ព័ត៌មានអន្ដរជាតិ

អាមេរិកនិរទេសជនអន្តោប្រវេសន៍ជិត១១០០០នាក់ទៅកាន់ម៉ិកស៊ិក

បានផុស

២ ខែ មុន

នៅ

ថ្ងៃអាទិត្យ ៩ កុម្ភៈ ២០២៥

ដោយ

អាជ្ញាធរសហរដ្ឋអាមេរិកស្ថិតក្រោមបទបញ្ជាថ្មីរបស់ប្រធានាធីបតី ដូណាល់ ត្រាំ បាននិរទេសជនអន្តោប្រវេសន៍ជិត១១.០០០នាក់ទៅកាន់ប្រទេសម៉ិកស៊ិកចាប់តាំងពីលោក ដូណាល់ ត្រាំ ចូលកាន់តំណែង និងបានចេញបញ្ជាប្រតិបត្តិចាប់បញ្ជួនជនអន្តោប្រវេសន៍ដែលចូលទឹកដីអាមេរិកខុសច្បាប់។

ការតវ៉ានៅច្រកព្រំដែន Los Angeles ប្រឆាំងការឆាប់ខ្លួន និងការបញ្ជូនចេញពីសហរដ្ឋអាមេរិក។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមជនអន្តោប្រវេសន៍ដែលត្រូវនិរទេសទាំងនោះ មានជនជាតិម៉ិកស៊ិកចំនួន ៨ ៤២៥ នាក់ និង ២ ៥៣៩ នាក់មកពីប្រទេសផ្សេងទៀត ដែលចូលទឹកដីអាមេរិកតាមច្រកប្រទេសម៉ិកស៊ិក។

មេដឹកនាំម៉ិកស៊ិក លោកស្រី Claudia Sheinbaum បាននិយាយថា សហរដ្ឋអាមេរិកបាននិរទេសជនអន្តោប្រវេសន៍ជិត ១១០០០នាក់ ទៅកាន់ប្រទេសម៉ិកស៊ិក ចាប់តាំងពីប្រធានាធិបតីអាមេរិក Donald Trump ចូលកាន់តំណែងកាលពី ១៨ថ្ងៃមុនមក។

នៅក្នុងសន្និសីទសារព័ត៌មានប្រចាំថ្ងៃថា ប្រធានាធិបតីម៉ិកស៉ិក បានលើកឡើងថា ជើងហោះហើរកំពុងត្រូវបានរៀបចំដើម្បីធ្វើមាតុភូមិនិវត្តន៍ជនបរទេស។ ជាឧទាហរណ៍ នៅថ្ងៃព្រហស្បតិ៍ ជនអន្តោប្រវេសន៍ដែលត្រូវបាននិរទេសពីសហរដ្ឋអាមេរិកត្រូវបានហោះហើរពីម៉ិកស៊ិកទៅហុងឌូរ៉ាស។

Sheinbaum បាននិយាយថា ៖«នេះគឺជាការស្ម័គ្រចិត្ត។ យើងនឹងផ្តល់ការគាំទ្រដើម្បីឱ្យពួកគេអាចទៅកាន់ប្រទេសដើមរបស់ពួកគេ។

មេដឹកនាំម៉ិកស៊ិកក៏បាននិយាយផងដែរថា អ្នកនិរទេសទាំងអស់ត្រូវបានសម្ភាសនៅពេលពួកគេត្រូវបានគេនាំត្រឡប់មកវិញពីសហរដ្ឋអាមេរិកដើម្បីកំណត់ថាតើសិទ្ធិរបស់ពួកគេត្រូវបានរំលោភបំពាន។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិនៅថ្ងៃទី២០ខែមករាដោយប្រកាសភាពអាសន្នជាតិនៅតាមព្រំដែនជាមួយម៉ិកស៊ិក។ មេដឹកនាំអាមេរិកបានអះអាងថា ការណ៍នេះនឹងធ្វើឲ្យវាអាចបញ្ជូនទាហានទៅព្រំដែនម៉ិកស៊ិក «ដើម្បីទប់ទល់ការឈ្លានពានដ៏មហន្តរាយក្នុងប្រទេសរបស់យើង»៕

ដោយ រ៉ាន់ រើយ