ព័ត៌មានអន្ដរជាតិ

សេតវិមាន៖ លោក ត្រាំ នឹងនៅតែបន្តដាក់ពន្ធលើកាណាដា និងម៉ិកស៊ិក ចាប់ពីខែកុម្ភៈ

បានផុស

១ សប្តាហ៍ មុន

នៅ

ថ្ងៃពុធ ២៩ មករា ២០២៥

ដោយ

Chheang

អ្នកនាំពាក្យសេតវិមានលោកស្រី Karoline Leavitt បាននិយាយកាលពីថ្ងៃអង្គារទី២៨ខែមករាថា ប្រធានាធិបតីអាមេរិកលោក ដូណាល់ ត្រាំ នៅតែមានគម្រោងអនុវត្តពន្ធលើប្រទេសម៉ិកស៊ិក និងកាណាដានៅថ្ងៃទី១ខែកុម្ភៈខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Leavitt នៅក្នុងសន្និសីទសារព័ត៌មានដំបូងរបស់សេតវិមាន បានបន្ថែមថា លោកប្រធានាធិបតី ត្រាំ ក៏កំពុងពិចារណាលើការប្រកាសពន្ធថ្មីលើប្រទេសចិននៅថ្ងៃទី១ខែកុម្ភៈផងដែរ។

នៅពេលដែលលោក ត្រាំ ចូលកាន់តំណែងនៅថ្ងៃទី២០ខែមករា លោកបានប្រកាសនូវវិធានការមួយចំនួន រួមទាំងការដាក់ពន្ធ ២៥% លើការនាំចូលពីម៉ិកស៊ិក និងកាណាដា រហូតដល់ប្រទេសទាំងពីរបញ្ឈប់លំហូរនៃជនអន្តោប្រវេសន៍ខុសច្បាប់ និងថ្នាំអាភៀន fentanyl ដ៏សាហាវចូលទៅក្នុងសហរដ្ឋអាមេរិក។ លោក ត្រាំ ក៏បានប្រកាសពន្ធ ១០% លើទំនិញចិនផងដែរ ដោយចោទថា ចិនបានជួញដូរ fentanyl ចូលអាមេរិកតាមរយៈម៉ិកស៊ិក និងកាណាដា។

គួរគូសបញ្ជាក់ថា កាណាដា ចិន ម៉ិកស៊ិក និងសហភាពអឺរ៉ុប សុទ្ធសឹងតែជាបណ្ដាប្រទេស/ប្លុក ដៃគូពាណិជ្ជកម្មកំពូលៗរបស់សហរដ្ឋអាមេរិក ក្នុងទំហំពាណិជ្ជកម្មរាប់ទ្រីលានដុល្លារ។ សេដ្ឋវិទូលើកឡើងថា គោលនយោបាយពន្ធរបស់ ត្រាំ នឹងធ្វើឲ្យអតិផរណាអាមេរិកកើនឡើង ខណៈទាក់ទាញការឆ្លើយតបពីបណ្ដាប្រទេសជាប់ពន្ធ ធ្វើឲ្យពាណិជ្ជកម្មសកលធ្លាក់ចូលក្នុងភាពតានតឹងកាន់តែខ្លាំង៕

ដោយ៖ ឈាង