ត្រាំ បន្ទោសថា សង្គ្រាម រុស្ស៊ី-អ៊ុយក្រែន ផ្ទុះដោយសារ ហ្សេលេនស្គី 

ក្នុងបទសម្ភាសជាមួយ Fox News ចេញផ្សាយកាលពីថ្ងៃព្រហស្បតិ៍ទី២៣ខែមករាឆ្នាំ២០២៥ ប្រធានាធិបតីអាមេរិកលោក ដូណាល់ ត្រាំ បានស្តីបន្ទោសមេដឹកនាំអ៊ុយក្រែន វ្ល៉ាឌីមៀរ ហ្សេលេនស្គី ថា ជាអ្នកទទួលខុសត្រូវធ្វើឲ្យសង្គ្រាមជាមួយរុស្ស៊ី ផ្ទុះឡើង ហើយតាមពិតប្រមុខរដ្ឋាភិបាលទីក្រុងកៀវ ក៏អាចបញ្ចៀសជម្លោះនេះបានដែរ។

ថ្លែងប្រាប់ពិធីករ Sean Hannity, លោក ត្រាំ អះអាងថា «ខ្ញុំត្រូវនិយាយរឿងនេះ! លោកហ្សេលេនស្គី មានគ្រប់គ្រាន់ហើយ។ គាត់ក៏មិនគួរអនុញ្ញាតឲ្យរឿងនេះកើតឡើងដែរ។ អ្នកដឹងទេ គាត់មិនមែនជាទេវតាឡើយ។ គាត់​មិន​គួរ​​ឲ្យ​មាន​សង្គ្រាម​កើត​ឡើងសោះ​ គាត់កំពុងប្រយុទ្ធជាមួយអង្គភាព ដែលធំជាងគាត់»។

ទោះបីជាយ៉ាងណាក៏ដោយ ពាក់ព័ន្ធរឿងសង្គ្រាមនេះដែរ លោកត្រាំ បានប្រកាសក្នុងវេទិកាសេដ្ឋកិច្ចពិភពលោក ក្នុងទីក្រុងដាវ៉ូសនៃប្រទេសស្វីស ហើយថា លោកនឹងជួបជាមួយមេដឹកនាំរុស្ស៊ី វ្ល៉ាឌីមៀរ ពូទីន ក្នុងពេលឆាប់ៗនេះ ដើម្បីពិភាក្សាពន្លត់ភ្លើងសង្គ្រាមអ៊ុយក្រែន។ 

ថ្លែងតាមរយៈវីដេអូ «មេដឹកនាំសេតវិមាននិយាយថា មានរឿងជាច្រើននឹងកើតឡើងក្នុងនិងក្រៅអាមេរិក ប៉ុន្តែរឿងដ៏សំខាន់បំផុតមួយគឺថា ខ្ញុំនឹងជួបលោកពូទីន ឲ្យបានឆាប់បំផុត ដើម្បីបញ្ចប់សង្គ្រាម។ ជីវិតរាប់លានត្រូវបាត់បង់! ខ្ញុំមិនមែននិយាយពីសេដ្ឋកិច្ច ហើយក៏មិនមែននិយាយពីធនធានធម្មជាតិដែរ គឺខ្ញុំនិយាយអំពីមនុស្សវ័យក្មេងជាច្រើននាក់ ដែលត្រូវបានគេសម្លាប់នៅក្នុងសង្គ្រាមនេះ»។

ស្របពេលជាមួយគ្នានោះ លោក ត្រាំ គូសបញ្ជាក់ថា ភាគីអ៊ុយក្រែនឯណោះ ក៏ត្រៀមខ្លួនរួចរាល់ហើយអស់ដែរ ដើម្បីចូលមកកាន់តុចរចាបញ្ចប់សង្គ្រាម។

សូមបញ្ជាក់ជាថ្មី ដំណោះស្រាយជម្លោះរុស្ស៊ី-អ៊ុយក្រែន គឺជាអាទិភាពកំពូលមួយក្នុងអំឡុងយុទ្ធនាការរកសំឡេងឆ្នោត ដោយអ្នកសាធារណរដ្ឋរូបនេះ ឃោសនាថា លោកនឹងបញ្ចប់សង្គ្រាមត្រឹមរយៈពេល២៤ម៉ោងប៉ុណ្ណោះ ដ្បិតតែអ្នកជំនាញអន្តរជាតិសឹងតែមួយពិភពលោក ហ៊ានអះអាងថា មិនអាចទៅរួចក៏ដោយ៕

អត្ថបទ៖ សុខ សុវណ្ណ

ចុចអាន៖ ត្រាំ ថា នឹងជួបពូទីនឆាប់ៗ ចំណែក ភាគីអ៊ុយក្រែនឯណោះ ក៏ត្រៀមខ្លួនចរចាហើយដែរ