UN៖ ​ប្រជាជនប៉ាឡេ​​ស្ទីន៤ម៉ឺននាក់​​នៅ​West Bank ​ត្រូវ​​បង្ខំចិត្ត​ជម្លៀសចេញ​​

ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយថា ការជម្លៀសប្រជាជនប៉ាឡេស្ទីនដោយបង្ខំនៅភាគខាងជើងតំបន់ West Bank កំពុងកើនឡើងក្នុងអត្រាដ៏គួរឱ្យព្រួយបារម្ភដោយចំនួនមនុស្ស​ត្រូវ​​ជម្លៀសបានកើនឡើងដល់ ៤ម៉ឺននាក់ ចាប់តាំងពីខែមករា។

ការព្រមានរបស់ UNRWA នេះបានកើតឡើងនៅពេលដែលកងកម្លាំងអ៊ីស្រាអែលបន្តការវាយឆ្មក់ដ៏ធំរបស់ពួកគេកាលពីថ្ងៃអង្គារ វាយលុកទីក្រុង Jenin និងចាប់ខ្លួនមនុស្ស៣នាក់ និងបានរុះរើផ្ទះជាច្រើនខ្នងនៅក្នុងតំបន់ពីរនៅជិតទីក្រុង Hebron ។

យោងតាម UNRWA ចាប់តាំងពីការចាប់ផ្តើមប្រតិបត្តិការកាលពីថ្ងៃទី២១ខែមករា អ៊ីស្រាអែលបានផ្តោតលើជំរំ​​ជន​ភៀស​ខ្លួន Jenin និងទីក្រុងជាប់គ្នា ហើយការវាយឆ្មក់បានបន្តពង្រីកទៅតំបន់ផ្សេងទៀតនៃទឹកដីដែលកាន់កាប់។ មកដល់ពេល​នេះ ជំរំ​ជនភៀសខ្លួនជាច្រើនរួមទាំង Jenin, Tulkarem, Nur Shams និង Far’a បានក្លាយជា​ផ្ទះ​រួម​របស់​ជនភៀសខ្លួន​ប៉ាឡេស្ទីន​ប្រមាណ ៧៦៦០០​នាក់។

UNRWA បាននិយាយថា៖«ប្រតិបត្តិការម្តងហើយម្តងទៀត និងការបំផ្លិចបំផ្លាញធ្វើឡើងដោយកងកម្លាំងអ៊ីស្រាអែល បាន​ធ្វើឱ្យជំរំ​ជនភៀសខ្លួនភាគខាងជើងមិនមានសុវត្តិភាព ធ្វើឲ្យប្រជាជនផ្លាស់ទីលំនៅម្ដងហើយម្ដងទៀត។ ដោយសារការ​វាយប្រហាររបស់អ៊ីស្រាអែលនៅក្នុងឆ្នាំ២០២៤មានប្រជាជនប៉ាឡេស្ទិនជាង៦០ភាគរយបានរផ្លាស់ទីលំនៅ»។

​ចូល​ដល់​​ឆ្នាំ២០២៥ រហូតមកដល់ពេលនេះ UNRWA បានកត់សម្គាល់ថា អ៊ីស្រាអែលបាន​ប្រតិបត្តិការ​វាយ​ឆ្មក់តាមអាកាសចំនួន៣៨​លើកសំដៅទៅលើតំបន់ West Bank។ យោងតាមទិន្នន័យ ទីតាំងជម្លោះប្រដាប់អាវុធ និងព្រឹត្តិការណ៍ (ACLED) ដែលជាក្រុមឃ្លាំមើលវិបត្តិដែលមានមូលដ្ឋាននៅសហរដ្ឋអាមេរិក ប្រតិបត្តិការនៅតំបន់ West Bank បានសម្លាប់មនុស្សជិត៧០នាក់។

UNRWA ក៏បានរំលឹកឡើងវិញនូវការអំពាវនាវរបស់ខ្លួនលើជនជាតិអ៊ីស្រាអែលឱ្យការពារជនស៊ីវិល និងហេដ្ឋារចនាសម្ព័ន្ធស៊ីវិល គ្រប់ពេលវេលា ខណៈចាប់តាំងពីថ្ងៃទី​៣០ខែមករា UNRWA លែងមានទំនាក់ទំនងជាមួយអាជ្ញាធរអ៊ីស្រាអែល​ទៀតហើយ បន្ទាប់ពីការហាមឃាត់ប្រតិបត្តិការរបស់ទីភ្នាក់ងារបានចូលជាធរមាន ធ្វើឱ្យពួកគេមិនអាចបង្កើនការឈឺឆ្អាលអំពីការឈឺចាប់​របស់​ជនស៊ីវិលនៅក្នុងទឹកដីប៉ាឡេស្ទីនទៀតទេ៕

អត្ថបទ៖ ប៊ុន សុភាព