កិច្ចព្រមព្រៀង​ហាម៉ាស-​អ៊ីស្រាអែល៖ ជនជាតិ​ប៉ាឡេស្ទីនត្រូវ​អនុញ្ញាត​ឲ្យត្រឡប់​ទៅ​ហ្គាហ្សា​ស្ទ្រីបវិញ

ការិយាល័យនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសកាលពីថ្ងៃ​ទី​២៦​មករា​២០២៥​ថា កិច្ចព្រមព្រៀងមួយ​ទៀត​ត្រូវបាន​ធ្វើ​ឡើង​ជាមួយក្រុមហាម៉ាស ដើម្បីដោះលែងចំណាប់ខ្មាំងបន្ថែម ចាប់ពីថ្ងៃព្រហស្បតិ៍​សប្ដាហ៍​នេះ ខណៈពេលដែលអនុញ្ញាតឲ្យ​ជនជាតិប៉ាឡេស្ទីនត្រឡប់ទៅភាគខាងជើងនៃតំបន់ហ្គាហ្សាស្ទ្រីបវិញ​ដោយ​ចាប់ផ្ដើម​ពី​ព្រឹកថ្ងៃចន្ទ​នេះ​តទៅ។

កិច្ចព្រមព្រៀងនេះ មាន​ការ​សម្របសម្រួល​ដោយ​ប្រទេស​កាតា ដែលត្រូវបានគេរំពឹងថានឹងបន្ធូរបន្ថយវិបត្តិដ៏ធំដំបូងនៃបទឈប់បាញ់ដ៏ផុយស្រួយរវាងក្រុមហាម៉ាស និងអ៊ីស្រាអែល។

ការិយាល័យរបស់លោក ណេតាន់យ៉ាហ៊ូ បាន​ចេញ​សេចក្ដី​ថ្លែងការណ៍​ថា៖ «បន្ទាប់ពីការចរចាយ៉ាងម៉ឺងម៉ាត់ និង​មាន​ការ​ប្ដេជ្ញាចិត្ត​ដែលដឹកនាំដោយនាយករដ្ឋមន្ត្រី ណេតាន់យ៉ាហ៊ូ ក្រុម​ហាម៉ាស​បានគាំទ្រ ហើយនឹងធ្វើការដោះលែងចំណាប់ខ្មាំងមួយដំណាក់កាលបន្ថែមទៀតនៅថ្ងៃព្រហស្បតិ៍ខាងមុខ។ ជាផ្នែកមួយនៃដំណាក់កាលនេះ ពលរដ្ឋអ៊ីស្រាអែលម្នាក់​ឈ្មោះ Arbel Yehud ទាហានម្នាក់​ឈ្មោះ Agam Berger និងចំណាប់ខ្មាំងម្នាក់បន្ថែមនឹងត្រូវដោះលែង»។

សេចក្តីថ្លែងការណ៍​ដដែល​នេះ ក៏បានកត់សម្គាល់ផងដែរថា ចំណាប់ខ្មាំងបីនាក់បន្ថែមទៀតនឹងត្រូវដោះលែងនៅថ្ងៃសៅរ៍ដែលជាផ្នែក​មួយ​នៃកិច្ចព្រមព្រៀង។

ការិយាល័យរបស់លោក ណេតាន់យ៉ាហ៊ូ បាន​បន្ថែម​ថា អ៊ីស្រាអែលនឹងអនុញ្ញាតឲ្យ​ប្រជាជនប៉ាឡេស្ទីនត្រឡប់ទៅភាគខាងជើងនៃ​តំបន់​ហ្គាហ្សា​ស្ទ្រីបវិញនៅព្រឹកថ្ងៃចន្ទ ក្រោមកិច្ចព្រមព្រៀងជាមួយក្រុមហាម៉ាស។

លោក ណេតាន់យ៉ាហ៊ូ បានរំលឹកឡើងវិញថា អ៊ីស្រាអែលនឹងមិនលើក​លែង​នោះ​ទេ បើ​មានការរំលោភលើកិច្ចព្រមព្រៀងរវាងភាគីទាំងពីរ ដោយ​បញ្ជាក់​ថា លោកនឹងបន្តជំរុញឲ្យ​មានការវិលត្រឡប់នៃចំណាប់ខ្មាំងទាំងអស់ មិន​ថា​ស្លាប់ ឬ​ក៏​រស់៕

ដោយ៖ ឈាង