ត្រាំ តម្រូវឲ្យអ៊ុយក្រែន យកធនធានរ៉ែកម្រមកដោះដូរ បើចង់បានជំនួយអាមេរិក តទៀត

ថ្លែងទៅកាន់អ្នកសារព័ត៌មានក្នុងការិយាល័យអូវ៉ាល់ កាលពីថ្ងៃចន្ទទី៣ខែកុម្ភៈឆ្នាំ២០២៥ ប្រមុខសេតវិមាន លោក ដូណាល់ ត្រាំ បានដាក់លក្ខខណ្ឌទៅអ៊ុយក្រែនថា បើទីក្រុងកៀវចង់ឲ្យអាមេរិកបន្តជួយដើម្បីទប់ទល់ជាមួយរុស្ស៊ីទៀតនោះ ពួកគេត្រូវតែផ្តល់ធនធានរ៉ែកម្រ «Rare Earth» មកវិញជាការដោះដូរ ហើយប្រទេសទាំងពីរត្រូវធ្វើកិច្ចសន្យាជាមួយគ្នា ដើម្បីកុំឲ្យទីក្រុងវ៉ាស៊ីនខ្វល់ខ្វាយ។ នេះបើតាមការចុះផ្សាយរបស់ AP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមខែមករាឆ្នាំ២០២៥ រដ្ឋបាលអាមេរិកចាស់ ក្រោមការដឹកនាំរបស់លោក ចូ បៃដិន បានជួយទាំងផ្នែកយោធានិងហិរញ្ញវត្ថុដល់អ៊ុយក្រែន អស់ទឹកប្រាក់ជាង ៦២ពាន់លានដុល្លារ ដើម្បីយកទៅប្រយុទ្ធក្នុងសង្គ្រាមជាមួយរុស្ស៊ី។ 

ដូច្នេះហើយ លោកត្រាំត្អូញត្អែរថា «អាមេរិកបានជួយអ៊ុយក្រែនច្រើនពេកហើយ សំខា​ន់ច្រើនជាងដៃគូអឺរ៉ុបណាណាទាំងអស់ អ៊ីចឹងយើងត្រូវតែមានកិច្ចព្រមព្រៀងជាមួយអ៊ុយក្រែន ដោយពួកគេត្រូវតែផ្តល់ធនធានរ៉ែកម្រនិងរបស់ផ្សេងទៀតមកឲ្យយើងវិញ បើពួកគេចចង់បានជំនួយបន្ត»។

ទន្ទឹមនោះ លោក ត្រាំ លើកឡើងថា «ខ្ញុំចង់ធានាសន្តិសុខចំពោះធនធានកម្រ។ យើង​ដាក់​ប្រាក់​រាប់រយ​ពាន់​លាន​ដុល្លាររួចទៅហើយ។ អ៊ុយក្រែនមានធនធានកម្រដ៏អស្ចារ្យ ហើយអ៊ុយក្រែនក៏សុខចិត្តដែរចំពោះរឿងនេះ»។ 

យោងតាមរបាយការណ៍វេទិកាសេដ្ឋកិច្ចពិភពលោកឆ្នាំ២០២៤, អ៊ុយក្រែន ជាប្រទេសមានសក្តានុពលធំធេង ក្នុងនាមជាអ្នកផ្គត់ផ្គង់វត្ថុធាតុដើមសំខាន់ៗទូទាំងពិភពលោកដែលចាំបាច់សម្រាប់វិស័យឧស្សាហកម្មការពារជាតិ បច្ចេកវិទ្យាទំនើប និងថាមពលបៃតង។ ប្រទេសនេះមានទុនបម្រុងទីតានីញ៉ូមធំជាងគេនៅអឺរ៉ុប ហើយស្មើនឹង៧% នៃទុនបម្រុងពិភពលោក។ ពិសេស មុនពេលជម្លោះជាមួយរុស្ស៊ីផ្ទុះឡើងក្នុងឆ្នាំ២០២២ អ៊ុយក្រែនគឺជាអ្នកផ្គត់ផ្គង់ទីតានីញ៉ូមដ៏សំខាន់សម្រាប់ឧស្សាហកម្មយោធា ទៀតផង។

ចំពោះលោហធាតុកម្រ គេដឹងថានៅអ៊ុយក្រែនមានដូចជា បេរីលីយ៉ូម ម៉ង់ហ្គាណែស ហ្គាលីញ៉ូម អ៊ុយរ៉ាញ៉ូម ហ្សីកញ៉ូម ក្រាហ្វីត អាប៉ាទីត ហ្វ្លុយអូរីត និងនីកែល។ មិនត្រឹមប៉ុណ្ណឹង ប្រទេសនេះក៏មានទុនបម្រុងលីចូមធំបំផុតប្រចាំអឺរ៉ុបផងដែរ ដែលគេប៉ាន់ស្មានថាមានចំនួន ៥០០ ០០០តោន៕

អត្ថបទ៖ សុខ សុវណ្ណ

ចុចអាន៖ ត្រាំ ផ្អាកយកពន្ធលើម៉ិកស៊ិកនិងកាណាដា ៣០ថ្ងៃសិន