មនុស្ស​រាប់​ពាន់​នាក់​​នៅ​ក្រិក​​ត្រូ​វជម្លៀស​ចេញ​ពី​កោះ​​ Santorini ក្រោយរងរញ្ជួយដីជាង​៣០០ដង

អ្នកស្រុកនិងភ្ញៀសទេសចរាប់ពាន់នាក់កំពុងភៀសខ្លួនចេញពីកោះ Santorini ប្រទេសក្រិក បន្ទាប់ពីមាន​សញ្ញា​រញ្ជួយដីរាប់រយដង​​វាយប្រហារក្នុងរយៈពេល​៤៨ម៉ោងចុងក្រោយនេះ។ យោង​​ការចេញផ្សាយរបស់សារព័ត៌មានBBC នៅថ្ងៃទី៥ខែកុម្ភៈនេះ។

ក្នុងរយៈពេលពីរថ្ងៃចុងក្រោយនេះ សញ្ញា​នៃការ​រញ្ជួយដីច្រើនជាង៣០០ដងត្រូវបានកត់ត្រានៅជិតកោះនេះជាមួយនឹងការរញ្ជួយដីដ៏ធំមួយដែលមានកម្រិត៥រ៉ិចទ័រ ខណៈអ្នកជំនាញខ្លះនិយាយថា ការរញ្ជួយអាចបន្តរយៈពេលជាច្រើនសប្តាហ៍​​ទៅមុខ​​​ទៀត​​។ ជាការប្រុងប្រយ័ត្នអាជ្ញាធរបានបិទសាលារៀនរហូតដល់ថ្ងៃសុក្រ និងព្រមានពលរដ្ឋពីការប្រមូលផ្តុំគ្នាក្នុងផ្ទះ។

ប្រព័ន្ធផ្សព្វផ្សាយក្នុងស្រុក បាន​រាយការណ៍ថា កោះដែលប្រជាជនត្រឹមតែ១៥៥០០នាក់នេះបានជម្លៀសមនុស្សប្រហែល ៩០០០​នាក់ចេញ ចាប់តាំងពីថ្ងៃអាទិត្យ តាម​មធ្យោបាយ​ជើងហោះហើរសង្គ្រោះបន្ទាន់។ ក្នុងនោះមនុស្សប្រហែល ៦០០០​នាក់បានជម្លៀសតាម​​ផ្លូវ​ទឹក​​ ហើយ​មនុស្សពី​២៥០០ទៅ២៧០០នាក់ទៀតបានជម្លៀសតាមយន្តហោះតាមជើងហោះហើរពី Santorini ទៅទីក្រុង​អាតែន​ Athens។ នេះបើយោងតាមក្រុមហ៊ុនអាកាសចរណ៍ Aegean ។

សកម្មភាពរញ្ជួយដីជាបន្តបន្ទាប់ជាច្រើនថ្ងៃនេះបានធ្វើឱ្យអ្នកស្រុកមួយចំនួនដេកក្នុងរថយន្តរបស់ពួកគេ ដោយ​មិនហ៊ានដេកនៅក្នុងផ្ទះព្រោះ​ខ្លាចបាក់រលំ។ ទោះយ៉ាងណារហូតមកដល់ពេលនេះ មិនទាន់មានរបាយការណ៍អំពីការខូចខាតធំដុំនៅលើកោះនេះទេ ប៉ុន្តែវិធានការសង្គ្រោះបន្ទាន់កំពុងត្រូវបានធ្វើឡើងជាការប្រុងប្រយ័ត្ន។

គួរបញ្ជាក់ថា Santorini គឺជាគោលដៅទេសចរណ៍ដ៏ពេញនិយមមួយរបស់ប្រទេសក្រិក​​នៅតំបន់​អឺរ៉ុប​​។ កោះនេះគឺជាផ្នែកមួយនៃតំបន់ភ្នំភ្លើង Hellenic ដែលជាវាលភ្នំភ្លើងសកម្មបំផុតមួយនៅក្នុងទ្វីបអឺរ៉ុប។​

កាលពីខែកក្កដា​ឆ្នាំ១៩៥៦ កោះនេះរងការរញ្ជួយដីដ៏ធំបំផុតកម្រិត ៧.៥ រ៉ិចទ័រ បង្កជារលកយក្សស៊ូណាមិដែលមានកម្ពស់ ២៥ ម៉ែត្រ សម្លាប់មនុស្សយ៉ាងតិច៥៣នាក់និងជាង១០០នាក់រងរបួស ខណៈផ្ទះយ៉ាងហោចណាស់មួយភាគបីនៅលើកោះនេះបានដួលរលំ៕

អត្ថបទ៖ ប៊ុន សុភាព