អ្នកវិទ្យាសាស្រ្តរកឃើញភពថ្មី អាចឲ្យមនុស្សរស់នៅបាន ហើយក៏អាចមានពួក​ Alien នៅទីនោះដែរ

តាមការចុះផ្សាយរបស់ Daily Mail កាលពីថ្ងៃអង្គារទី២៨ខែមករាឆ្នាំ២០២៥, ក្រុមអ្នកវិទ្យាសា​ស្រ្តនៅសកលវិទ្យាល័យ Oxford ចក្រភពអង់គ្លេស បានរកឃើញភពមួយ និងសិក្សាឃើញថា ភពនេះអាចអំណោយផលដល់ការរស់នៅរបស់មនុស្ស ហើយអាចមានពួក Alien ដែលខ្មែរយើងនិយមហៅ មនុស្សភពផ្កាយ រស់នៅទីនោះថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភពនោះត្រូវគេឲ្យឈ្មោះ HD 20794 មានចម្ងាយ១៩.៧ឆ្នាំពន្លឺពីផែនដី និងធំជាងភពផែនដី ៦ដង ដូច្នេះហើយទើបគេអាចហៅវាម្យ៉ាងទៀតថា «Super Earth»។

មូលហេតុដែលគេជឿថា HD 20794 អាចរស់នៅបាន គឺដោយសាតែភពនេះ ស្ថិតនៅក្នុងក្រុមតារានិករ Eridanus និងមានក្រុមផ្កាយដែលមានទឹក។

HD 20794 ត្រូវបានរកឃើញដោយប្រើឧបករណ៍ស្វែងរកនិងចាប់សញ្ញាភព HARPS នៅស្ថានីយ៍ La Silla Observatory ក្នុងប្រទេស ឈីលី។

សាស្រ្តាចារ្យ Michael Cretignier ជំនួយការស្រាវជ្រាវនៅនាយកដ្ឋានរូបវិទ្យានៃសាកលវិទ្យាល័យ Oxford បាននិយាយថា ការរកឃើញនេះពិតជាគួរឲ្យរំភើបណាស់។ វាជាក្តីសង្ឃឹមសម្រាប់បេសកកម្មអវកាសនាពេលអនាគត។ 

សូមបញ្ជាក់ថា នេះមិនមែនជាភពតែមួយដែលក្រុមអ្នកវិទ្យាសាស្រ្តអះអាងថាអំណោយផលដល់ជីវិតរស់នៅនោះទេ។ ជាក់ស្តែងកាលពីឆ្នាំមុន អង្គការណាសា ក៏បានរកឃើញភព ដែលអាចអំណោយទានដល់ភាវៈមានជីវិត មានរយៈចម្ងាយ១៣៧ឆ្នាំពន្លឺប៉ុណ្ណោះពីផែនដីផងដែរ។

ភពនោះត្រូវគេឲ្យឈ្មោះ TOI-715 b មានទំហំធំជាងផែនដី១.៥ដង ហើយគោចរជុំវិញផ្កាយតូចមួយដែលមានពណ៌ក្រហម។ វាត្រូវបានរកឃើញដោយផ្កាយរណប The Transiting Exoplanet Survey Satellite (TESS)៕

អត្ថបទ៖ សុខ សុវណ្ណ

ចុចអាន៖ សមាជិកសភាអាមេរិក៖ មនុស្សក្រៅភព អាចស្ថិតនៅបាតមហាសមុទ្ររបស់ផែនដី