អាមេរិក ផ្អាក​ជំនួយ​នៅ​បរទេស​ទាំង​អស់ លើកលែង​តែ​ប្រទេស​ចំនួន​២

សហរដ្ឋអាមេរិក ដែលជាម្ចាស់ជំនួយដ៏ធំបំផុតរបស់ពិភពលោក បានបង្កកជំនួយបរទេសស្ទើរតែទាំងអស់កាលពីថ្ងៃសុក្រ​ទី​២៤​ខែ​មករា​ឆ្នាំ​២០២៥ ដោយធ្វើការលើកលែងសម្រាប់តែ​ជំនួយ​អាហារសង្គ្រោះបន្ទាន់ និងការផ្តល់មូលនិធិយោធាសម្រាប់​ប្រទេស​អ៊ីស្រាអែល និង​ប្រទេស​អេហ្ស៊ីប។

លោក Marco Rubio រដ្ឋមន្ត្រី​ការបរទេស​អាមេរិក បានលើក​ឡើង​នៅ​ក្នុង​អនុស្សរណៈផ្ទៃក្នុង​មួយ ប៉ុន្មាន​ថ្ងៃបន្ទាប់ពីប្រធានាធិបតី​លោក ដូណាល់ ត្រាំ ចូលកាន់តំណែង ដែល​ប្តេជ្ញាគោលនយោបាយ «America First» ជាមួយ​ការរឹតបន្តឹងយ៉ាងតឹងរ៉ឹងលើជំនួយនៅបរទេស។

បទ​បញ្ជាទិញដ៏ធំនេះ ហាក់ដូចជាប៉ះពាល់ដល់អ្វីៗគ្រប់យ៉ាងចាប់ពីជំនួយអភិវឌ្ឍន៍ រហូតដល់ជំនួយយោធា រួមទាំងអ៊ុយក្រែន ដែលបានទទួលអាវុធរាប់ពាន់លានដុល្លារ ក្រោមការដឹកនាំ​ពី​មុន​របស់​អតីត​​ប្រធានាធិបតី លោក ចូ បៃដិន នៅពេលដែល​ព្យាយាមទប់ទល់នឹងការឈ្លានពានរបស់រុស្ស៊ី។

ការ​ប្រកាស​នេះ​ក៏មានន័យថាការផ្អាកយ៉ាងហោចណាស់ជាច្រើនខែនៃមូលនិធិរបស់សហរដ្ឋអាមេរិកសម្រាប់​កម្មវិធី PEPFAR ដែលជាគំនិតផ្តួចផ្តើមប្រឆាំងនឹងមេរោគ​អេដស៍ ក្នុង​ការ​ទិញថ្នាំ​ដើម្បីព្យាបាលជំងឺនៅក្នុងប្រទេសកំពុងអភិវឌ្ឍ​ដែលភាគច្រើននៅអាហ្វ្រិក។

យ៉ាង​ណា​មិញ អនុស្សរណៈនេះ បានធ្វើការលើកលែងសម្រាប់ជំនួយយោធាដល់អ៊ីស្រាអែល ក្នុង​ការ​ទទួល​បាន​សព្វាវុធ​សំខាន់ៗ​ពី​អាមេរិក​ចាប់តាំងពីសង្រ្គាម​នៅ​ហ្កាហ្សា។ អនុស្សរណៈ​ដដែល​នេះ ក៏​លើកលែង​ដល់​ប្រទេស​អេហ្ស៊ីបផង​ដែរ ដែលបានទទួលមូលនិធិការពារជាតិ​ពី​អាមេរិកចាប់តាំងពីបានចុះហត្ថលេខាលើសន្ធិសញ្ញាសន្តិភាពជាមួយអ៊ីស្រាអែលក្នុងឆ្នាំ​១៩៧៩។

លោក Rubio ក៏បានធ្វើការលើកលែងសម្រាប់ការរួមចំណែករបស់អាមេរិកចំពោះជំនួយស្បៀង​អាហារសង្គ្រោះបន្ទាន់ ដែលអាមេរិកបាននិងកំពុងរួមចំណែកបន្ទាប់ពីមានវិបត្តិជុំវិញពិភពលោក រួមទាំងនៅក្នុងប្រទេសស៊ូដង់ និងស៊ីរីផងដែរ៕

ដោយ៖ ឈាង