ព័ត៌មានអន្ដរជាតិ

អាមេរិក អនុម័តការលក់សព្វាវុធតម្លៃជាង ៧ពាន់លានដុល្លារឲ្យអ៊ីស្រាអែល

បានផុស

១ នាទីute មុន

នៅ

ថ្ងៃសៅរ៍ ៨ កុម្ភៈ ២០២៥

ដោយ

Chheang

ក្រសួងការបរទេសអាមេរិក បានអនុម័តការលក់សព្វាវុធតម្លៃ ៧,៤ពាន់លានដុល្លារ ឲ្យទៅប្រទេសអ៊ីស្រាអែល ដោយក្នុងនោះ ៦,៧៥ពាន់លានដុល្លារសម្រាប់គ្រាប់បែក និង ៦៦០លានដុល្លារសម្រាប់មីស៊ីល Hellfire។

កងទ័ពអាមេរិកកំពុងលើកមីស៊ីល Hellfire ដាក់លើឧទ្ធម្ភាគចក្រ (រូបថត៖ US Army)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសហប្រតិបត្តិការសន្តិសុខការពារជាតិអាមេរិក (DSCA) ការលក់គ្រាប់បែកទាំងនេះ នឹងធ្វើឲ្យប្រសើរឡើងនូវសមត្ថភាពរបស់អ៊ីស្រាអែល ដើម្បីឆ្លើយតបនឹងការគំរាមកំហែងនាពេលបច្ចុប្បន្ន និងអនាគត ពង្រឹងការការពារមាតុភូមិរបស់ខ្លួន និងបម្រើជាការរារាំងដល់ការគំរាមកំហែងក្នុងតំបន់។

DSCA បានបន្ថែមថា ចំណែកឯការលក់មីស៊ីលឲ្យអ៊ីស្រាអែល នឹងធ្វើឲ្យប្រសើរឡើងនូវសមត្ថភាពរបស់អ៊ីស្រាអែល ក្នុងការទប់ទល់នឹងការគំរាមកំហែងនាពេលបច្ចុប្បន្ន និងអនាគត ដោយបង្កើនសមត្ថភាពរបស់កងកម្លាំងអាកាស ក្នុងការការពារព្រំដែនអ៊ីស្រាអែល ហេដ្ឋារចនាសម្ព័ន្ធសំខាន់ៗ និងមជ្ឈមណ្ឌលប្រជាជន។

ការដឹកជញ្ជូនគ្រាប់បែកជាង ២ ៩០០គ្រាប់ឲ្យអ៊ីស្រាអែល នឹងធ្វើឡើងនៅក្នុងឆ្នាំ២០២៥នេះ ឯការដឹកជញ្ជូនមីស៊ីល Hellfire ចំនួន ៣ ០០០គ្រាប់ រំពឹងនឹងត្រូវធ្វើឡើងក្នុងឆ្នាំ២០២៨ខាងមុខ។

អ៊ីស្រាអែល បានបើកការវាយលុកយ៉ាងខ្លាំងក្លាប្រឆាំងនឹងក្រុមហាម៉ាសនៅតំបន់ហ្គាហ្សាក្នុងខែតុលាឆ្នាំ២០២៣ ដើម្បីឆ្លើយតបទៅនឹងការវាយប្រហារដែលមិនធ្លាប់មានពីមុនមកដោយក្រុមសកម្មប្រយុទ្ធប៉ាឡេស្ទីនមួយនេះនៅលើភាគខាងត្បូងប្រទេសរបស់ខ្លួន។

សង្រ្គាម បានបំផ្លិចបំផ្លាញជាច្រើននៃតំបន់ហ្គាហ្សា ដែលជាទឹកដីឆ្នេរសមុទ្រតូចចង្អៀតនៅលើសមុទ្រមេឌីទែរ៉ាណេ បណ្តាលឲ្យមានការផ្លាស់ទីលំនៅរបស់ប្រជាជនជាច្រើន ប៉ុន្តែបទឈប់បាញ់បានចូលជាធរមានចាប់តាំងពីខែមករាមុន ដែលនាំមកនូវការបញ្ឈប់ជម្លោះដ៏សាហាវ និងផ្តល់ការដោះលែងចំណាប់ខ្មាំងដែលត្រូវបានចាប់ខ្លួនដោយក្រុមហាម៉ាស។

ជាការឆ្លើយតបទៅនឹងការព្រួយបារម្ភអំពីការស្លាប់របស់ជនស៊ីវិល រដ្ឋបាលរបស់អតីតប្រធានាធិបតីអាមេរិក ចូ បៃដិន នាពេលនោះបានរារាំងការដឹកជញ្ជូនគ្រាប់បែកទម្ងន់ ២ពាន់ផោនទៅកាន់ប្រទេសអ៊ីស្រាអែល ប៉ុន្តែលោក ដូណាល់ ត្រាំ ដែលជាអ្នកស្នងតំណែងថ្មី តាមសេចក្តីរាយការណ៍បានយល់ព្រមលើការដឹកជញ្ជូននេះឡើងវិញ បន្ទាប់ពីបានចូលកាន់តំណែងកាលពីថ្ងៃទី២០ខែមករា៕

ដោយ៖ ឈាង