កោះដ៏ល្បីល្បាញមួយក្នុងប្រទេសក្រិក រងការរញ្ជួយ ដី២០០​ដងផ្ទួនៗ

ការចេញផ្សាយរបស់សារព័ត៌មាន​ CNN បានឲ្យដឹងថា សាលារៀននឹងត្រូវបិទនៅលើកោះ Santorini នៃប្រទេសក្រិក បន្ទាប់ពីរញ្ជួយដីជាបន្តបន្ទាប់ចំនួន២០០​ដង​​ផ្ទួនៗគ្នា​ បានអង្រួនតំបន់ទេសចរណ៍ដ៏ពេញនិយមនេះក្នុងរយៈពេលប៉ុន្មានថ្ងៃថ្មីៗនេះ។

នៅចន្លោះពីថ្ងៃសុក្រដល់ថ្ងៃអាទិត្យ ការរញ្ជួយដីជាង២០០ដងបានកើតឡើងរវាងកោះ Santorini និងកោះ Amorgos រួមទាំងមានការរញ្ជួយដីកម្រិត ៤.៦ រ៉ិចទ័រ ដែលជាកម្លាំងខ្លាំងបំផុត។ នេះបើយោងតាមអាជ្ញាធរ។

អាជ្ញាធរក៏បានណែនាំអ្នកស្រុកឱ្យជៀសវាងការជួបជុំគ្នាក្នុងផ្ទះធំ បិតកំពង់ផែជាច្រើន រួមទាំងកំពង់ផែចាស់របស់ Fira ដែលស្ថិតនៅខាងក្រោមរដ្ឋធានីរបស់កោះនេះ។ សាលារៀនក៏នឹងត្រូវបិទផងដែរនៅក្នុងកោះ Aegean ក្បែរនោះនៃ ទីក្រុងAnafi, រួមទាំងកោះ Ios និង កោះ Amorgos ។

ទោះយ៉ាងណា ការរញ្ជួយដីនៅលើកោះ Santorini នេះមិនមែនជារឿងចម្លែកន នោះទេ ដោយសារវាស្ថិតនៅលើតំបន់ដែលងាយរងគ្រោះរញ្ជួយដី។ ជាមួយគ្នានេះហានិភ័យនៃការរញ្ជួយមិនបញ្ឈប់មនុស្ស ៣.៤ លាននាក់ពីការមកលេងកោះនេះជារៀងរាល់ឆ្នាំទេ។

គោលដៅទេសចរណ៍វិស្សមកាលដ៏ល្បីល្បាញនេះដោយសារ តែវាមានរណ្ដៅដ៏​ធំ​រាងអឌ្ឍចន្ទដែលត្រូវបានបង្កើតឡើងដោយការផ្ទុះភ្នំភ្លើងដ៏ធំបំផុតមួយនៅជុំវិញកាលពី៣៦០០ឆ្នាំមុនត្រូវបានគេដាក់ឈ្មោះថា «កោះ Instagram» របស់ប្រទេសក្រិកដោយសារតែពន្លឺពណ៌មាសនិងទេសភាពដ៏អស្ចារ្យរបស់វា។

គួរបញ្ជាក់ថា កោះ Santorini គឺជាផ្នែកមួយនៃតំបន់ភ្នំភ្លើង Hellenic ដែលជាវាលភ្នំភ្លើងសកម្មបំផុតមួយនៅក្នុងទ្វីបអឺរ៉ុប ដែលមានការផ្ទុះជាង​១០០ដងក្នុងរយៈពេល៤០ម៉ឺន​ឆ្នាំកន្លងមកនេះ។

កាលពីខែកក្កដា ឆ្នាំ១៩៥៦ កោះនេះរងការរញ្ជួយដីដ៏ធំបំផុតកម្រិត ៧.៥ រ៉ិចទ័រ បង្កជារលកយក្សស៊ូណាមិដែលមានកម្ពស់ ២៥ ម៉ែត្រ សម្លាប់មនុស្សយ៉ាងតិច៥៣នាក់និងជាង១០០នាក់រងរបួស ខណៈផ្ទះយ៉ាងហោចណាស់មួយភាគបីនៅលើកោះនេះបានដួលរលំ៕

អត្ថបទ៖ ប៊ុន សុភាព