ត្រាំ ថា អាមេរិក នឹងកាន់កាប់តំបន់ហ្គាហ្សា

ក្នុងសន្និសីទកាសែតជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu នៅសេតវិមាន, ប្រធានាធិបតីអាមេរិកលោក ដូណាល់ ត្រាំ លើកឡើងថា សហរដ្ឋអាមេរិកនឹងកាន់កាប់ជ្រោយហ្គាហ្សា ហើយអភិវឌ្ឍតំបន់នេះតាមរយៈការកសាងឡើងវិញ ដោះមីន បង្កើតការងារនិងស្តារសេដ្ឋកិច្ច។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃពុធទី៥ខែកុម្ភៈឆ្នាំ២០២៥, លោកត្រាំនិយាយថា យើងមិនអាចដើរតាមដានចាស់បានឡើយ បើមិនដូច្នេះទេ ប្រវត្តិសាស្ត្រនឹងកើតឡើងម្តងទៀត។ ហ្គាហ្សា ដិតដាមដោយការស្លាប់និងការបំផ្លិចបំផ្លាញអស់រយៈពេលជាច្រើនទសវត្សរ៍មកហើយ។

ស្របពេលជាមួយគ្នានោះ លោកត្រាំ ហៅទឹកដីប៉ាឡេស្ទីនថា «សំណាងអាក្រក់» ហើយអះអាងថា ប្រជាជន ១.៨លាននាក់នៅទីនោះចង់ចាកចេញទៅរស់នៅប្រទេសផ្សេងទៀត។ លោកនិយាយថា​ ពួកគេរស់នៅយ៉ាងវេទនា ហើយគួរតែចាកចេញ។ ប្រសិនបើពួកគេចាកចេញ នោះពួកគេនឹងមិនត្រូវបានបាញ់សម្លាប់ទេ។ ហេតុផលតែមួយគត់ដែលប្រជាជនរស់នៅក្នុងតំបន់ហ្គាហ្សាគឺព្រោះតែ ពួកគេគ្មានជម្រើស។

សន្និសីទនេះកើតឡើងបន្ទាប់ពីលោកត្រាំ ចុះហត្ថលេខាលើបញ្ជាប្រតិបត្តិ ដកសហរដ្ឋអាមេរិក ចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ ហើយប្រកាសឈប់ផ្តល់មូលនិធិឲ្យអង្គការ UNRWA យកទៅជួយតំបន់ហ្គាហ្សាទៀត។

សេចក្តីសម្រេចរបស់ប្រធានាធិបតីអាមេរិក គឺដោយសារតែលោកចោទថា ស្ថាប័ននេះ លម្អៀងប្រឆាំងនឹងអ៊ីស្រាអែលនិងខ្វះកំណែទម្រង់ ព្រមទាំងចោទថា វាមានទំនាក់ទំនងជាមួយក្រុមភេរវកម្មទៀតផង។

នេះមិនមែនទើបលើកដំបូងទេ ដែលលោក ត្រាំ ដកអាមេរិកចេញពីក្រុមប្រឹក្សាសិទ្ធិមនុស្ស ពោលគឺលោកបានធ្វើរឿងដដែលនេះ កាលពីឡើងកាន់តំណែងអាណត្តិទី១ ដោយលើកហេតុផលដូចគ្នា៕

អត្ថបទ៖ សុខ សុវណ្ណ

ចុចអាន៖ ត្រាំ ស៊ីញេ ដកអាមេរិក ចេញពីក្រុមប្រឹក្សាសិទ្ធិមនុស្ស UN