​១៣នាក់​បានរងរបួស និងជិត ៣០០​នាក់ត្រូវបានបង្ខំឱ្យភៀសខ្លួនទៅកាន់​ជម្រកបណ្តោះអាសន្នរបស់រដ្ឋាភិបាល។

ប្រតិបត្តិការស្វែងរក​និងជួយសង្គ្រោះត្រូវបានរារាំងដោយអាកាសធាតុអាក្រក់អាក្រក់ ការរអិលបាក់ដី និងដីរដិបរដុបត្រូវភ្លៀងធ្លាក់ខ្លាំង និងអ័ព្ទក្រាស់ ដែលធ្វើឲ្យតំបន់បំផ្លិចបំផ្លាញនៅតាមដងទន្លេមានគ្រោះថ្នាក់ដល់អ្នកជួយសង្គ្រោះ។

បន្ទាប់ពីបន្តប្រតិបត្តិការស្វែងរកឡើងវិញ បុគ្គលិកជួយសង្គ្រោះជាច្រើននាក់បានស្រង់សាកសពបីនាក់ដែលប្រឡាក់ប្រឡូក​​ដោយភក់ រួមទាំងទារកអាយុ៥​ខែផងដែរ ពីតំបន់ Petungkriyono។ សាកសព​ម្នាក់​ទៀត​ត្រូវ​បាន​ទាញ​ចេញ​ពី​ក្រោម​ស្ពាន​បាក់​ក្បែរ​ទន្លេ​ក្នុង​ភូមិ Kasimpar។ មកដល់ពេលនេះក្រុម​អ្នក​ជួយ​សង្គ្រោះ​កំពុង​បន្ត​ស្វែង​រក​មនុស្ស​ប្រាំ​នាក់ទៀត​ដែល​នៅតែបាត់​ខ្លួន។

គួរបញ្ជាក់ថា ភ្លៀងធ្លាក់ខ្លាំងតាមរដូវចាប់ពីខែតុលាដល់ខែមីនា ជារឿយៗបណ្តាលឱ្យមានទឹកជំនន់ និងបំណាក់ដីនៅក្នុងប្រទេសឥណ្ឌូណេស៊ី ដែលជាប្រជុំកោះចំនួន ១៧០០០ និង​មានប្រជាជនរាប់លាននាក់រស់នៅក្នុងតំបន់ភ្នំ ឬនៅជិតតំបន់ទំនាបលិចទឹកដែលមានជីជាតិ។

បំណាក់ដី ថ្ម និង​​កម្ទេច​​​​កម្ទី​​អាចកើតឡើងភ្លាមៗ ឬយឺតៗ ហើយអាចបណ្តាលមកពីភ្លៀង សំណឹក ឬការផ្លាស់ប្តូរស្រទាប់​ដីជម្រាល ខណៈភ្លៀង​បន្ថែម​ទម្ងន់​ដល់​ជម្រាល ដែល​ធ្វើ​ឱ្យ​វា​កាន់​តែ​មិន​ស្ថិតស្ថេរ។ លើសពីនេះភាពចោត ឬសំណឹកនៃជម្រាលអាចបណ្តាលឱ្យមានការបាក់ដីកាន់តែច្រើន។

ពួកវាអាចបណ្តាលមកពីចលនារំញ័រពីការរញ្ជួយដី ការជីកយករ៉ែ ឬការ​ធ្វើ​ចរាចរ ខណៈការ​សិក្សា​បាន​រក​ឃើញ​ថា បំណាក់ដី​​អាចកើតឡើងកាន់តែ​ញឹក​ញាប់ ដោសារការ​ប្រែប្រួល​អាកាស​ធាតុ​បង្កើន​ភ្លៀង​ធ្លាក់៕

អត្ថបទ៖ ប៊ុន សុភាព