ហ្វីលីពីន ប្រកាស​អាសន្ន​សន្តិសុខ​ស្បៀងអាហារ

ប្រទេសហ្វីលីពីន កាលពីថ្ងៃចន្ទ​ទី​៣​ខែ​កុម្ភៈ​ឆ្នាំ​២០២៥ បានប្រកាស​អាសន្នសន្តិសុខស្បៀង​អាហារ ដើម្បីកាត់បន្ថយតម្លៃអង្ករ​លក់​រាយ ដែលក្រុមមន្ត្រីបាននិយាយថា តម្លៃ​អង្ករ​នៅតែខ្ពស់ បើទោះបីជាមានការកាត់បន្ថយពន្ធយ៉ាងច្រើនក៏ដោយ។

លោក Francisco Tiu-Laurel រដ្ឋលេខាធិការក្រសួងកសិកម្ម បាននិយាយនៅក្នុងសេចក្តីថ្លែងការណ៍មួយថា៖ «ការប្រកាសអាសន្ននេះអនុញ្ញាតឲ្យយើងបញ្ចេញស្តុកអង្ករដែលគ្រប់គ្រងដោយអាជ្ញាធរចំណីអាហារជាតិ ដើម្បីធ្វើ​ឲ្យ​តម្លៃ​មាន​ស្ថិរភាព និងធានាថា អ្នក​ប្រើប្រាស់​នៅ​តែ​អាច​មាន​លទ្ធភាព​ទិញ​អង្ករដែលជាអាហារសំខាន់សម្រាប់ប្រជាជនហ្វីលីពីនរាប់លាននាក់»។

លោក Francisco បាន​បន្ថែម​ថា ការ​ប្រកាស​អាសន្ន​នេះ នឹង​នៅ​តែ​អនុវត្ត​រហូត​ដល់​ស្ថានភាព​តម្លៃ​អង្ករ​មាន​ភាព​ល្អ​ប្រសើរ​ឡើង​វិញ។

នាយកដ្ឋានកសិកម្ម បាន​ឲ្យ​ដឹង​ថា ទោះបីជាមានការខិតខំប្រឹងប្រែងដើម្បីធ្វើសេរីភាវូបនីយកម្មការនាំចូលអង្ករ និងកាត់បន្ថយពន្ធក៏ដោយ ទីផ្សារក្នុងស្រុកមានការឆ្លើយតបយឺត ជាមួយនឹងតម្លៃលក់រាយលើសពីការរំពឹងទុក។

នាយកដ្ឋាន បានបន្ត​ថា ពាក់កណ្តាលនៃ​អង្ករ​ស្តុក​ទុកបណ្តោះអាសន្នចំនួន ៣០​ម៉ឺន​តោនដែលអាជ្ញាធរចំណីអាហារជាតិកាន់កាប់នាពេលបច្ចុប្បន្ន អាចនឹងត្រូវបានបញ្ចេញក្នុងរយៈពេល៦​ខែខាងមុខ ដើម្បីធានាការផ្គត់ផ្គង់សម្រាប់គ្រាអាសន្ន និងការឆ្លើយតបគ្រោះមហន្តរាយ។

អត្រានៃការកើនឡើងតម្លៃអង្ករប្រចាំឆ្នាំនៅក្នុងប្រទេសហ្វីលីពីន បានឡើងដល់កម្រិតខ្ពស់​បំផុត​​ក្នុង​រយៈពេល ១៥ឆ្នាំ គឺ ២៤,៤​% ក្នុងខែមីនាឆ្នាំ​២០២៤ តែ​បាន​ធ្លាក់​​ចុះ​មក​ត្រឹម ០,៨% នៅ​ក្នុងខែធ្នូ ដោយជួយរក្សាអតិផរណាសរុបសម្រាប់ឆ្នាំ​២០២៤ ក្នុងគោលដៅរបស់រដ្ឋាភិបាលពី ២% ទៅ ៤%។

កាលពីឆ្នាំមុន ហ្វីលីពីន បានបន្ទាបពន្ធលើអង្ករ និងបានបន្តកាត់បន្ថយពន្ធគយដែលមានស្រាប់លើទំនិញមួយចំនួនទៀត ដើម្បីប្រយុទ្ធប្រឆាំងនឹងអតិផរណា និងធានាការផ្គត់ផ្គង់ឲ្យបានគ្រប់គ្រាន់៕

ដោយ៖ ឈាង