កូរ៉េខាងជើង ​ប្រហារជីវិត​អ្នកស្រាវជ្រាវ​ជាន់ខ្ពស់​ ព្រោះ​គម្រោង​​ថាមពលនុយក្លេអ៊ែរ​​បរាជ័យ

អាជ្ញាធរកូរ៉េខាងជើង បានប្រហារជីវិតអ្នកស្រាវជ្រាវជាន់ខ្ពស់​២​នាក់ និងដាក់គុកអ្នកស្រាវជ្រាវ​៤​នាក់ផ្សេង​ទៀត ដោយសារ​តែ​បរាជ័យ​ក្នុង​គម្រោង​សាងសង់រោងចក្រថាមពលនុយក្លេអ៊ែររបស់​ក្រុង​ព្យុងយ៉ាង។ នេះបើយោងតាមរបាយការណ៍ពី Daily NK នៅ​ថ្ងៃ​ទី​២៣​ខែ​មករា​ឆ្នាំ​២០២៥។

ការប្រហារជីវិត បាន​ធ្វើ​ឡើង​នៅថ្ងៃទី​១០​​ខែមករានៅក្នុងសង្កាត់ Mangyongdae នៃទីក្រុងព្យុងយ៉ាង ដែលជាកន្លែងដែលអ្នកស្រាវជ្រាវជាន់ខ្ពស់​២​នាក់ត្រូវបានប្រហារជីវិតនៅចំពោះមុខ​បុគ្គលិក​ទាំង​អស់ ខណៈ​អ្នកស្រាវជ្រាវ៤​នាក់​ផ្សេង​ទៀត​ត្រូវបានបញ្ជូនទៅ​មន្ទីរ​ឃុំឃាំង​អ្នក​ទោស​នយោបាយ។

អ្នកស្រាវជ្រាវជាន់ខ្ពស់ដែលត្រូវបានប្រហារជីវិត គឺជាមន្ត្រីមកពីផ្នែកបច្ចេកវិទ្យានៃក្រសួងថាមពលអាតូមិក ដែលទទួលខុសត្រូវក្នុងការអភិវឌ្ឍការរចនា និងបច្ចេកវិទ្យាប្រតិបត្តិការរបស់ម៉ាស៊ីនរ៉េអាក់ទ័រ។ ពួកគេ​ត្រូវ​បាន​គេ​រាយការណ៍​ថា​​មិន​បាន​បំពេញ​តាម​គោលដៅ​បច្ចេកទេស​ដែល​កំណត់​ដោយ​គណៈកម្មាធិការ​កណ្តាល។

ការ​ដាក់​ទោស​នេះ បាន​កើត​ឡើង​បន្ទាប់​ពី​កិច្ចប្រជុំពេញអង្គលើកទី១១​ខែធ្នូនៃគណៈកម្មាធិការមជ្ឈិមទី​៨​​របស់​គណបក្សពលករកូរ៉េ ដែលក្រុម​មន្ត្រីបានថ្កោលទោសអ្នកស្រាវជ្រាវពីបទ «ធ្វេសប្រហែសដោយចេតនា» និង «ការបរាជ័យ»។ ពួកគេត្រូវបានគេរិះគន់ជាពិសេសចំពោះការអះអាងថា កិច្ចការមួយចំនួនគឺ «ពិបាកពេកក្នុងការសម្រេចបានតាមសមត្ថភាព» ដែលជាជំហរមួយដែលត្រូវបានចាត់ទុកថាមិនអាចទទួលយកបាន ដោយសារការសាងសង់រោងចក្រថាមពលនុយក្លេអ៊ែរគឺជារឿង​សំខាន់ក្នុងការដោះស្រាយបញ្ហាកង្វះខាតអគ្គិសនីរបស់ប្រទេសកូរ៉េខាងជើង។

ខុទ្ទកាល័យ ការិយាល័យរដ្ឋអាជ្ញាសាធារណៈកណ្តាល និងក្រសួងសន្តិសុខសង្គម​​របស់​កូរ៉េ​ខាង​ជើង បានដាក់ឈ្មោះ​ក្រុ​មអ្នក​ស្រាវជ្រាវ​ទាំង​នោះ​ថា​ជា «បុគ្គល​ប្រឆាំង» ដែលបាន «ធ្វើផ្ទុយនឹងគោលការណ៍ណែនាំរបស់គណបក្សសម្រាប់ការកសាងសង្គមនិយម»។

ទោះជាយ៉ាងណាក៏ដោយ អ្នកស្រាវជ្រាវផ្សេងទៀតនៅក្នុងវិស័យនេះ បានផ្តល់យោបល់ថា ការដាក់ទោស​បែប​នេះ​គឺហួសហេតុ ដោយកត់សម្គាល់ថា ការបរាជ័យកើតចេញពីការខ្វះខាតធនធាន និងបច្ចេកទេស ជាជាងការខ្វះការប្តេជ្ញាចិត្ត៕

ដោយ៖ ឈាង