វិបត្តិស្បៀងអាហារនៅអាហ្វហ្គានីស្ថានកាន់តែធ្ងន់ធ្ងរ ក្រោយ​ត្រាំផ្អាកជំនួយ​​ទៅបរទេស​

ប្រធានកម្មវិធីស្បៀងអាហារពិភពលោកក្នុងប្រទេសអាហ្វហ្គានីស្ថាន បាន​និយាយថា ទីភ្នាក់ងារនេះអាចចិញ្ចឹមបានតែពាក់កណ្តាលនៃប្រជាជនអាហ្វហ្គានីស្ថានដែលត្រូវការជំនួយប៉ុណ្ណោះ បន្ទាប់ពីការ​ប្រកាស​កាត់បន្ថយជំនួយអន្តរជាតិ ជាពិសេសពីសហរដ្ឋអាមេរិក។ នេះបើយោងតាមការចេញផ្សាយរបស់សារព័ត៌មាន CNN។

ប្រទេសអាហ្វហ្កានីស្ថានដែលបានធ្លាក់ជួ​​ប​វិបត្តិសេដ្ឋកិច្ចតាំងពីឆ្នាំ​២០២១ បន្ទាប់ពីពួកតាលីបង់បានចូលកាន់កាប់​អំណាច​​​វិញ​​ ដោយ​​​ធ្វើឲ្យជំនួយអភិវឌ្ឍន៍ និងសន្តិសុខទាំងអស់ដល់ប្រទេសនេះត្រូវបានជាប់គាំង រួមទាំងមានការរឹតបន្តឹងលើវិស័យធនាគារផងដែរ។

ចាប់តាំងពីពេលនោះមក ជំនួយមនុស្សធម៌ ដែលមានបំណងផ្តល់មូលនិធិដល់តម្រូវការបន្ទាន់តាមរយៈអង្គការមិនរកប្រាក់​ចំណេញ និងឆ្លងកាត់ការគ្រប់គ្រងរបស់រដ្ឋាភិបាល បានបំពេញការខ្វះខាតមួយចំនួនក្នុងប្រទេសនេះ។ ប៉ុន្តែម្ចាស់ជំនួយត្រូវបានកាត់បន្ថយជាលំដាប់ក្នុងប៉ុន្មានឆ្នាំចុងក្រោយនេះ ដោយបារម្ភពីការរឹតបន្តឹងរបស់ពួកតាលីបង់លើស្ត្រី រួមទាំងការបញ្ជារបស់ពួកគេដែលឱ្យបុគ្គលិកអង្គការក្រៅរដ្ឋាភិបាលស្ត្រីអាហ្វហ្គានីស្ថានបញ្ឈប់ការងារ។

នាយក កម្មវិធីស្បៀងអាហារពិភពលោក(WFP) ប្រចាំប្រទេសអាហ្វហ្កានីស្ថានលោកស្រី Hsiao-Wei Lee បានប្រាប់រ៉យទ័រថា ភ្លាមៗមុនពេលបញ្ចប់អាណត្តិរយៈពេល ៣ ឆ្នាំរបស់នាងនៅក្នុងប្រទេសអាហ្វហ្គានីស្ថានថា៖« ការកាត់បន្ថយការផ្តល់មូលនិធិ បានធ្វើឲ្យប្រហែលពាក់កណ្តាលនៃប្រជាជនអាហ្វហ្គានីស្ថាន ១៥ លាននាក់ដែលត្រូវការស្បៀងអាហារធ្ងន់ធ្ងរមិនបានទទួលអាហារក្នុងអំឡុងរដូវរងាដ៏អាក្រក់នៅឆ្នាំនេះនោះទេ ខណៈមនុស្សជាង ៦ លាននាក់កំពុងញ៉ាំអាហារមួយឬពីរពេលប៉ុណ្ណោះក្នុងមួយថ្ងៃជាមួយនំបុ័ងនិងតែប៉ុណ្ណោះ »។

យោងតាមទិន្នន័យរបស់អង្គការសហប្រជាជាតិ ផែនការមនុស្សធម៌របស់អាហ្វហ្គានីស្ថានត្រូវបានផ្តល់មូលនិធិត្រឹមតែជាងពាក់កណ្តាលប៉ុណ្ណោះក្នុងឆ្នាំ ២០២៤ហើយមន្ត្រីជំនួយបានបង្ហាញពីការភ័យខ្លាចថា វាអាចធ្លាក់ចុះបន្ថែមទៀតនៅឆ្នាំនេះ។

ស្របពេលជាមួយគ្នានេះក្រសួងការបរទេសសហរដ្ឋអាមេរិកបានចេញបញ្ជាបញ្ឈប់ការងារផ្ដល់ជំនួយបរទេសដែលមានស្រាប់ទាំងអស់ និងផ្អាកជំនួយថ្មី បន្ទាប់ពីប្រធានាធិបតី ដូណាល់ ត្រាំ បានបញ្ជាឱ្យផ្អាកដើម្បីពិនិត្យឡើងវិញប្រសិនបើការបែងចែកជំនួយគឺស្របតាមគោលនយោបាយការបរទេសរបស់គាត់ឬអត់។ ការផ្អាកនេះមានន័យថាប្រជាជន​អាហ្វហ្គានីស្ថានរាប់ពាន់នាក់ដែលធ្លាប់ទទួលបានជំនួយពីអាមេរិកនឹងបាត់បង់លទ្ធភាពទទួលបានធនធានសំខាន់ៗបន្ទាប់ពីការបញ្ជារបស់លោកត្រាំ។

ការផ្អាកនេះទំនងជាជះឥទ្ធិពលដល់ប្រតិបត្តិការមនុស្សធម៌របស់អាហ្វហ្គានីស្ថានធ្ងប់ធ្ងរ ខណៈកាលពីឆ្នាំ ២០២៤ សហរដ្ឋអាមេរិក ដែលជាម្ចាស់ជំនួយធំបំផុតបានផ្តល់មូលនិធិជាង ៤០% ដល់ប្រទេសនេះ។

មួយវិញទៀតអ្នកការទូតលោកខាងលិច និងមន្ត្រីមនុស្សធម៌បាននិយាយថា ជំនួយធ្លាក់ចុះក្នុងប្រទេសអាហ្វហ្គានីស្ថានមួយផ្នែក ដោយសារភាពអាសន្នជាសកលនៅស៊ូដង់ អ៊ុយក្រែន និងហ្គាហ្សា ហើយក៏ដោយសារតែការព្រួយបារម្ភជាមួយនឹងការរឹតត្បិតរបស់ពួកតាលីបង់លើស្ត្រីផងដែរ៕

អត្ថបទ៖ ប៊ុន សុភាព