ព័ត៌មានអន្ដរជាតិ

លោក ត្រាំ ថានឹងអាចជួបជាមួយលោក ហ្សេលេនស្គី នៅសប្ដាហ៍ក្រោយក្នុងក្រុងវ៉ាស៊ីនតោន

បានផុស

៣៧ វិនាទី មុន

នៅ

ថ្ងៃសៅរ៍ ៨ កុម្ភៈ ២០២៥

ដោយ

Chheang

កិច្ចពិភាក្សាអំពីសង្គ្រាមអ៊ុយក្រែន ដើម្បីទប់ទល់នឹងការឈ្លានពានរបស់រុស្ស៊ីជាមួយលោក វ៉ា្លឌីមៀ ហ្សេលេនស្គី ប្រហែលនឹងអាចធ្វើឡើងនៅសប្ដាហ៍ក្រោយ។ នេះជាការលើកឡើងរបស់ប្រធានាធិបតីអាមេរិក លោក ដូណាល់ ត្រាំ កាលពីថ្ងៃសុក្រទី៧ខែកុម្ភៈឆ្នាំ២០២៥។

លោក វ៉ា្លឌីមៀ ហ្សេលេនស្គី និងលោក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា លោក ត្រាំ មិនបានបញ្ជាក់ច្បាស់ថាតើជំនួបជាមួយមេដឹកនាំអ៊ុយក្រែននេះគឺជាជំនួបទល់មុខគ្នាផ្ទាល់ ឬជាសន្និសីទតាមវីដេអូនោះទេ។

លោក ត្រាំ បាននិយាយថា លោកនឹង«ប្រហែលជានឹងជួបជាមួយប្រធានាធិបតី ហ្សេលេនស្គី នៅសប្តាហ៍ក្រោយ» ហើយលោកក៏បានបង្ហាញចំណាប់អារម្មណ៍ម្តងទៀត ក្នុងការជួបជាមួយប្រធានាធិបតីរុស្ស៊ី លោក វ៉ា្លឌីមៀរ ពូទីន ផងដែរ ដែលលោកតែងបរិយាយថាមាន«ទំនាក់ទំនងល្អ»នឹងគ្នា។

សម្រាប់ទីតាំងនៃកិច្ចប្រជុំជាមួយលោក ហ្សេលេនស្គី លោក ត្រាំ បានកត់សម្គាល់ថា វានឹងត្រូវឡើងនៅក្នុងទីក្រុងវ៉ាស៊ីនតោន ហើយបាននិយាយថា លោកនឹងមិនទៅប្រទេសអ៊ុយក្រែនឡើយ។

ពាក់ព័ន្ធនឹងការលុកលុយរយៈពេលបីឆ្នាំរបស់រុស្ស៊ីលើអ៊ុយក្រែន លោក ត្រាំ បានប្រាប់ថា៖ «ខ្ញុំចង់ឃើញវាបញ្ចប់ ដោយផ្អែកលើមូលដ្ឋានមនុស្ស។ ខ្ញុំចង់ឃើញទីបញ្ចប់។ វាជាសង្រ្គាមដ៏គួរឲ្យអស់សំណើចមួយ»។

ប្រធានាធិបតីអាមេរិក បានលើកឡើងទៀតថា លោកចង់និយាយជាមួយលោក ហ្សេលេនស្គី អំពីសន្តិសុខសម្រាប់ទ្រព្យសម្បត្តិអ៊ុយក្រែន ដូចជា រ៉ែកម្រ និងចង់បានបរិមាណស្មើគ្នានៃរ៉ែទាំងនោះ ដើម្បីជាថ្នូរនឹងការគាំទ្ររបស់សហរដ្ឋអាមេរិក។

ប្រធានបុគ្គលិករបស់លោក ហ្សេលេនស្គី គឺលោក Andy Yermak បានឲ្យដឹងថា អ៊ុយក្រែនដែលចង់បានការបន្តការគាំទ្ររបស់អាមេរិកក្នុងសង្រ្គាមរបស់ខ្លួនជាមួយនឹងរុស្ស៊ី កំពុងទន្ទឹងរង់ចាំដំណើរទស្សនកិច្ចក្នុងខែនេះ ដោយបេសកជនពិសេសរបស់លោក ត្រាំ ប្រចាំតំបន់ គឺលោក Keith Kellogg។

លោក Yermak បានប្រាប់ថា លោកបាននិយាយជាមួយលោក Kellogg អំពីប្រធានបទមួយចំនួន រួមទាំងស្ថានភាពសមរភូមិ សុវត្ថិភាពរបស់ជនស៊ីវិលអ៊ុយក្រែន និងកិច្ចប្រជុំនៅឯសន្និសីទសន្តិសុខប្រចាំឆ្នាំនៅទីក្រុង Munich នាចុងខែកុម្ភៈនេះ៕

ដោយ៖ ឈាង