ព័ត៌មានអន្ដរជាតិ

ត្រាំ ផ្ដែផ្ដាំទីប្រឹក្សាថា បើអ៊ីរ៉ង់ធ្វើឃាតលោក ត្រូវកម្ទេចអ៊ីរ៉ង់ឲ្យម៉ត់ដូចផេះ

បានផុស

៤ សប្តាហ៍ មុន

នៅ

ថ្ងៃពុធ ៥ កុម្ភៈ ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បាននិយាយថា លោកបានផ្តល់ការណែនាំដល់ទីប្រឹក្សារបស់លោក ដើម្បីកម្ចាត់អ៊ីរ៉ង់ បើប្រទេសនេះធ្វើឃាតលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បាននិយាយកាលពីថ្ងៃអង្គារទី៤កុម្ភៈ២០២៥ខណៈកំពុងចុះហត្ថលេខាលើបទបញ្ជាប្រតិបត្តិដោយអំពាវនាវឲ្យរដ្ឋាភិបាលអាមេរិកដាក់សម្ពាធជាអតិបរមាលើក្រុងតេហេរ៉ង់ថា៖ «ប្រសិនបើពួកគេធ្វើដូច្នេះ ពួកគេនឹងត្រូវកម្ទេចចោលទាំងស្រុង»។

លោកបានបន្ថែមថា៖ «ខ្ញុំផ្ដែផ្ដាំថាបើពួកគេធ្វើវា ពួកគេនឹងត្រូវបានបំផ្លាញចោល វានឹងមិនមានអ្វីនៅសេសសល់នោះទេ»។

អាជ្ញាធរសហព័ន្ធអាមេរិក បានតាមដាន«ការគំរាមកំហែងរបស់អ៊ីរ៉ង់» ប្រឆាំងនឹងលោក ត្រាំ និងមន្ត្រីរដ្ឋបាលផ្សេងទៀតអស់រយៈពេលជាច្រើនឆ្នាំ។ កាលពីឆ្នាំ២០២០ លោក ត្រាំ ធ្លាប់បានបញ្ជាឲ្យកងកម្លាំងអាមេរិកសម្លាប់លោក Qassem Soleimani ដែលដឹកនាំកងកម្លាំង Quds របស់កងឆ្មាំបដិវត្តន៍អ៊ីស្លាមអ៊ីរ៉ង់។

យោងតាមមន្ត្រីអាមេរិក ការគំរាមកំហែងលើអាយុជីវិតរបស់លោក ត្រាំ ពីប្រទេសអ៊ីរ៉ង់ បានជំរុញឲ្យមានការបន្ថែមកងកម្លាំងសន្តិសុខនៅប៉ុន្មានថ្ងៃមុនការប្រមូលផ្តុំយុទ្ធនាការកាលពីខែកក្កដានៅរដ្ឋ Pennsylvania ដែលជាកន្លែងលោក ត្រាំ ត្រូវបានគេបាញ់ចំត្រចៀក។

ប៉ុន្តែក្រុមមន្ត្រីនៅពេលនោះបាននិយាយថា ពួកគេមិនជឿថាអ៊ីរ៉ង់ជាប់ពាក់ព័ន្ធនឹងការប៉ុនប៉ងធ្វើឃាតនោះទេ។

ក្រសួងយុត្តិធម៌ បានអះអាងកាលពីខែវិច្ឆិកាឆ្នាំមុនថា ផែនការរបស់អ៊ីរ៉ង់ដើម្បីសម្លាប់លោក ត្រាំ មុនពេលការបោះឆ្នោតប្រធានាធិបតីត្រូវបានរារាំង។

នាយកដ្ឋាននេះ បានចោទប្រកាន់មន្ត្រីអ៊ីរ៉ង់ថាបានណែនាំបុរសម្នាក់ឈ្មោះ Farhad Shakeri អាយុ៥១ឆ្នាំ កាលពីខេកញ្ញាឲ្យឃ្លាំមើលនិងប៉ុនប៉ងធ្វើឃាតលោក ត្រាំ។ បច្ចុប្បន្ន Shakeri នៅមិនទាន់ត្រូវបានគេចាប់ខ្លួននៅឡើយទេក្នុងប្រទេសអ៊ីរ៉ង់។

មន្ត្រីអ៊ីរ៉ង់នៅពេលនោះបានច្រានចោលការចោទប្រកាន់នេះ ដោយបានហៅរបាយការណ៍នេះថាជាផែនការរបស់អ៊ីស្រាអែល ដើម្បីធ្វើឲ្យទំនាក់ទំនងអ៊ីរ៉ង់ និងអាមេរិកកាន់តែស្មុគស្មាញ៕

ដោយ៖ ឈាង

ចុចអាន៖ លោក ត្រាំ ចេញបញ្ជាធ្វើយ៉ាងណាឲ្យអ៊ីរ៉ង់មិនអាចលក់ប្រេងសូម្បីមួយតំណក់