ត្រាំ នឹងបញ្ជូនជន្តោប្រវេសន៍ ៣០ ០០០នាក់ ទៅគុក Guantanamo 

ប្រធានាធិបតីអាមេរិក លោក ដូណាក់ ត្រាំ បានចេញបញ្ជាឲ្យមានការរៀបចំគុករបស់កងទ័ពជើងទឹកនៅឆកសមុទ្រ Guantanamo ឲ្យរៀបរយ ដើម្បីដាក់ជន្តោប្រវេសន៍ប្រមាណ ៣០ ០០០នាក់ ដែលនឹងត្រូវបណ្តេញចេញពីទឹកដីអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNN នៅថ្ងៃព្រហស្បតិ៍ទី៣០ខែមករាឆ្នាំ២០២៥, ក្នុងនោះ លោក ត្រាំ បានបញ្ជាឲ្យក្រសួងការពារជាតិនិងសន្តិសុខមាតុភូមិ ត្រូវរៀបចំទីតាំងក៏ដូចជាពង្រីកទីធ្លានិងបន្ថែមគ្រែ ដើម្បីដាក់ជនអន្តោប្រវេសន៍។

ឆ្លើយតបទៅការរិះគន់ចំពោះទង្វើបែបនេះ លោក ត្រាំ អះអាងថា បុគ្គលមួយចំនួន អាក្រក់ពេកហើយ យើងក៏មិនទុកចិត្តប្រទេសទាំងឡាយណាដែលទទួលពួកគេដែរ ពីព្រោះយើងមិនចង់ឲ្យពួកគេត្រឡប់មកវិញ។ ដូច្នេះយើងនឹងបញ្ជូនពួកគេទៅ Guantanamo ព្រោះជាកន្លែងពិបាកចេញ។

លោកបន្តថា «វិធានការ​នេះ ​ធ្វើឲ្យយើងបោះជំហានទៅមុខមួយជំហានទៀត កាន់តែ​ខិត​ទៅ​ជិត​ការ​លុប​បំបាត់​អំពើ​ឧក្រិដ្ឋកម្ម​ចំណាក​ស្រុក​ក្នុង​សហគមន៍​សាជាថ្មី»។

ឆកសមុទ្រ Guantanamo គឺជាមូលដ្ឋានទ័ពជើងទឹករបស់សហរដ្ឋអាមេរិកតាំងពីឆ្នាំ១៩០៣មក ប៉ុន្តែត្រូវប្រែក្លាយទៅជាទីឃុំឃាំងក្នុងឆ្នាំ២០០២ក្រោមការដឹកនាំរបស់ប្រធានាធិបតី George W. Bush ដើម្បីដាក់ជនជាប់សង្ស័យថាជាភេរវករ បន្ទាប់ពីការវាយប្រហារថ្ងៃទី១១ខែកញ្ញា។

ក្រៅពីត្រូវគេស្គាល់ច្បាស់ថាជាកន្លែងឃុំខ្លួនជនសង្ស័យភេរវករហើយនោះ គុក Guantanamo ក៏មានកន្លែងឃុំឃាំងជនចំណាកស្រុកដាច់ដោយឡែកផងដែរ។

យ៉ាងណា គុកនេះត្រូវគេរិះគន់ជាយូរមកហើយចំពោះការធ្វើទារុណកម្ម និងការឃុំខ្លួនដោយគ្មានកំណត់ ទោះអ្នកទាំងនោះមិនត្រូវបានតុលាការចោទប្រកាន់ឬកាត់ទោសក៏ដោយ៕

អត្ថបទ៖ សុខ សុវណ្ណ

ចុចអាន៖ សេតវិមាន៖ លោក ត្រាំ នឹង​នៅ​តែ​បន្ត​ដាក់​ពន្ធ​លើ​កាណាដា និង​ម៉ិកស៊ិក ចាប់​ពី​ខែ​កុម្ភៈ