ព័ត៌មានអន្ដរជាតិ

ចិន ប្រកាសដាក់ពន្ធ ១០% ទៅ ១៥% លើអាមេរិក ដើម្បីប្រឆាំងនឹងលោក ត្រាំ

បានផុស

២ ខែ មុន

នៅ

ថ្ងៃអង្គារ ៤ កុម្ភៈ ២០២៥

ដោយ

Chheang

រដ្ឋាភិបាលក្រុងប៉េកាំង បានប្រកាសវិធានការសងសឹកប្រឆាំងនឹងសហរដ្ឋអាមេរិក ក្រោយពេលលោក ដូណាល់ ត្រាំ បានដាក់ពន្ធ ១០% លើទំនិញរបស់ចិន។ ចិន នឹងគិតពន្ធចំនួន ១០% ទៅ ១៥% លើការនាំចូលពីសហរដ្ឋអាមេរិកចំពោះទំនិញមួយចំនួន រួមមាន ប្រេងឆៅ គ្រឿងយន្តកសិកម្ម និងឧស្ម័នធម្មជាតិរាវ។

លោក ដូណាល់ ត្រាំ និងលោក ស៊ី ជីនពីង (រូបភាព៖ Financial Times)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិធានការនេះ ត្រូវបានប្រកាសដោយក្រសួងហិរញ្ញវត្ថុរបស់ប្រទេសចិននៅថ្ងៃអង្គារទី៤ខែកុម្ភៈឆ្នាំ២០២៥នេះ ដែលក្នុងនោះចិននឹងយកពន្ធ ១៥% លើការនាំចូលធ្យូងថ្ម និងផលិតផលឧស្ម័នធម្មជាតិរាវពីអាមេរិក និង ១០% លើការនាំចូលប្រេងឆៅ គ្រឿងចក្រកសិកម្ម យានជំនិះធំៗ និងរថយន្តភីកអាប់។

ចំណាត់ការសងសឹករបស់ទីក្រុងប៉េកាំង នឹងចូលជាធរមាននៅថ្ងៃទី១០ខែកុម្ភៈ។

ការប្រកាសរបស់ចិន បានកើតឡើងបន្ទាប់ពីប្រធានាធិបតីអាមេរិកបានចុះហត្ថលេខាលើបទបញ្ជាប្រតិបត្តិកាលពីថ្ងៃសៅរ៍ ដើម្បីដាក់ពន្ធ១០%លើទំនិញចិន។ បន្ថែមពីនេះ លោក ត្រាំ ក៏បានប្រកាសដំឡើងពន្ធ ២៥% លើប្រទេសកាណាដា និងម៉ិកស៊ិក ប៉ុន្តែក្រោយមកក៏ប្រកាសផ្អាកយកពន្ធលើប្រទេសទាំង២ រយៈពេល៣០ថ្ងៃសិន។

ក្រសួងពាណិជ្ជកម្មចិន នៅថ្ងៃអង្គារនេះក៏បានអះអាងផងដែរថា ខ្លួនបានប្ដឹងទៅកាន់អង្គការពាណិជ្ជកម្មពិភពលោក (WTO) អំពីបទបញ្ជាប្រតិបត្តិពន្ធ ១០% ដែលចេញដោយរដ្ឋបាលលោក ត្រាំ។

ក្រសួងពាណិជ្ជកម្មចិន បានចេញសេចក្ដីថ្លែងការណ៍ថា៖ «ការអនុវត្តរបស់សហរដ្ឋអាមេរិក ធ្វើឲ្យប៉ះពាល់យ៉ាងធ្ងន់ធ្ងរដល់ប្រព័ន្ធច្បាប់ពាណិជ្ជកម្មពហុភាគី ធ្វើឲ្យខូចដល់មូលដ្ឋានគ្រឹះនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិននិងសហរដ្ឋអាមេរិក និងធ្វើឲ្យរំខានដល់ស្ថិរភាពនៃខ្សែសង្វាក់ឧស្សាហកម្ម និងការផ្គត់ផ្គង់សកល»៕

ដោយ៖ ឈាង

ចុចអាន៖ ត្រាំ ផ្អាកយកពន្ធលើម៉ិកស៊ិកនិងកាណាដា ៣០ថ្ងៃសិន