អាមេរិកទៀតហើយ! យន្តហោះមួយគ្រឿង បើកទៅបុកយន្តហោះមួយគ្រឿងទៀត 

វិស័យអាកាសចរណ៍អាមេរិកកើតមានបញ្ហាទៀតហើយ ដោយលើកនេះយន្តហោះមួយគ្រឿង បានបើកធ្លាក់ផ្លូវរត់ (Runway) ទៅបុកយន្តហោះមួយគ្រឿងទៀតនៅក្នុងរដ្ឋ Arizona បណ្តាលឲ្យមនុស្សម្នាក់ស្លាប់និង៤នាក់ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧទ្ទវហេតុនេះកើតឡើងនៅឯអាកាសយានដ្ឋាន Scottsdale នាវេលាម៉ោង ២:៤៥នាទីរសៀលថ្ងៃចន្ទទី១០ខែកុម្ភៈឆ្នាំ២០២៥ (ពេលវេលានៅអាមេរិក)។

តាមការចុះផ្សាយរបស់ Daily Mail, យន្តហោះថ្នាក់ពាណិជ្ជកម្មធុនកណ្តាល Learjet 35A បានបើកធ្លាក់ផ្លូវទៅបុកយន្តហោះ Gulfstream G200 ដែលជាយន្តហោះថ្នាក់ពាណិជ្ជកម្មធុនកណ្តាលដូចគ្នា ខណៈកំពុងចតចោលនៅឯអាកាសយានដ្ឋាន។

យ៉ាងណាក្តី មកទល់ពេលនេះ គេនៅមិនទាន់ដឹងឡើយថា យន្តហោះ Learjet 35A បើកធ្លាក់ផ្លូវដោយសារមូលហេតុអ្វី។

សូមបញ្ជាក់ថា ហេតុការណ៍នេះកើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីឧបទ្ទវហេតុធ្លាក់យន្តហោះនៅរដ្ឋអាឡាស្កា បានបណ្តាលឲ្យមនុស្សចំនួន១០នាក់ បាត់បង់ជីវិត។

វាជាយន្តហោះខ្នាតតូចប្រភេទ Cessna 208 Caravan មានដឹកមនុស្សចំនួន១០នាក់ ក្នុងដំណើរចេញពីទីក្រុង Unalakleet ទៅកាន់ទីក្រុង Nome ប៉ុន្តែវាបានបាត់ចេញពីរ៉ាដា ខណៈនៅសល់១០នាទីទៀតទើបដល់គោលដៅ។

ការធ្លាក់យន្តហោះនោះទៀតសោត គឺជាឧបទ្ទវហេតុធំទីបី ដែលញាំញីវិស័យអាកាសចរណ៍អាមេរិក ក្នុងរយៈពេលត្រឹមជាងមួយសប្តាហ៍។

កាលពី​ថ្ងៃ​ទី​២៩ខែមករា យន្តហោះ​ពាណិជ្ជកម្មនិង​ឧទ្ធម្ភាគចក្រ​យោធា ​បាន​បុក​គ្នា​នៅ​ជិត​រដ្ឋធានី វ៉ាស៊ីនតោន ឌីស៊ី ដោយ​សម្លាប់​មនុស្ស​៦៧​នាក់​។

លុះមកដល់ថ្ងៃទី៣១ខែមករា យន្តហោះពេទ្យបានធ្លាក់នៅទីក្រុង Philadelphia ដោយសម្លាប់មនុស្ស ៦ នាក់ជិះក្នុងនោះ និងមនុស្សម្នាក់ទៀតនៅលើដី៕

អត្ថបទ៖ សុខ សុវណ្ណ

ចុចអាន៖ ធ្លាក់យន្តហោះនៅ អាឡាស្កា អ្នកជិះក្នុងនោះ ស្លាប់ទាំងអស់