ព័ត៌មានអន្ដរជាតិ

លោក Yoon ប្រឈមការស៊ើបអង្កេតថ្មីៗ ខណៈសវនាការតុលាការធម្មនុញ្ញសល់៥ដងទៀត

បានផុស

៤ សប្តាហ៍ មុន

នៅ

ថ្ងៃអង្គារ ៤ កុម្ភៈ ២០២៥

ដោយ

ប្រព័ន្ធផ្សព្វផ្សាយក្នុងប្រទេសកូរ៉េខាងត្បូង បានរាយការណ៍ថា គណៈកម្មាធិការសភារបស់ប្រទេសកូរ៉េខាងត្បូងបានចេញដីកានៅថ្ងៃអង្គារបង្គាប់ឲ្យនាំខ្លួន លោក Yoon Suk Yeol ប្រធានាធិបតីដែលត្រូវបានចោទប្រកាន់ និងអតីតរដ្ឋមន្ត្រីការពារជាតិ និងមេដឹកនាំយោធា៦រូបផ្សេងទៀតដែលពាក់ព័ន្ធនឹងការប្រកាសច្បាប់អាជ្ញាសឹកបស់គាត់កាលពីដើមខែធ្នូឆ្នាំមុន។

លោក Yoon Suk Yeol ប្រធានាធិបតីដែលត្រូវបានចោទប្រកាន់។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មាន Yonhap បានរាយការណ៍ថា គណៈកម្មាធិការពិសេសដឹកនាំដោយគណបក្សប្រជាជាធិបតេយ្យដែលជាបក្សប្រឆាំង ដែលស៊ើបអង្កេតការចោទប្រកាន់លើការបះបោររបស់លោក Yoon បានចេញបញ្ជាបន្ទាប់ពីអតីតរដ្ឋមន្ត្រីការពារជាតិ លោក Kim Yong-hyun និងមេដឹកនាំយោធា២នាក់ផ្សេងទៀតមិនបានបង្ហាញខ្លួននៅចំពោះមុខគណៈកម្មាធិការ។

តុលាការធម្មនុញ្ញក៏កំពុងបើកសវនាការលើសំណុំរឿងចោទប្រកាន់ប្រឆាំង លោក Yoon ក្នុងអំឡុងពេលថ្ងៃដែលអតីតមេបញ្ជាការយោធាពីរនាក់ និងអតីតមន្ត្រីទីភ្នាក់ងារចារកម្មម្នាក់ត្រូវបានគេរំពឹងថានឹងបង្ហាញខ្លួននៅចំពោះមុខតុលាការដើម្បីផ្តល់សក្ខីកម្មក្នុងនាមជាសាក្សី។

កាលពីថ្ងៃចន្ទ ប៉ូលីសកូរ៉េខាងត្បូងបានធ្វើការវាយឆ្មក់មួយទៀតទៅលើភ្នាក់ងារសន្តិសុខប្រធានាធិបតី (PSS) ជុំវិញការចោទប្រកាន់ថា ខ្លួនបានព្យាយាមរារាំងអ្នកស៊ើបអង្កេតពីការប្រតិបត្តិដីកាដើម្បីឃុំខ្លួន Yoon កាលពីខែមុន។

ការរារាំងរបស់កងកម្លាំងសន្តិសុខការពារសុវត្ថិភាពប្រធានាធិបតីកាលពីខែមករា បាននាំទៅដល់ការបរាជ័យក្នុងការនាំខ្លួនលោក Yoon ទៅសួរចម្លើយ ដែលអនុវត្តដោយការិយាល័យប្រឆាំងអំពើពុករលួយសម្រាប់មន្ត្រីជាន់ខ្ពស់ (CIO)។ ប៉ុន្តែទោះបីមានការរារាំងពីសំណាក់ប្រជាជនគាំទ្រផង និង កងអង្គរក្សផង លោក Yoon នៅតែត្រូវបាននាំខ្លួនកាលពីពាក់កណ្តាលខែមករា។

ស្ថិតក្រោមការចោទប្រកាន់របស់តុលាលារក្រុងសេអ៊ូល លោក Yoon កំពុងស្ថិតក្រោមការស៊ើបអង្កេតព្រហ្មទណ្ឌពីបទរំលោភអំណាច និងដឹកនាំការបះបោរ ដែលធ្វើឱ្យគាត់ក្លាយជាប្រធានាធិបតីដំបូងគេដែលត្រូវបានចាប់ខ្លួន ហើយ គាត់ក៏ត្រូវជាប់បម្រាមធ្វើដំណើរដែរ។

Yoon ត្រូវបាននាំខ្លួនជាលើកដំបូងនៅថ្ងៃទី១៥ខែមករា ហើយត្រូវបានចាប់ខ្លួនជាផ្លូវការនៅថ្ងៃទី១៩ខែមករា ក្នុងការស៊ើបអង្កេតពង្រីកលើក្រឹត្យច្បាប់អាជ្ញាសឹកដែលគាត់បានការពារ ហើយនៅថ្ងៃទី២៦ខែមករា លោកត្រូវបានចោទប្រកាន់អំពីការបះបោរនិងរំលោភអំណាច។

លោក Yoon ត្រូវបានព្យួរពីតំណែងចាប់តាំងពីថ្ងៃទី ១៤ខែធ្នូ នៅពេលដែលសភាបោះឆ្នោតចោទប្រកាន់គាត់ ហើយឥឡូវនេះសំណុំរឿងរបស់គាត់គឺនៅចំពោះមុខតុលាការធម្មនុញ្ញដែលមានពេលរហូតដល់ប្រាំមួយខែដើម្បីសម្រេចថាតើត្រូវដកលោក Yoon ចេញពីតំណែងឬក៏ត្រូវដាក់គាត់ឡើងវិញ។

ទោះបីជាបែបនេះក្តី តាមសេចក្តីរាយការណ៍របស់សារព័ត៌មាន Korea Pro ដំណើរការសវនាការប្រឆាំងលោក Yoon នៅតុលាការធម្មនុញ្ញជិតបញ្ចប់ហើយ ដោយនៅសល់តែ៥ដងទៀតប៉ុណ្ណោះ និងឈានដល់សេចក្តីសន្និដ្ឋាន។ ការប្រកាសសាលាក្រមរបស់តុលាការធម្មនុញ្ញរំពឹងធ្វើឡើងនៅក្នុងខែមីនាខាងមុខ៕

ដោយ រ៉ាន់ រើយ