រកឃើញមនុស្សស្លាប់១៨នាក់ហើយ ក្នុងហេតុការណ៍យន្តហោះបុកជាមួយឧទ្ធម្ភាគចក្រ នៅ វ៉ាស៊ីនតោន

តាមការចុះផ្សាយរបស់សារព័ត៌មាន CBS News នៅថ្ងៃព្រហស្បតិ៍ទី៣០ខែមករាឆ្នាំ២០២៥, ក្រុមជួយសង្គ្រោះបានរកឃើញមនុស្សស្លាប់ចំនួន១៨នាក់ហើយ ក្នុងហេតុការណ៍យន្តហោះដឹកអ្នកដំណើររបស់ក្រុមហ៊ុន American Airlines បុកជាមួយឧទ្ធម្ភាគចក្រ Black Hawk ធ្លាក់ចូលទន្លេ Potomac នៅទីក្រុងវ៉ាស៊ីនតោន។

ស្របពេលជាមួយគ្នានោះដែរ ប៉ូលិសបានច្រានចោលសេចក្តីរាយការណ៍របស់សារព័ត៌មានមួយចំនួនដែលថា មានមនុស្សចំនួន៤នាក់ ត្រូវបានរកឃើញនៅរស់។

ហេតុការណ៍ដ៏រន្ធត់នេះ កើតឡើងនៅជិតអាកាសយានដ្ឋាន Ronald Reagan Washington National Airport ​​កាលពីយប់​ថ្ងៃ​ពុធ (ពេលវេលា​នៅសហរដ្ឋអាមេរិក ត្រូវនឹង​​​​ព្រឹកថ្ងៃ​ព្រហស្បតិ៍ ​នៅកម្ពុជា)។

យន្តហោះនេះគឺធ្វើដំណើរចេញពីទីក្រុង Wichita នៃរដ្ឋ Kansas ដោយមានផ្ទុកអ្នកដំណើរចំនួន៦០នាក់ និងអាកាសយានិក ៤នាក់ ចំណែកឧទ្ធម្ភាគចក្រ Black Hawk មានផ្ទុកទាហាន៣នាក់ ដែលកំពុងធ្វើការហោះហើរហ្វឹកហាត់។

ក្រោយកើតហេតុភ្លាមៗ ក្រុមឆ្លើយតបបន្ទាន់ប្រមាណ៣០០នាក់ រួមទាំងប៉ូលិស អ្នកជ្រមុជទឹក និងទូកជាច្រើនគ្រឿងផងដែរនោះ បានបើកប្រតិបត្តិការស្វែងរក ប៉ុន្តែត្រូវជួបឧបសគ្គដោយសារកត្តាអាកាសធាតុនិងទឹកទន្លេមានរលកធំៗនិងហូរខ្លាំងពេក។

យ៉ាងណាក្តី ប្រមុខផ្នែកពន្លត់អគ្គិភ័យប្រចាំទីក្រុងវ៉ាស៊ីនតោន John Donnelly បានប្រាប់អ្នកសារព័ត៌មានក្នុនសន្និសីទកាសែតថា «យើងមិនហ៊ានសន្និដ្ឋានឡើយថា អាចនឹងមានមនុស្សនៅរស់ ប៉ុន្តែយ៉ាងណា យើងនឹងខិតខំឲ្យអស់ពីលទ្ធភាពដើម្បីស្វែងរកពួកគេ»។

សូមបញ្ជាក់ថា ការធ្លាក់យន្តហោះលើកចុងក្រោយបំផុតរបស់ក្រុមហ៊ុន American Airlines គឺកើតឡើងក្នុងខែវិច្ឆិកាឆ្នាំ២០០១ នៅជិតអាកាសយានដ្ឋានអន្តរជាតិ John F. Kennedy។ កាលនោះ ជើងហោះហើរលេខ ៥៨៧ ជាប្រភេទយន្តហោះ Airbus A300 បានធ្លាក់ភ្លាមៗក្រោយហោះឡើងមិនបានប៉ុន្មានផង ដោយសម្លាប់មនុស្ស២៦៥នាក់។

ចំណែកបើនិយាយពីការធ្លាក់យន្តហោះពាណិជ្ជកម្មនៅអាមេរិកតែម្តង ហេតុការណ៍ធំលើកចុងក្រោយបំផុតគឺកើតឡើងក្នុងខែកុម្ភៈឆ្នាំ២០០៩ នៅពេលជើងហោះហើររបស់ក្រុមហ៊ុន Continental Airlines ធ្លាក់លើផ្ទះក្នុងទីក្រុង Buffalo សម្លាប់មនុស្សចំនួន៩០នាក់៕

អត្ថបទ៖ សុខ សុវណ្ណ

អត្ថបទ៖ យន្តហោះ​បុកគ្នា​នៅអាមេរិក អ្នកដំណើរ​​ជាង​៦០​នាក់ មិនទាន់ដឹងស្លាប់ឬរស់​​