ព័ត៌មានអន្ដរជាតិ

លោក ម៉ាក រូតេ៖ ណាតូនឹងអាប់ឱន បើអ៊ុយក្រែន ចាញ់រុស្ស៊ី

បានផុស

២ សប្តាហ៍ មុន

នៅ

ថ្ងៃសុក្រ ២៤ មករា ២០២៥

ដោយ

ថ្លែងនៅខាងក្រៅវេទិកាសេដ្ឋកិច្ចពិភពលោកក្នុងទីក្រុងដាវ៉ូស នៃប្រទេសស្វីស កាលពីថ្ងៃព្រហស្បតិ៍ទី២៣ខែមករាឆ្នាំ២០២៥ ប្រមុខអង្គការណាតូ លោក ម៉ាក រូតេ (Mark Rutte) ព្រមានថា យើងមិនអាចបណ្តោយឲ្យរុស្ស៊ីឈ្នះសង្គ្រាមលើអ៊ុយក្រែនបានទេ បើមិនដូច្នោះ សម្ព័ន្ធភាពយោធាមួយនេះនឹងអាប់ឱន ហើយត្រូវចាយលុយច្រើនណាស់ ដើម្បីស្តារកម្លាំងនិងទំនុកចិត្តមកវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក រូតេ និយាយថា «បើអ៊ុយក្រែនចាញ់ យើងនឹងអាប់ឱន ហើយយើងត្រូវការស្តារទំនុកចិត្តក្នុងសម្ព័ន្ធភាពនេះឡើងវិញ ជាមួយនឹងការចំណាយលុយយ៉ាងច្រើន។ វាមិនមែនត្រឹមលាន ឬពាន់លានទេ គឺវានឹងលោតដល់ខ្តង់ទ្រីលានឯណោះ ហើយវានឹងអស់ច្រើនជាងទឹកប្រាក់ដែលយើងបានប្តេជ្ញាចិត្តថានឹងចំណាយ ដើម្បីជំរុញវិស័យការពារនាពេលបច្ចុប្បន្នទៅទៀត»។

ស្របពេលជាមួយគ្នានោះដែរ លោក រូតេ ព្រមានថា បណ្ដាប្រទេសជាសមាជិកអាចប្រឈមមុខនឹងបញ្ហាការពារខ្លួនក្នុងរយៈពេលពី ៤ទៅ៥ឆ្នាំខាងមុខ បើការចំណាយលើវិស័យការពារជាតិបច្ចុប្បន្ននៅតែកំណត់ត្រឹម ២% នៃ GDP ដដែល។

លោក Rutte បានលើកសរសើរលោក ត្រាំ កាលពីអាណត្តិដំបូងធ្វើជាប្រធានាធិបតីអាមេរិកនាឆ្នាំ២០១៧ ដែលបានធ្វើឲ្យកញ្ចប់ចំណាយរបស់សម្ព័ន្ធមិត្តណាតូមានការកើនឡើង ខណៈកន្លងមកអឺរ៉ុបផ្ដោតសំខាន់លើសេវាសង្គម និងប្រព័ន្ធសុខភាពខ្លាំងពេកជាងការចំណាយលើវិស័យការពារជាតិដ៏សំខាន់។

ប្រធានអង្គការណាតូក៏បានលើកឡើងពីការព្រួយបារម្ភយ៉ាងធ្ងន់ធ្ងរលើសមត្ថភាពផលិតកម្មឧស្សាហកម្មរបស់សម្ព័ន្ធមិត្តផងដែរ ដោយកត់សម្គាល់ថា ផលិតកម្មឧស្សាហកម្មរបស់ណាតូទាំងមូលក្នុងរយៈពេល១ឆ្នាំ បានត្រឹមស្មើអ្វីដែលរុស្ស៊ីផលិតក្នុងរយៈពេល៣ខែប៉ុណ្ណោះ។ លោកព្រមានថា អាមេរិកកំពុងប្រឈមមុខនឹងបញ្ហាស្រដៀងគ្នានេះ ដោយចិនបានវ៉ាសហរដ្ឋអាមេរិកក្នុងទិន្នផលឧស្សាហកម្មដល់ទៅ៦ដង៕

អត្ថបទ៖ សុវណ្ណ

ចុចអាន៖ មេណាតូ៖ បើសមាជិកនៅតែកំណត់ ២% លើវិស័យការពារ ណាតូនឹងមិនអាចការពារខ្លួនបានទេ