Elon Musk កំពុងធ្វើការដើម្បីបិទ USAID ​​ជាផ្នែក​នៃ​ប្រសិទ្ធភាព​រដ្ឋាភិបាលអាមេរិក

មហាសេដ្ឋី Elon Musk ដែលកំពុងដឹកនាំកិច្ចខិតខំប្រឹងប្រែងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការ​បង្រួញរដ្ឋាភិបាលសហព័ន្ធបានផ្តល់ព័ត៌មានថ្មីៗអំពីកិច្ចខិតខំប្រឹងប្រែងនេះថា លោកកំពុងធ្វើការដើម្បីបិទទីភ្នាក់ងារជំនួយបរទេសរបស់សហរដ្ឋអាមេរិក (USAID)។ នេះបើយោងតាមការចេញផ្សាយរបស់សារព័ត៌មាន CNA​ នៅថ្ងៃទី៣ខែកុម្ភៈនេះ។

លោក Musk ដែលជានាយកប្រតិបត្តិរបស់ក្រុមហ៊ុន Tesla និង SpaceX ត្រូវបានលោក ត្រាំ ចាត់តាំងឱ្យដឹកនាំក្រុម​កាត់បន្ថយការចំណាយរបស់សហព័ន្ធ។ នៅក្នុងការសន្ទនាដែលរួមមានអតីតបេក្ខជនប្រធានាធិបតីមកពីគណបក្សសាធារណរដ្ឋ លោក Vivek Ramaswamy និងសមាជិកព្រឹទ្ធសភាមកពីគណបក្សសាធារណរដ្ឋលោក Joni Ernst បាននិយាយថាពួកគេកំពុងធ្វើការដើម្បីបិទ USAID។

លោក Musk បាននិយាយថា៖«វាហួសពីការជួសជុល» ដោយបន្ថែមថាប្រធានាធិបតី ត្រាំ យល់ស្របថាវាគួរតែត្រូវបានបិទ»។

បើតាម Reuters បានរាយការណ៍ថារដ្ឋបាលលោក ត្រាំ បានដកមន្ត្រីសន្តិសុខកំពូលពីរនាក់នៅ USAID កាលពីចុងសប្តាហ៍មុនគឺលោក John Voorhees និងអនុប្រធានរបស់គាត់គឺលោក Brian McGill បន្ទាប់ពីពួកគេបានព្យាយាមបញ្ឈប់អ្នកតំណាងមកពី DOGE របស់មហាសេដ្ឋី Musk ពីការទទួលបានសិទ្ធិចូលទៅគ្រប់គ្រងប្រព័ន្ធការងាររបស់អង្គការនេះ។

គួរបញ្ជាក់ថា USAID គឺជាម្ចាស់ជំនួយដ៏ធំបំផុតរបស់ពិភពលោក។ ក្នុងឆ្នាំ ២០២៣ សហរដ្ឋអាមេរិកបានបញ្ចេញជំនួយចំនួន៧២ពាន់លានដុល្លារទូទាំងពិភពលោកលើអ្វីៗគ្រប់យ៉ាងរាប់ចាប់តាំអពីសុខភាពស្ត្រីនៅក្នុងតំបន់ជម្លោះ ដើម្បីទទួល​បាន​ទឹកស្អាត ការព្យាបាលមេរោគអេដស៍ សន្តិសុខថាមពល និងការងារប្រឆាំងអំពើពុករលួយ។ អង្គការនេះបានផ្តល់៤២​ភាគរយនៃជំនួយមនុស្សធម៌ទាំងអស់ដែលត្រូវបានតាមដានដោយអង្គការសហប្រជាជាតិក្នុងឆ្នាំ​២០២៤​។

លោក ត្រាំ បានផ្តល់សិទ្ធិឲ្យក្រុមការងាររបស់លោក Musk ចូលប្រើ ឬគ្រប់គ្រងប្រព័ន្ធរដ្ឋាភិបាលជាច្រើន។ បើតាមទីភ្នាក់ងារព័ត៌មាន Reuters បានរាយការណ៍កាលពីថ្ងៃសុក្រថា ជំនួយការលោក Musk បានរារាំងមន្ត្រីរាជការអាជីពជាច្រើនចេញពីប្រព័ន្ធកុំព្យូទ័រ ខណៈដែលខ្លួនមានទិន្នន័យផ្ទាល់ខ្លួនរបស់បុគ្គលិកសហព័ន្ធរាប់លាននាក់។

លោក Musk បានធ្វើការផ្លាស់ប្តូរយ៉ាងឆាប់រហ័សដើម្បីរៀបចំទីភ្នាក់ងារដែលគេស្គាល់ថាជាការិយាល័យគ្រប់គ្រងបុគ្គលិក។ ប្រភពបានបន្ថែមថា ក្រុមមួយរួមទាំងបុគ្គលិកបច្ចុប្បន្ន និងអតីតបុគ្គលិករបស់ Musk បានចូលកាន់តំណែងបញ្ជាការក្នុងការិយាល័យគ្រប់គ្រងបុគ្គលិកសហរដ្ឋអាមេរិក( OPM )កាលពីថ្ងៃទី ២០ ខែមករា ដែលជាថ្ងៃដែល ត្រាំ ចូលកាន់តំណែង។

ចាប់តាំងពីចូលកាន់តំណែងមក លោក ត្រាំ បានចាប់ផ្ដើមកំណែទម្រង់រដ្ឋាភិបាលដ៏ធំ ដោយបណ្តេញចេញ និងបញ្ឈប់មន្ត្រីរាជការរាប់រយនាក់នៅក្នុងជំហានដំបូងរបស់គាត់ឆ្ពោះទៅរកការកាត់បន្ថយការិយាធិបតេយ្យ កាត់បន្ថយការចំណាយ និងដំឡើងអ្នកស្មោះត្រង់បន្ថែមទៀត៕

អត្ថបទ៖ ប៊ុន សុភាព