តើស្ថាប័ន​ CIO ជាអ្វី និងថាតើ​ហេតុអ្វី​ទើប​ លោក Yoon មិនសហការជាមួយ ​ខណៈ​អ្នកគាំទ្រ​Yoon កើន​ឡើងយ៉ាងឆាប់រហ័ស​​?​

​​​ក្នុង​រយៈពេល​​ជិត​​២​​ខែ​​កន្លងមកនេះ នយោ​បាយ​ប្រទេសកូរ៉េ​​ខាងត្បូង​​បាន​ព​ង្វក់ប្រជាពលរដ្ឋ​​កូរ៉េ​​​រាប់​ម៉ឺន​នាក់​​ឲ្យ​ចេញ​តវ៉ា​ ស៊ូទ្រាំ​​​​តស៊ូ​ជម្នះ​អាកាសធាតុដ៏ត្រជាក់​​នៅ​ក្នុង​រដូវ​រងាក្នុង​ប្រទេសកូរ៉េខាងត្បូង​ ខណៈ​ការ​ធ្វើទុក្ខបុកម្នេញគ្នា​នៅតែ​បង្កើត​សម្ពាធ​ខ្លាំងឡើងៗ​​​មិនត្រឹមតែ​វិធានការច្បាប់​ទេ​ ប៉ុន្តែ​ថែមទាំង​ដល់​កម្លាំង​ប្រជាពល​រដ្ឋ​​​​។​

មាន​សំណួរ​​​ខ្លះ​បាន​ចោទ​ឡើងថា ហេតុអ្វី​បាន​ជា​ប្រជាជន​កូរ៉េ​ចេញតវ៉ា​​​​​​ប្រឆាំង​ប្រធានាធិបតី លោក Yoon Suk Yeol ផង និង​ ក្រោយ​មក​ក៏​មាន​បាតុករ​​រាប់​ម៉ឺន​នាក់​ទៀត​ទៅតវ៉ា​​​ប្រឆាំ​ងការ​អនុវត្តច្បាប់​​ប្រឆាំង​ លោក Yoon ទៅវិញ ស្របពេលលោក​ Yoon ហាក់​ប្រព្រឹត្តកំហុស​ធ្ងន់​ទាញទម្លាក់​ប្រទេសកូរ៉េ​​​ខាងត្បូងចូលទៅក្នុងវិបត្តិនយោបាយនោះ​?

​ជាការពិត​ នៅ​ក្រោយពេល​ ​​ប្រធានាធិបតី​​ Yoon Suk Yeol បាន​ប្រកាស​ច្បាប់​អាជ្ញាសឹក​កាល​ថ្ងៃទី​៣ខែ​​ធ្នូ​ឆ្នាំ​មុន បានទាញទម្លាក់​​ស្ថានភាព​​ប្រទេសកូរ៉េ​ទៅរក​ភាព​​វឹកវរ​ ដោយស្ថានភាព​នយោបាយ​​មិនច្បាស់លាស់។​ ប្រជាជន​កូរ៉េ​​រាប់ម៉ឺន​នាក់​បាន​ចេញ​តវ៉ា​តាម​ដង​ផ្លូវ​ដើម្បីគាំ​​​​​​ទ្រ​​ចំណាត់​ការ​របស់​សភា​​​ជាតិ​ដែល​ដឹកនាំ​ដោយ​គណបក្ស​ប្រជាធិបតេយ្យ​កូរ៉េ​ (KDP)​​ដើម្បី​ដាក់​សម្ពាធ​​ឲ្យ​ប្រធាធិបតី​លាលែងពីអំណាច​ និង​/ឬ​ លើក​ទឹកចិត្ត​សភា​​បោះឆ្នោត​​បណ្តេ​ញចេញ​ពីអំណាច។​

ប៉ុន្តែ ​ក្រោយ​សភាជាតិ​​បោះឆ្នោត​​​​​បណ្តេញ​ចេញ​ពីអំណាច​​នៅថ្ងៃ​ទី​១៤ខែធ្នូ ប្រធានាធិបតី​ Yoon Suk Yeol បានប្រឈម​ដីកា​​កោះហៅ​ទៅសួរចម្លើយ​​ជាច្រើន​លើក​ដោយ​​ការិយាល័យ​​​​ស៊ើបអង្កេត​ពុករលួយ​សម្រាប់​មន្ត្រី​ជាន់​ខ្ពស់​​ (CIO) ហើយ​​ដំបូងឡើយ​ គឺ​ត្រឹមអ្នកគាំទ្រ​លោក​​មួយ​ចំនួន​តូច​ប៉ុណ្ណោះ​ដែល​ចេញ​ប្រឆាំង​ការ​អនុវត្ត​បែ​បនេះ។

ប៉ុន្តែ​ចលនាតវ៉ា​​ប្រឆាំង​​​សកម្មភាព​របស់ CIO នេះ បានរីក​ចម្រើន​​ធំឡើងៗ​​តាំង​ពី​ការ​ប៉ុន​ប៉ង​ចាប់​ខ្លួន​ រហូត​ដល់​ការ​ឃុំខ្លួន​​​នាពេលនេះ។

CIO ជាស្ថាប័​ន​រដ្ឋ​បែបណា ទើប​លោក​ Yoon មិនសហការ និង​ចោទ​ថា​ ជាការ​​​អនុវត្ត​ខុស​ច្បាប់?

ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) ត្រូវ​បាន​បង្កើត​ឡើង​ក្នុង​អំឡុង​ឆ្នាំ​២០២១ ​ក្នុង​អំឡុង​​ពេល​នៃ​ការ​គ្រប់​គ្រង​របស់ អតីត​ប្រធានាធិបតី Moon Jae In ដែល​​ជា​ផ្នែក​មួយ​នៃ​អ្វី​ដែល​អ្នក​ខ្លះ​បាន​ហៅ​ថា​ជា​គោល​ដៅ​ដ៏​យូរ​អង្វែង​របស់​​ក្រុម​​ឆ្វេង​និយម គឺ​សំដៅ​​លើ​​គណបក្ស​​​ប្រជាធិបតី​កូរ៉េ​​​​នាពេលបច្ចុប្បន្ន​នេះ។

តាមការ​ចុះ​ផ្សាយ​របស់ Japan Forward «អាណត្តិ» របស់​​​ CIO គឺដើម្បីស៊ើបអង្កេតអំពើពុករលួយក្នុងចំណោមមន្ត្រីសាធារណៈប្រមាណ ៧០០០​នាក់ រួមទាំងឥស្សរជនជាន់ខ្ពស់របស់រដ្ឋាភិបាល និងមេដឹកនាំតុលាការ​​ក្នុង​អាណត្តិរបស់​លោក Moon Jae-in។

វិសាលភាព​នៃការ​ស៊ើបអង្កេត​នេះ​បាន​ពង្រីកដល់បុគ្គលនៅក្នុងតុលាការកំពូល តុលាការធម្មនុញ្ញ ព្រះរាជអាជ្ញា និងទាំងមន្ត្រីយោធាបច្ចុប្បន្ន និងអតីត រួមទាំងប្រធានាធិបតីផងដែរ។

ក្នុងអំឡុងពេលចាប់ផ្តើម​​កាន់​អំណាច​របស់ខ្លួន Yoon Suk-yeol ដែល​បន្ទាប់​កាន់តួនាទី​ជា​អគ្គរដ្ឋអាជ្ញា​បានប្រឆាំងយ៉ាងសកម្មចំពោះការបង្កើត CIO នេះ។ លោក Yoon បាន​លាតត្រដាង​រឿងអាស្រូវ​ដែល​ពាក់ព័ន្ធ​នឹង​លោក Cho Kuk ដែលជា​សម្ព័ន្ធមិត្ត​ជិតស្និទ្ធ​របស់លោក Moon និង​បន្ទាប់មក​ជា​រដ្ឋមន្ត្រី​យុត្តិធម៌ ដែល​បាន​រៀបចំ​ផែនការ​សម្រាប់​កំណែទម្រង់​ការកាត់ទោស​របស់​រដ្ឋបាល។

លោក Cho Kuk ​នេះ​ជា​អ្នក​ផ្តល់​គំនិត​​ឲ្យ​មានការ​ទម្រង់​ដើម្បី​​​​ស៊ើបអង្កេត​​​លើសា្ថប័ន​រដ្ឋអាជ្ញា ហើយ​ក្រោយ​មក​ក៏បង្កើត​ CIO។ ក្រោយ​ពី​ការបង្កើត​នៅ​ខែ​មិថុនា​ឆ្នាំ​២០២១ ក៏បានស៊ើប​អង្កេត​​លោក Yoon Suk-yeol ហើយ​លោក Yoon ក៏បាន​ហក់​ចូល​ក្នុងនយោបាយ​ក្នុងរយៈពេលខ្លី និង​ទទួបានជ័យជម្នះបន្តិចបន្តួច​​ក្នុងការបោះឆ្នោត​នៅឆ្នាំ​២០២២ លើ​គណបក្ស​ប្រជាធិបតេយ្យ។

ទោះយ៉ាងណាក៏ដោយតាមការពិត CIO ត្រូវបានគេ​សំដៅ​ជាញឹកញាប់ថាជា «Gestapo» ឬថា «ភ្នាក់ងារ​សម្ងាត់​»​នៃការគ្រប់គ្រង​របស់​ក្រុមឆ្វេងនិយម។ CIO ប្រតិបត្តិការដោយផ្ទាល់​នៅក្រោមការិយាល័យប្រធានាធិបតី ប្រធានាធិបតីតែងតាំងដោយផ្ទាល់ នាយកទីភ្នាក់ងារពីក្នុងប្រអប់​ដែលផ្តល់ដោយគណៈកម្មាធិការឆ្វេងនិយម។ គណៈកម្មាធិការ​ដដែល​នេះ​ជ្រើសរើស​រដ្ឋ​អាជ្ញា​ដោយ​គ្មាន​ការត្រួតពិនិត្យ​ពី​ស្ថាប័ន​ប្រតិបត្តិ។

អ្នករិះគន់អះអាងថា តាមរយៈការទទួលបានសិទ្ធិអំណាចលើការិយាល័យអយ្យការជាទៀងទាត់ CIO បានបង្អាក់គោលការណ៍នៃការបំបែកអំណាច។ វាដំណើរការយ៉ាងមានប្រសិទ្ធភាពជា «ការិយាល័យរដ្ឋ​អាជ្ញាទីពីរ» ដែលត្រូវបានចោទប្រកាន់ថាបានបង្កើតឡើងដើម្បីបំភិតបំភ័យរដ្ឋ​​អាជ្ញា និងការពារសមាជិកសភាឆ្វេងនិយម។

កត្តា​​​ទាំងនេះ​​បាន​ធ្វើឲ្យ​ប្រជាជន​ចេញ​តវ៉ា​ក្រោយ​ៗ​នេះ​ និង​មានទំនោរ​កើន​ឡើង​​ក្នុងការគាំទ្រ​ លោក Yoon Suk Yeol វិញ​ដោយសារ​ឃើញ​នូវ​ភាព​​អយុត្តិធម៌​និង​ការ​អនុវត្តច្បាប់​យ៉ា​ងគំហុក​រុញឲ្យលោក Yoon ទាល់​ច្រក​ពីស្ថាប័ន​ដោយ​លោក ប្រធានាធិបតី​ និង​ក្រុមអ្នកច្បាប់​របស់លោក យល់​ថា «មិនស្របច្បាប់»។​

ពេលនេះ Yoon កំពុងប្រឈមមុខនឹងសំណុំរឿងផ្លូវច្បាប់ជុំវិញការដកតំណែងរបស់គាត់នៅចំពោះមុខតុលាការធម្មនុញ្ញ៕​

​ដោយ រ៉ាន់ រើយ​