​បទឈប់បាញ់​ហ្គាហ្សា​​​ប្រឈម​​ការ​រំលោ​​ភ​ ដោយ​ភាគី​ទាំងពីរ​មានលេសរៀងៗខ្លួន​

ក្រុមហាម៉ាសថានឹងពន្យារពេលការដោះលែងចំណាប់ខ្មាំងបន្ថែមទៀតនៅក្នុងតំបន់ហ្គាហ្សា និងបានចោទប្រកាន់អ៊ីស្រាអែលថា បានរំលោភលើបទឈប់បាញ់ ក្រោយអ៊ីស្រាអែលលុបចោលការដកទ័ពចេញរបស់ខ្លួនពីតំបន់ហ្គាហ្សា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី១១ខែកុម្ភៈនេះ។

ក្រុមហាម៉ាស បាននិយាយថា ផែនការរបស់ខ្លួនក្នុងការពន្យារពេលការដោះលែងចំណាប់ខ្មាំងលើកក្រោយនឹងពន្យាពេល រហូតដល់មានការជូនដំណឹងបន្ថែម ដែលអាស្រ័យលើថាតើអ៊ីស្រាអែលគោរពតាមកាតព្វកិច្ចរបស់ខ្លួនឬអត់ ខណៈកងទ័ពអ៊ីស្រាអែលបានលុបចោលការចាកចេញទាហានរបស់ខ្លួនពីតំបន់ហ្គាហ្សាកាលពីថ្ងៃចន្ទ និងទំនងជាត្រៀមខ្លួនប្រយុទ្ធសារជាថ្មី ប្រសិនបើបទឈប់បាញ់​​​បរាជ័យ​នោះ​​។

អ៊ីស្រាអ៊ែល និងក្រុមហាម៉ាសកំពុងស្ថិតក្នុងបទឈប់បាញ់រយៈពេលប្រាំមួយសប្តាហ៍ ដែលក្រុមហាម៉ាស់បានប្តេជ្ញាដោះលែងចំណាប់ខ្មាំង៣៣នាក់ដែលត្រូវបានចាប់ខ្លួនក្នុងការវាយប្រហារកាលពីថ្ងៃទី៧ខែតុលាឆ្នាំ ២០២៣ ជាថ្នូរនឹងអ្នកទោសប៉ាឡេស្ទីនជិត២០០០នាក់។

ភាគីទាំងពីរបានធ្វើការដោះដូរចំណាប់ខ្មាំងចំនួនប្រាំដងចាប់តាំងពីដំណាក់កាលទី១ នៃបទឈប់បាញ់បានចូលជាធរមានកាលពីថ្ងៃទី១៩ខែមករាដោយបានដោះលែងចំណាប់ខ្មាំងអ៊ីស្រាអែល២១នាក់និងអ្នកទោសប៉ាឡេស្ទីនជាង៧៣០នាក់។ ការផ្លាស់ប្តូរបន្ទាប់គ្រោងនឹងធ្វើនៅថ្ងៃសៅរ៍ ដែលមានការដោះលែងចំណាប់ខ្មាំងអ៊ីស្រាអែលបីនាក់បន្ថែមទៀតជាថ្នូរនឹង​ការ​ដោះ​លែង​​អ្នកទោសប៉ាឡេស្ទីនរាប់រយនាក់។

ទោះយ៉ាងណាសង្រ្គាម​ទំនង​ចាប់​ផ្តើម​ជាថ្មី​នៅដើមខែមីនា ប្រសិនបើគ្មានកិច្ចព្រមព្រៀងណាមួយត្រូវបានសម្រេចលើដំណាក់កាលទីពីរដ៏ស្មុគស្មាញនៃបទឈប់បាញ់ ដែលអំពាវនាវឱ្យមានការវិលត្រឡប់នៃចំណាប់ខ្មាំងដែលនៅ​សេស​សល់​ទាំងអស់ និងការពន្យាពេលមិនកំណត់នៃបទឈប់បាញ់៕

អត្ថបទ៖ ប៊ុន សុភាព