ចំណាប់ខ្មាំងថៃ ៥នាក់ និងអ៊ីស្រាអែល ៣នាក់ ត្រូវក្រុមហាម៉ាស ដោះលែងឲ្យមានសេរីភាព

ជាផ្នែកនៃបទឈប់បាញ់ដែលសម្របសម្រួលដោយកាតា, អេហ្ស៊ីបនិងអាមេរិក, ពេលនេះក្រុមហាម៉ាស បានដោះលែងចំណាប់ខ្មាំងចំនួន៨នាក់ទៀតហើយ ដោយក្នុងនោះមានជនជាតិថៃ៥នាក់ និងអ៊ីស្រាអែល៣នាក់ ចំណែកឯអ៊ីស្រាអែលវិញ ក៏បានដោះលែងអ្នកទោសប៉ាឡេស្ទីន ១១០នាក់ឲ្យមានសេរីភាពផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃសុក្រទី៣១ខែមករាឆ្នាំ២០២៥, ក្នុងចំណោមអ្នកទោសប៉ាឡេស្ទីនទាំង១១០នាក់ដែលអ៊ីស្រាអែលដោះលែង គឺមាន៣២នាក់ដែលទទួលទោសជាប់ពន្ធនាគារអស់មួយជីវិត និង៣០នាក់ជាអនីតិជន។

ការដោះដូរគ្នានេះ គឺធ្វើឡើងនៅឯទីក្រុង ហ្ស៊េរុយសាឡិមខាងលិច កាលពីថ្ងៃព្រហស្បតិ៍ទី៣០ខែមករាឆ្នាំ២០២៥ ខណៈដែលចំណាប់ខ្មាំងនិងអ្នកទោស ត្រូវបានប្រគល់ឲ្យទៅកាកបាទក្រហម។

ចំណាប់ខ្មាំងថៃទាំង៥នាក់ដែលត្រូវបានដោះលែងមានឈ្មោះ Thaenna Pongsak, Sathian Suwannakhan, Sriaoun Watchara, Saethao Bannawat និង Rumnao Surasak ខណៈក្រសួងការបរទេសថៃ ប្រកាសថា ពួកគេនឹងវិលត្រឡប់ទៅមាតុភូមិវិញ នៅ១០ថ្ងៃក្រោយ។

ចំណែកឯចំណាប់ខ្មាំងអ៊ីស្រាអែល ទាំង៣គឺមានឈ្មោះ Arbel Yehud, Gadi Moshe Mozes និង Agam Berger។

សូមបញ្ជាក់ថា បទឈប់បាញ់រវាងក្រុមហាម៉ាសនិងអ៊ីស្រាអែល ត្រូវបានព្រមព្រៀងកាលពីដើមខែមករា ហើយវាចែកជា៣ដំណាក់កាល។ ក្នុងដំណាក់កាលដំបូង ក្រុមហាម៉ាស ត្រូវដោះលែងចំណាប់ខ្មាំងចំនួន៣៣នាក់ ជាថ្នូរឲ្យអ៊ីស្រាអែល ដោះលែងអ្នកទោសប៉ាឡេស្ទីនដូចគ្នា ប៉ុន្តែមិនកំណត់ចំនួនទេ។

គិតត្រឹមពេលនេះ ក្រុមហាម៉ាស បានដោះលែងចំណាប់ខ្មាំងសរុប១៣២នាក់ ចំណែកអ៊ីស្រាអែល បានដោះលែងអ្នកទោសប៉ាឡេស្ទីន ចំនួន២៤០នាក់៕

អត្ថបទ៖ សុខ សុវណ្ណ

ចុចអាន៖ ​ចំណាប់​ខ្មាំង​ថៃ​​៥នាក់​ក្នុងចំណោម​៨នាក់​​ក្នុង​កណ្តាប់​​ដៃហាម៉ាស​នៅហ្គាហ្សា​នឹងត្រូវ​ដោះលែងថ្ងៃនេះ​