ព័ត៌មានអន្ដរជាតិ

ប៉ូលិសថៃចាប់ខ្លួនមេខ្លោង Call-Center ចិន២នាក់នៅបាងកក

បានផុស

៥ ថ្ងៃ មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

មេខ្លោងមជ្ឈមណ្ឌលឆបោកតាមទូរស័ព្ទ ( Call- Center) ជាជនជាតិចិន២នាក់ត្រូវបានចាប់ខ្លួននៅទីក្រុងបាងកកប្រទេសថៃ ដោយប៉ូលិសបានរឹបអូសទ្រព្យសម្បត្តិដែលមានតម្លៃ១៥.៣ លានបាត (៤៥ម៉ឺនដុល្លារ)។ នេះបើយោងតាមការចេញផ្សាយរបស់សារព័ត៌មាន The Nation នៅថ្ងៃទី៦ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសក្រុងបាងកក បានចាប់ខ្លួនមេខ្លោង២នាក់ដែលនៅពីក្រោយក្រុមឆបោកដែលហៅថា Call- Center ជាច្រើនដែលប្រតិបត្តិការពីប្រទេសជិតខាងរបស់ប្រទេសថៃ។ ការចាប់ខ្លួនបានធ្វើឡើងកាលពីយប់ថ្ងៃពុធ ភ្លាមៗបន្ទាប់ពីតុលាការព្រហ្មទណ្ឌបានចេញដីកាចាប់ខ្លួនពួកគេ។

ជនសង្ស័យទាំងពីរមានជាប់ពាក់ព័ន្ធនឹងប្រតិបត្តិការឆបោកឆ្លងដែននិងប្រតិបត្តិការលាងលុយដែលមានគោលដៅលើជនរងគ្រោះតាមអ៊ីនធឺណិត។ ជនសង្ស័យទាំងពីរនាក់ មានឈ្មោះ Ye Wanyou អាយុ២៩នាំ និង Li Weijie អាយុ៣០ឆ្នាំ។

ក្រោយការចាប់ខ្លួន ប៉ូលិសរឹបអូសបានទ្រព្យសម្បត្តិដែលមានតម្លៃ ១៥,៣លានបាត ដែលជារបស់ជនសង្ស័យក្នុងនោះមានរថយន្ត Mercedes-Benz តម្លៃ១១លានបាត រួមជាមួយទូរស័ព្ទទំនើបចំនួន៥គ្រឿងដែលមានទិន្នន័យសំខាន់ៗដែលភ្ជាប់ទៅនឹងប្រតិបត្តិការឆបោកតាមមជ្ឈមណ្ឌលឆបោកតាមទូរស័ព្ទជាច្រើននៅក្នុងប្រទេសជិតខាង។

ការចាប់ខ្លួនពួកគេបានធ្វើឡើងបន្ទាប់ពីការស៊ើបអង្កេតយ៉ាងទូលំទូលាយដោយស្ថានីយ៍ប៉ូលិស Hua Mak ដែលត្រូវបានជំរុញដោយពាក្យបណ្តឹងជាច្រើនពីជនរងគ្រោះនៃការឆបោក។ ជនរងគ្រោះត្រូវបានគេរាយការណ៍ថាត្រូវបានក្រុមអ្នកឆបោកបន្លំខ្លួនជាប៉ូលិស ឬមន្ត្រីការិយាល័យប្រឆាំងការលាងលុយ។ អ្នកបោកប្រាស់បានផ្សព្វផ្សាយនៅលើ Facebook ដោយ អះអាងថា ជួយជនរងគ្រោះក្នុងការយកលុយដែលបាត់មកវិញ។ ប៉ុន្តែពេលទាក់ទងមកជនរងគ្រោះចាញ់បោកលុយថែមទៀត។

ប៉ូលិសបញ្ជាក់ថា មានការភ្ជាប់ទៅនឹងក្រុមឆបោក Call- Center ជាអន្តរជាតិ បើយោងតាមទិន្នន័យដែលស្រង់ចេញពីស្មាតហ្វូនរបស់ជនសង្ស័យបានបញ្ជាក់ថា ពួកគេបានគ្រប់គ្រងការឆបោកទាំងនោះពីចម្ងាយ៕