ព័ត៌មានអន្ដរជាតិ

ជនជាតិថៃ ៥នាក់ ត្រូវបានក្រុមហាម៉ាសដោះលែង ក្រោយជាប់ឃុំខ្លួនអស់ ១៥ខែ

បានផុស

២ នាទីutes មុន

នៅ

ថ្ងៃចន្ទ ១០ កុម្ភៈ ២០២៥

ដោយ

Chheang

ទីភ្នាក់ងារព័ត៌មាន Reuters បានចុះផ្សាយកាលពីថ្ងៃទី៩ខែកុម្ភៈឆ្នាំ២០២៥ថា ចំណាប់ខ្មាំងជាជនជាតិថៃចំនួន ៥នាក់ ដែលត្រូវចាប់ខ្លួនទៅតំបន់ហ្គាហ្សាដោយក្រុមសកម្មប្រយុទ្ធប៉ាឡេស្ទីនហាម៉ាស ត្រូវបានដោះលែងឲ្យមានសេរីភាពហើយកាលពីចុងសប្ដាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងការវាយប្រហារដោយក្រុមហាម៉ាសកាលពីខែតុលាឆ្នាំ២០២៣ទៅលើប្រទេសអ៊ីស្រាអែល ជនជាតិថៃជាង ៤០នាក់ត្រូវបានសម្លាប់ និង ៣១នាក់ផ្សេងទៀត ត្រូវចាប់ខ្លួនទៅកាន់តំបន់ហ្គាហ្សា។ កាលពីខែវិច្ឆិកាឆ្នាំ២០២៣ ហាម៉ាសបានដោះលែងចំណាប់ខ្មាំងជនជាតិថៃចំនួន ១៧នាក់ឲ្យត្រឡប់ទៅកាន់ប្រទេសកំណើតវិញ។

រដ្ឋមន្ត្រីការបរទេសថៃ លោក Maris Sangiampongsa ដែលបានជួបចំណាប់ខ្មាំងនៅអ៊ីស្រាអែលបន្ទាប់ពីការដោះលែងពួកគេកាលពីសប្តាហ៍មុន បាននិយាយថា៖ «នេះគួរឲ្យត្រេកអរ ដែល (ពួកគេ) វិលត្រឡប់ទៅកាន់ក្រុមគ្រួសាររបស់ពួកគេវិញ។ យើងមិនដែលចុះចាញ់ឡើយ ហើយនេះគឺជាលទ្ធផល»។

មុនពេលមានជម្លោះ ពលករថៃប្រមាណ ៣០ ០០០នាក់ បានធ្វើការក្នុងវិស័យកសិកម្មរបស់អ៊ីស្រាអែល ដែលធ្វើឲ្យពួកគេក្លាយជាក្រុមពលករចំណាកស្រុកធំជាងគេមួយនៅក្នុងប្រទេស។

ប្រជាជនថៃជិត ៩ ០០០នាក់ត្រូវបានធ្វើមាតុភូមិនិវត្តន៍ បន្ទាប់ពីការវាយប្រហារថ្ងៃទី៧ខែតុលា។ ពលករភាគច្រើនមកពីតំបន់ភាគឦសាននៃប្រទេសថៃ ជាតំបន់ដែលមានភូមិ និងសហគមន៍កសិកម្ម ដែលស្ថិតក្នុងចំណោមប្រជាជនក្រីក្របំផុតក្នុងប្រទេស។

ក្រសួងការបរទេសថៃ បាននិយាយថា នៅមានជនជាតិថៃម្នាក់ដែលកំពុងជាប់ឃុំខ្លួននៅតំបន់ហ្គាហ្សា ហើយបន្ថែមពីនេះក៏មានសាកសពជនជាតិថៃចំនួន ២នាក់ផ្សេងទៀតផងដែរ។

លោករដ្ឋមន្ត្រី Maris បានប្រាប់ថា៖ «យើងនៅតែមានក្តីសង្ឃឹម និងបន្តធ្វើការដើម្បីនាំយកពួកគេមកវិញ»៕