Su-30SM របស់រុស្ស៊ី បាញ់ទម្លាក់យន្តហោះចម្បាំងអ៊ុយក្រែន នៅចម្ងាយ ១៣០គីឡូម៉ែត្រ

ពិតជារឿងមិនធម្មតាទេ ដែលយន្តហោះចម្បាំងរុស្ស៊ី Su-30SM តម្លៃប្រហែល៥០លានដុល្លារអាមេរិក បានបាញ់ទម្លាក់យន្តហោះចម្បាំង Su-27 របស់អ៊ុយក្រែន ក្នុងចម្ងាយរហូតដល់ទៅ១៣០គីឡូម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bulgarian Military កាលពីថ្ងៃចន្ទទី៣ខែកុម្ភៈឆ្នាំ២០២៥, យន្តហោះរុស្ស៊ី ​បានប្រើមីស៊ីល R-37M ដើម្បីបាញ់យន្តហោះតម្លៃ៣០លានដុល្លាររបស់អ៊ុយក្រែន ខណៈពេលគោលដៅរៀបនឹងទម្លាក់គ្រាប់បែក។

ក្រសួងការពារជាតិរុស្ស៊ី ក៏បានបញ្ជាក់ពីព័ត៌មាននេះដែរ ប៉ុន្តែមិនបកស្រាយលម្អិតឡើយថាតើ ការវាយប្រហារនេះកើតឡើងនៅទីតាំងណា។ លើសពីនេះ រុស្ស៊ីថែមទាំងសរសើរមីស៊ីល R-37M ថា មានសមត្ថភាពខ្ពស់និងបាញ់ចំគោលដៅច្បាស់ៗ ទៀតផង។

យ៉ាងណា ប្រព័ន្ធផ្សព្វផ្សាយរុស្ស៊ីរាយការណ៍ថា «យន្តហោះចម្បាំង Su-27 របស់អ៊ុយក្រែនដែលធ្លាក់ គឺជាកម្មសិទ្ធិរបស់កងពលតូចទ័ពអាកាសលេខ៨៣១ ដែលឈរជើងនៅមូលដ្ឋាន Mirgorod ក្នុងខេត្ត Poltava»។

រីឯអ៊ុយក្រែនឯណោះ បានបញ្ជាក់ថា នៅថ្ងៃមានការវាយប្រហារនេះ កាពីទែនរបស់ខ្លួនម្នាក់ឈ្មោះ Ivan Bolotov បានបាត់បង់ជីវិតក្នុងពេលបំពេញបេសកកម្ម។

សូមបញ្ជាក់ថា នេះមិនមែនទើបលើកដំបូងឡើយដែល រុស្ស៊ីបំពាក់ R-37M លើយន្តហោះចម្បាំង។ កាលមុន មីស៊ីលប្រភេទនេះ ក៏ត្រូវបានបំពាក់ជាមួយ MiG-31BM និង Su-35S ដែរ ក្នុងប្រតិបត្តិការល្បាតលើដែនអាកាសអ៊ុយក្រែន៕

អត្ថបទ៖ សុខ សុវណ្ណ

ចុចអាន៖ យន្តហោះចម្បាំងរុស្ស៊ីដ៏ថ្មីសន្លាងមួយគ្រឿងតម្លៃ ៦៥លានដុល្លារ ត្រូវអ៊ុយក្រែន កម្ទេច