ព័ត៌មានអន្ដរជាតិ

ការស្រាវជ្រាវ៖ ជំងឺវង្វេងអាចជាប់ទាក់ទងនឹងការបំពុលបរិយាកាសតាំងពីកុមារភាព

បានផុស

១៧ វិនាទី មុន

នៅ

ថ្ងៃសុក្រ ២៤ មករា ២០២៥

ដោយ

អ្នកស្រាវជ្រាវនៅប្រទេសស្កុតលែ នបានរកឃើញគំរូនៅក្នុងទិន្នន័យសុខភាពដែលបង្ហាញថា ខ្យល់ពុលដែលកុមារដកដង្ហើមចូលអាចប៉ះពាល់ដល់ពួកគេបណ្ដាលឲ្យកើតជំងឺវង្វេងនៅពេលអនាគត។ នេះបើយោងតាមការចេញផ្សាយរបស់កាសែត The Guardian។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្រុយដំបូងដែលថាការបំពុលបរិយាកាសអាចប៉ះពាល់ដល់សុខភាពខួរក្បាលត្រូវបានរកឃើញប្រហែល ២០ ឆ្នាំមុន នៅពេលដែលអ្នកស្រាវជ្រាវបានរកឃើញការផ្លាស់ប្តូរខួរក្បាលនៅក្នុងសត្វឆ្កែចិញ្ចឹមនៅទីក្រុងម៉ិកស៊ិក ដែលបានរងផលប៉ះពាល់ពីខ្យល់ពុលយ៉ាងរ៉ាំរ៉ៃ។

នៅឆ្នាំ ២០២២ គណៈកម្មាធិការរដ្ឋាភិបាលចក្រភពអង់គ្លេសបានពិនិត្យឡើងវិញនូវការសិក្សាចំនួន ៦៩។ ពួកគេបានសន្និដ្ឋានថា វាទំនងជាថាការបំពុលបរិយាកាសបន្ថយល្បឿននៃការយល់ដឹងក្នុងជីវិតពេលអនាគត និងបង្កើនហានិភ័យនៃជំងឺវង្វេង។ ពួកគេក៏បានរកឃើញភស្តុតាងមួយចំនួននៃការប្រែប្រួលក្នុងខួរក្បាលរបស់កុមារដែលប៉ះពាល់នឹងការបំពុលបរិយាកាសផងដែរ។

លោក Otto-Emil Jutila មកពីសាកលវិទ្យាល័យ Edinburgh និងជាអ្នកនិពន្ធដំបូងនៃការស្រាវជ្រាវថ្មីបាននិយាយថា៖ «ខណៈពេលដែលការបំពុលបរិយាកាសជាកត្តាហានិភ័យជំងឺវង្វេងនៅអាយុចុងក្រោយឬពេលចាស់ទៅ មនុស្សមិនសូវដឹងអំពីផលប៉ះពាល់នៃការបំពុលខ្យល់នៅទូទាំងតំបន់ជុំវិញខ្លួនទេ»។

ការស្រាវជ្រាវនេះបាន ចាប់ផ្តើមគម្រោងតាមដានយុវជន ក្នុងឆ្នាំ ២០០៤ មានមនុស្សជាង ១០០០នាក់ត្រូវបានជ្រើសរើសសម្រាប់ការសិក្សាអំពីខួរក្បាល និងអាយុ។ ពួកគេទាំងអស់កើតនៅឆ្នាំ ១៩៣៦ ហើយចាប់ពីអាយុ ៧០ ឆ្នាំពួកគេត្រូវបានគេវាយតម្លៃរៀងរាល់ ៣ ឆ្នាំម្តង។ មនុស្សទីមួយត្រូវបានគេធ្វើរោគវិនិច្ឆ័យថាមានជំងឺវង្វេងក្នុងឆ្នាំ ២០១១ ហើយនៅឆ្នាំ២០១៩មនុស្ស ១៧% បានកើតជំងឺវង្វេង ដែលប្រហែលម្នាក់ក្នុងចំណោម៦នាក់។

លទ្ធផលនេះបង្ហាញថា ការបំពុលបរិយាកាសក្នុងឆ្នាំ១៩៣៦ ត្រូវបានផ្សារភ្ជាប់ជាវិជ្ជមានជាមួយនឹងហានិភ័យនៃជំងឺវង្វេង រួមទាំងជំងឺភ្លេចភ្លាំងផងដែរ ខណៈអំឡុងពេលនោះចក្រភពអង់គ្លេសមានការបំពុលបរិកាសច្រើនពីការប្រើប្រាស់ធ្យូងថ្ម។

លោក Jutila បានបន្ថែមថា៖ «ចំណែកការប៉ះពាល់នឹងខ្យល់ពុលនៅពាក់កណ្តាលជីវិតកាន់តែខ្ពស់អាចត្រូវបានផ្សារភ្ជាប់ជាមួយនឹងការស្លាប់មុនអាយុ កើតជំងឺដូចជាជំងឺសរសៃឈាមបេះដូង និងផ្លូវដង្ហើម មុនពេលអាចវិវត្តទៅជាជំងឺវង្វេង»។

ការប៉ះពាល់នឹងការបំពុលបរិយាកាសគឺជាបញ្ហានៃជីវិតដែលមានផលប៉ះពាល់រយៈពេលវែងដល់សុខភាព។ ការសិក្សានេះបានពង្រឹងសារៈសំខាន់នៃការកាត់បន្ថយការបំពុលបរិយាកាសពេញមួយជីវិត ជាពិសេសក្នុងអំឡុងពេលដែលងាយរងគ្រោះ គឺមុនពេលសម្រាលកូន និងកុមារភាព។

ទោះបីជាមិនមានការសន្និដ្ឋានក៏ដោយ ការសិក្សាថ្មីបង្ហាញថា ការស្រាវជ្រាវលើសុខភាពរបស់មនុស្សវ័យចំណាស់ និងការបំពុលបរិយាកាសដែលពួកគេដកដង្ហើមកាលពីអតីតកាល អាចជួយការពារមនុស្សជំនាន់ក្រោយបាន។ ខ្យល់ដែលមានគុណភាពកាន់តែប្រសើរក៏អាចជួយមនុស្សក្នុងជីវិតក្រោយដែរ។ ការសិក្សានៅប្រទេសបារាំង អាមេរិក និងចិន ក៏បានរកឃើញដែរថា ការកាត់បន្ថយការបំពុលបរិយាកាសអាចកាត់បន្ថយចំនួនមនុស្សដែលកើតជំងឺវង្វេងបានយ៉ាងឆាប់រហ័ស៕