ព័ត៌មានអន្ដរជាតិ

គីមឈីជិត១១តោនត្រូវបានមន្ត្រីកូរ៉េរឹបអូសពីអ្នកដំណើរតាមយន្តហោះក្នុងឆ្នាំ២០២៤

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

ក្រុមមន្ត្រីដែលអនុវត្តច្បាប់គ្មានសារធាតុរាវនៅអាកាសយានដ្ឋានអន្តរជាតិ Incheon របស់ប្រទេសកូរ៉េខាងត្បូង បានរឹបអូស គីមឈីប្រមាណជិត១១តោនពីអ្នកដំណើរជាច្រើនក្នុងឆ្នាំ២០២៤។ នេះបើយោងតាមការចេញផ្សាយរបស់សារព័ត៌មានCNNនៅថ្ងៃទី០៦ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាធម្មតាក្រុមមន្ត្រីដែលអនុវត្តច្បាប់គ្មានសារធាតុរាវនៅអាកាសយានដ្ឋានអន្តរជាតិ Incheon របស់ប្រទេសកូរ៉េខាងត្បូងបានរឹបអូសពពួកសារធាតុរាវដូចជា ដបទឹក ប្រភេទជែល និងប្រភេទគ្រីមលាបមុខជាដើម ប៉ុន្តែឥឡូវនេះ មន្រ្តីបានមមាញឹកក្នុងការរឹបអូសយកទំនិញដែលមិនត្រូវបានអនុញ្ញាតមួយទៀតគឺ គីមឈី ដែលជាបន្លែមានជាតិប្រៃ និងផ្អាប់ទុកជាអាហារដ៏សំខាន់របស់ជនជាតិកូរ៉េ។

សេចក្តីប្រកាសរបស់អាកាសយានដ្ឋាន បានឱ្យដឹងថា កាលពីឆ្នាំមុន មន្ត្រីនៅអាកាសយានដ្ឋានអន្តរជាតិ Incheon (ICN) បានរឹបអូសគីមឈីសរុបចំនួន១០.៧តោនពីអ្នកដំណើរដែលបំពានលើការហាមឃាត់លើវត្ថុរាវនៅក្នុងវ៉ាលីពួកគេ។

ដូចអាកាសយានដ្ឋានជាច្រើនទៀតនៅជុំវិញពិភពលោក មន្រ្តីនៅ ICN បានហាមឃាត់សារធាតុរាវ និងជែលលើសពី១០០មីលីលីត្រ នៅក្នុងវ៉ាលីសម្រាប់ដាក់តាមខ្លួន ហើយគីមឈីត្រូវបានរឹបអូសគឺដោយសារវាត្រូវបានវេចខ្ចប់ទុកមុនក្នុងដប ក្រឡ ឬថង់ប្លាស្ទិក ហើយត្រាំក្នុងទឹកជ្រលក់ហឹរ ដែលត្រូវបានចាត់ទុកជាវត្ថុរាវ។

ក្រៅពីរឹបអូស គីមឈី នៅទូទាំងឆ្នាំ២០២៤ មន្ត្រីអាកាសយានដ្ឋាននេះ ក៏បានរឹបអូសបាន Jang ចំនួន១០,៥ តោន។ Jang ជាប្រភេទទឹកជ្រលក់និងម្សៅគ្រឿងទេសប្រពៃណីកូរ៉េ។

យោងតាមមន្ត្រីអាកាសយានដ្ឋានទំនិញដែលរឹបអូសបានជាទូទៅត្រូវបានបោះចោល ឬបរិច្ចាគ ប៉ុន្តែគីមឈី ១០.៧ តោនត្រូវបានបរិច្ចាគទៅមជ្ឈមណ្ឌលសុខុមាលភាពសហគមន៍ក្នុងតំបន់។

គួរបញ្ជាក់ថា គីមឈី គឺជាមុខម្ហូបបែបប្រពៃណីរបស់កូរ៉េ (banchan) ដែលមានបន្លែលាយអំបិល និងផ្អាប់ទុក ដែលភាគច្រើនធ្វើពីស្ពៃក្តោបកូរ៉េ លាយមួយគ្រឿងទេសជាច្រើនទៀត។ គីមឈី ក៏ត្រូវបានគេប្រើក្នុងស៊ុប និងសម្លច្រើនប្រភេទផងដែរ។ វាជាអាហារសំខាន់ក្នុងម្ហូបកូរ៉េ ហើយត្រូវបានគេទទួលទានជាគ្រឿងផ្សំជាមួយនឹងអាហារកូរ៉េស្ទើរគ្រប់មុខ៕